استانادا سيىر ءجۇر! ءدا-ءا-ءاۋ سيىر! بوكسەسىندە «بيۋدجەت» دەگەن تاڭباسى بار! تەزەك جابىسقان، جالپا-اق جامباسى بار... ءمۇيىزى تەرەكتەي، ەمشەكتەرى... «دۋتىي» شەلەكتەي... ەمشەك دەمەكشى، ساناپ شىقتىم، ارعى-بەرگى جاعىنا شىعىپ، قاراپ شىقتىم، جەلىنى جەتەۋ، جەتى جەلىندە جەتپىس «سوسكاسى» بار» ءولا، قۇلاعىنا ىلىنگەن مىقتى سوتكاسى بار...

 ۇكىمەت ءۇيىنىڭ الدىندا كۇيىس قايىرىپ تۇر ەدى، پوليتسيا ينسپەكتورلارى ايداپ شىققىسى كەلىپ، دۋبينكامەن ۇرا باستاعان. سيىر وقىرانىپ، پىسقىرىنىپ، قايقى كىرپىكتەرىن قاعىپ-قاعىپ جىبەرىپ، تۇرا ۇمتىلعاندا، پوليتسەيلەر مايدا تارى سياقتى شاشىلىپ كەتىپ، جان-جاققا قاشتى.

 سول ەكەن، بىلەكتەرىنە شەلەكتەرىن ءىلىپ، وبلىس، اۋدان اكىمدەرى، ءتىپتى مينيسترلەر، دەپارتامەنت باسشىلارى، ارالارىندا باس دارىگەرلەر دە بار، ءبارى جيىلىپ، ۇكىمەت سيىرىن ساۋا باستادى. بايعۇس سيىردىڭ جەلىنى سىزداپ كەتكەن سوڭ اشۋلانعان ەكەن، جان-جاعىنان جاپپاي باس سالعاندارعا سۇزىلە قاراپ قويىپ، ءتىپتى توڭقاڭداپ ساۋىپ جاتقان ءبىر شەنەۋنىكتىڭ قۇيرىعىنان جالاپ قويىپ، كۇيىس قايىرىپ تۇرا بەردى.

–بىلاي تۇرىڭىزدار، الدىمنان قۇرىڭىزدار! اۋىلعا، اۋىلدى وركەندەتۋ ءۇشىن ءسۇت– قارجى، قايماق– دوللار كەرەك! –دەگەن ءبىر وبلىس اكىمى جەلىنگە جابىسا كەتىپ، ەكى ەمشەكتى قاتارىنان اۋزىنا سالىپ، سورىپ جاتىر، سورىپ جاتىر...

–مەنىڭ دە ەمگىم كەلىپ كەتتى... –دەپ تامساندى اناداي جەردە قاراپ تۇرعان، ەرنىن سىلپ-سىلپ ەتكىزىپ جالاپ تۇرعان تۇرعىن ءۇي قۇرىلىسىنىڭ مەردىگەرى جۇتقانباي تويماسۇلى.

–ەمە عوي، –دەدى تەندەرلىك كوميسسيانىڭ توراعاسى دا تامسانىپ. سول ەكەن، ەكەۋى دە تۇرا ۇمتىلىپ، ەمشەك جەتپەگەن سوڭ، سيىردىڭ جامباسىنا جابىسا كەتتى. تويماسۇلى تاڭىرقاپ قالدى، بىرەۋ پىس-پىس ەتەدى. جالت قاراسا، شەكەرا گەنارالدارى دا سيىردىڭ توبىعىنان تىستەلەپ سورىپ جاتىر ەكەن.

–سيىردىڭ توبىعىندا ەمشەك بولمايدى، –دەپ قالدى تويماسۇلى ىرجالاقتاپ.

–سەن نە، سيىردىڭ جامباسىنان ءسۇت اعادى دەپ ويلادىڭ با؟

–ويباي ءىشىم...–دەگەن بىرەۋ جەرگە جالپ ەتە قالدى. ءبىر ءمينيستردىڭ ورىن­با­سارى ەكەن، ساۋىن سيىردىڭ قۇيرىعىن كوتەرىپ، التىن تەزەگىن جالاپ جاتقاندا، ءبىر تەۋىپتى! ءمينيستردىڭ ورىنباسارى ۇيالعانسىپ، تومەن قارادى. ويتكەنى، كوشە تولى كەدەيلەر ەدى. حالىق ساۋىن سيىردى سىرتتاي تاماشالاۋعا جينا­لىپ­تى، ءبارىنىڭ دە تەگىن سۇتتەن ىشكىسى كەلەدى-اق، بىراق ار-ۇياتتارىنىڭ جىبەر­مەي تۇرعانى... ال، ۇياتسىزدار... ۇكىمەت سيىرىن سورىپ جاتىر، سورىپ جاتىر... بايعۇس سيىردىڭ ءىشى قابىسىپ، جەلىندەرى جابىسىپ، رەزينا بولىپ قالسا دا شايناپ سورىپ جاتىر. ءسۇت ورنىنا قان شىقسا دا، بۇلكىلدەتەدى دەيسىز! قۇ­داي­ىم­اۋ، قازاق اتقا مىنەرلەرى وسىنشا اشقاراق، وسىنشا دۇنيە قۇمار، وسىنشا جاعىمپاز بولار ما ەدى؟ جاعىمپاز دەمەكشى، ءبىر كەزدە قىمبات شەتەل­دىك كولىكتەن شىرەنگەن بىرەۋ ءتۇستى. ەكىنشى بىرەۋ جاعىمپازدانىپ، استىنا ورىندىق قويدى. اناۋ وتىردى. سول ەكەن، الگى جاعىمپاز شەنەۋنىك سيىردىڭ جەلىنىنە جابىسقانداردى يتەرىپ، ءبىرىن قىتىقتاپ، ءبىرىنىڭ تۇمسىعىنان ءبىر پەرىپ ءجۇرىپ، ءبىر ەمشەككە جەتتى دە، شلانگى تىعىپ، ونى بايلاپ، بايلانعان جەرىنە ءمور باسىپ جاتتى. اناۋ وتىرعان جەرىندە بۇلكىلدەتىپ سورىپ جاتىر ەدى، ءبىر كەزدە ايقاي سالدى:

–شلانگىمدى بىرەۋ باسىپ تۇر!

–مەنەن اۋلاق قاشىپ تۇر! –دەپ گۇجىلدەدى شلانگىنى باسىپ تۇرعان ۇلكەن باستىق. ەندى تانىسا كەرەك، اناۋ ورنىنان ۇشىپ تۇرىپ، باسىن تومەن ءيىپ، كوزدەرى جىپىلىقتاپ، ءبىرتۇرلى ىقىلىقتاپ، كەيدە وتىرىك سىقىلىقتاپ، شلانگىنىڭ ۇشىن بەت ورامالىمەن ءسۇرتتى دە، لاۋازىمى وزىنەن ۇلكەن شەنەۋنىكتىڭ اۋزىنا توسا قويدى.

سيىر... سيىر موڭىرەپ جىبەردى...

اباي.kz