1-جەلتوقسان – قر تۇڭعىش پرەزيدەنتى كۇنىنە وراي جانە «وزەنمۇنايگاز» اق 50 جىلدىق مەرەيتويىنا بايلانىستى، 28-قاراشا كۇنى جاڭاوزەن قالاسىنداعى ر.وتەسىنوۆ اتىنداعى سپورت كەشەنى جانىنان بەلگىلى مۇنايشى، قالامگەر-جازۋشى، وزەن مۇناي گاز ءوندىرۋ باسقارماسىنىڭ العاشقى باسشىسى راحمەت وتەسىنوۆتىڭ ءبيۋستى اشىلدى.

سالتاناتتى شاراعا «وزەنمۇنايگاز» اق باس ديرەكتورى ماقسات يباعاروۆ، جاڭاوزەن قالاسىنىڭ اكىمى سەرىكباي تۇرىموۆ، «قازمۇنايگاز» ءبو» اق باس ديرەكتورىنىڭ ءبىرىنشى ورىنباسارى قايىربەك ەلەۋسىنوۆ، ر.وتەسىنوۆتىڭ جۇبايى س.قارابالينا جانە بالالارى، ۇزەڭگىلەس جۇمىس ىستەگەن مۇناي سالاسىنىڭ ارداقتىلارى، جاڭاوزەندىك جۇرتشىلىق قاتىستى. «راحمەت وتەسىنۇلى 1964-70-جىلدارى وزەن مۇناي گاز ءوندىرۋ باسقارماسىنىڭ العاشقى باسشىسى بولدى. مۇناي سالاسىندا شىڭدالىپ وسكەن مايتالمان مامان سول كەزدەرى جاڭادان اشىلعان وزەن كەن ورنىنىڭ يگەرىلۋىنە، قالىپتاسۋىنا وراسان زور ەڭبەك ءسىڭىردى. جاڭاوزەن قالاسىنىڭ ىرگە تاسىن دا ابزال ازامات ءوز قولىمەن قۇيدى. ەشتەڭە جوق سارى دالادا الىپ كەنورىندى يگەرۋ، جاڭادان قالا سالۋ تەك راحمەت وتەسىنۇلى سەكىلدى الىپتاردىڭ عانا قولىنان كەلەتىن ءىس. ءبىز وسىنداي ەل ارداقتاسىن ماقتان تۇتۋدى، ارداقتاپ وتىرۋدى ءوزىمىزدىڭ بورىشىمىز سانايمىز. بولاشاق ۇرپاقتىڭ جادىندا ساقتاۋ ءۇشىن ر.وتەسىنۇلى اتىنداعى سپورت كەشەنىنىڭ جانىنان ر.وتەسىنوۆتىڭ ءبيۋستىن اشۋدى كوزدەگەن ەدىك. بارشاڭىزعا مەرەكە وڭ بولسىن» دەدى ءوز سوزىندە باس ديرەكتور ماقسات يباعاروۆ.

سونىمەن قاتار، وسى كۇنى وزەن كەن ورنىنىڭ ەڭ العاشقى مۇناي بۇرقاعى الىنعان №1 سكۆاجينا مونۋمەنتى اشىلدى. مونۋمەنت «وزەنمۇنايگاز» اق 50 جىلدىق مەرەيتويىنا وراي قايتادان جاڭعىرتىلىپ وتىر. «1961-جىلى وزەن كەنورنىنان العاشقى بۇرقاعى الىندى دەگەن حابار سول كەزدەگى كەڭەستىك رەسپۋبليكالارداعى ەڭ ۇلكەن جاڭالىقتىڭ ءبىرى بولدى. ويتكەنى، وزەن كەنورنى سەكىلدى مۇناي قورى مەن ونىڭ قۇرامىنىڭ اسا باي بولۋى الەمدە وتە سيرەك كەزدەسەتىن قۇبىلىس. №1 سكۆاجينادان اتقىلاعان العاشقى مۇناي تامشىسى جاڭاوزەن قالاسىنىڭ بولاشاق تاعدىرىن شەشتى، ماڭعىستاۋ ءوڭىرىنىڭ يندۋستريالىق ءومىرىنىڭ العاشقى كۇنىنىڭ ءبىرى بولدى. سول سەبەپتى، مەن ءدال وسى مۇنايدىڭ العاشقى تامشىسى جارىققا شىققان جەردى كيەلى دەپ ەسەپتەيمىن. ونى قازىرگى جاس بۋىننىڭ، بولاشاق ۇرپاقتىڭ ۇمىتۋعا، ءتاۋ ەتپەۋگە قاقىسى جوق. ال وسى جەردە قايتادان جاڭعىرىپ، ىسكە قوسىلعان مونۋمەنت وزەننىڭ وتكەن ءومىرىنىڭ ءتىرى كۋاگەرى بولىپ تۇرا بەرەدى دەپ ەسەپتەيمىن» دەدى سالتاناتتى شاراعا قاتىسقان ەل ارداقتىسى نۇرلىحان بەكبوسىنوۆ.          

شارا بارىسىندا بىرقاتار مۇناي ارداگەرلەرى «وزەنمۇنايگاز» اق 50 جىلدىق مەرەيتويىنا وراي مەرەكەلىك توسبەلگىلەرمەن ماراپاتتالدى. 

اباي-اقپارات.