الماتىدا باس ءمۇفتي ەرجان قاجى مالعاجىۇلىنىڭ توراعالىعىمەن وتكەن قمدب عۇلامالار كەڭەسىندە ءدىن قىزمەتكەرلەرىنىڭ ەتيكاسى قابىلداندى.

ءدىني باسقارما تاريحىندا تۇڭعىش رەت قابىلدانعان قۇجاتتا مىناداي ماسەلەلەر قامتىلعان:

- يمامداردىڭ زاماناۋي اقپارات قۇرالدارىن، عالامتور، بايلانىس قۇرالدارىن جەتە مەڭگەرۋى، شەشەندىك ونەر، سويلەۋ ادەبىن يگەرۋى;

- مەشىتكە كەلۋشىلەرگە كوركەم مىنەز كورسەتۋى، ولاردىڭ وتىنىشتەرى بويىنشا قاجەتتى شارالاردى جۇزەگە اسىرۋى; 

- جۇمىس ۋاقىتىن ءتيىمدى پايدالانۋى، جوعارى كاسىبي جۇمىس ءۇشىن بارلىق كۇش-جىگەرىن جۇمساپ، بەلسەندى بولۋى، قويىلعان مىندەتتەردى شەشۋدىڭ وڭتايلى دا ءتيىمدى ادىستەرىن قولدانۋى;

- ءوزىن جان-جاقتى دامىتۋى، قوسىمشا ءىلىم الۋى، دۇنيەلىك ىلىمدەردى مەڭگەرۋى، ۇگىت-ناسيحات جۇمىستارىندا ۋاعىزدى قازاقستان تاريحىمەن، سالت-داستۇرمەن، ادەپ-عۇرىپپەن، بي-شەشەندەردىڭ قاناتتى سوزدەرىمەن، ماقال-ماتەلدەرمەن ۇشتاستىرىپ، قازاق حالقىنىڭ ۇلى تۇلعالارىنىڭ ء(ال-فارابي، قوجا احمەت ياساۋي، ءجۇسىپ بالاساعۇني، اباي، ىبىراي، شاكارىم، ءماشھۇر ءجۇسىپ، ت.ب.) وسيەتتى ولەڭدەرى مەن عيبراتتى اڭگىمەلەرىمەن كوركەمدەپ ايتۋى;

- ۇجىمدا ىسكەرلىك تانىتىپ، قىزمەتكەرلەر اراسىنداعى ىنتىماق، باۋىرمالدىق قۇندىلىقتاردى ارتتىرۋعا ىقپال ەتۋى، ولاردىڭ وتباسى، الەۋمەتتىك جاعدايىنا ءمان بەرۋى، ۇجىمدا كەز-كەلگەن ماسەلە كورىنىس بەرگەن جاعدايدا دەر كەزىندە ورىندى، وڭتايلى شەشىم قابىلداۋى;

- وتباسىنا مۇسىلماندىق تاربيە بەرۋى، ولاردىڭ كيىم كيۋ ادەبىنە، زايىرلى ءبىلىم الۋىنا كوڭىل ءبولۋى;

- كورشىلەرمەن، تۋعان-تۋىستارىمەن جاقسى قارىم-قاتىناستا بولۋى، ولارعا ءاردايىم قۇرمەت كورسەتۋى، قايعىسى مەن قۋانىشىنا ۇنەمى ورتاقتاسىپ وتىرۋى;

- قوعامعا وتباسىمەن ۇلگى بولا ءبىلۋى;

- جاقسى ىستەرگە، قايىرىمدىلىق شارالارعا ءاردايىم ءوزى باستاماشىل بولۋى، قوعامدى ىزگىلىككە باستاۋى;

- قوعامدىق ءىس-شارالارعا قاتىسىپ، بەلسەندىلىك تانىتۋى كەرەك.     

 اعابەك قوناربايۇلى،

قمدب ءباسپاسوز حاتشىسى