وتكەن جىلى ەلىمىزدەگى اۆتوكولىكتەردىڭ نومىرلەرىن «حالىقارالىق ستاندارتقا ساي» دەگەن سىلتاۋمەن وزگەرتۋ باستالعان كەزدە كەيبىرەۋلەر ورە تۇرەگەلىپ ەدى – «نەمەنەگە قايتا-قايتا اۋىستىرا بەرەمىز، بۇل دەگەنىمىز سول ءۇشىن بيۋدجەتتەن اقشا ءبولدىرىپ، سونى تالان-تاراجعا سالىپ جەۋدىڭ كەزەكتى ءبىر ءتاسىلى ەمەس پە؟» دەپ. ايتسە دە ايتىلعان اڭگىمە-ۋاجدەر «دالادا قالىپ»، كۇنى بۇگىنگە دەيىن جاڭا نومىرلەر «وندىرىسكە ەنگىزىلىپ» جاتىر. سول ءۇشىن بيۋدجەتتەن قانشا اقشانىڭ بولىنگەنىن، ول اقشانىڭ ويداعىداي يگەرىلگەن-يگەرىلمەگەنىن ەشكىم بىلمەيدى، شىنتۋايتىنا كەلگەندە. ء«ىس ءبىتتى، قۋ كەتتى» دەگەننىڭ كەرى. ال ەندى ءبىزدىڭ «بەلسەندى دەپۋتاتتارىمىزدىڭ» باستاما كوتەرۋىمەن جاقىندا جەكە باس كۋالىمىز تاعى دا اۋىستىرىلاتىن بولدى. سەبەپ پە؟ سەبەپ بىرەۋ-اق: «تسۆەتنوي» ەمەس، سوندىقتان ادەمى ەمەس.

قىسقاسى، ۇستىمىزدەگى جەلتوقساننىڭ بىرىنەن باستاپ جەكە باس كۋالىمىزدەگى «چەرنو-بەلىي» سۋرەتتىڭ ورنىنا ءاپ-ادەمى... «تسۆەتنوي» سۋرەت اۋىستىرىپ، «حالىقارالىق ستاندارتقا» ساي جاڭا كۋالىك الۋ «ناۋقانى» باستالىپ كەتتى. ءبىز ءىش تارتىپ قالدىق: «وۋ، بۇل دەگەنىمىز تاعى دا بيۋدجەت اقشاسىن بىت-شىت قىلىپ تالان-تاراجعا سالۋ ەمەس پە؟» دەپ. سويتسەك، ولاي ەمەس كورىنەدى، ويتكەنى ىشكى ىستەر مينيسترلىگى مەملەكەتتىك ءتىل جانە اقپارات دەپارتامەنتىنىڭ ديرەكتورى ءنۇردىلدا وراز مىرزانىڭ ايتۋىنا قاراعاندا، بۇل جولى بيۋدجەتتەن ءبىر تيىن دا بولىنبەپتى. ال ەندى ءبىزدىڭ قولىمىزداعى تاعى ءبىر رەسمي مالىمەتكە نازار اۋداراتىن بولساق، جاڭا كۋالىكتەگى ءتۇرلى-ءتۇستى فوتوگرافيالاردى باسۋعا قاجەتتى قوسىمشا مودۋلدەر 200 ميلليون تەڭگە تۇراتىن كورىنەدى، بىراق بۇل قاراجات بيۋدجەتتىڭ قالتاسىنان ەمەس، باسقا ءبىر «كوزدەن تابىلعان» ەكەن.

ويپىرماي، سوندا وسىناۋ 200 ميلليوندى مەملەكەتكە شىتىرلاتىپ تۇرىپ ساناپ بەرە سالعان «قولى اشىق ءھام جومارت الپاۋىت-وليگارح» كىم بولدى ەكەن، ءا! ويلاناتىن ماسەلە، ويتكەنى بۇل تۋرالى رەسمي مالىمەت جوق.

مارات ماداليموۆ.

اباي.kz