27-قاراشا كۇنى قازاق ونكولوگيا جانە راديولوگيا عىلىمي-زەرتتەۋ ينستيتۋتى مەن «قازاقستاننىڭ ونكولوگتار جانە راديولوگتارى» قوعامدىق بىرلەستىگى بىرىگىپ، «ارداگەرلەرگە ارنالعان سكرينينگتىك تەكسەرۋ» شاراسىن وتكىزدى. تەگىن تەكسەرىلۋگە 50-دەن استام قارت قاتىسىپ، دەنساۋلىعىنىڭ جاي-كۇيىن ءبىلىپ قايتتى.

2015 جىلى ۇلى جەڭىستىڭ 70 جىلدىعى كەلە جاتىر. بۇگىنگى بەيبىت ءارى تىنىش ءومىرىمىز ءۇشىن سوعىس ارداگەرلەرى مەن تىل ەڭبەككەرلەرىنىڭ الدىندا قارىزدارمىز. سوندىقتان، ولاردىڭ ەرلىگىن ۇمىتپاۋ – ءبىزدىڭ باستى پارىزىمىز. الايدا، قازىر ارداگەرلەر ۇيىندە، ودان قالدى، قارتتار ۇيىندە ءومىر ءسۇرىپ جاتقاندار از ەمەس. ءبىرى تاعدىردىڭ تالكەگىنە ءتۇسىپ، جالعىز قالسا، ەندى ءبىرىن باۋىر ەتى بالالارى تاستاپ كەتكەن. ولار باسى اۋىرىپ، بالتىرى سىزداسا، ءوز اياعىمەن ەمحاناعا بارىپ، قاجەتتى ەم-دوم الا الماۋى مۇمكىن. ءتىپتى كوپشىلىگى اۋرۋىن ايتا الماي-اق، ومىردەن وتەدى. ءدال وسىنى ەسكەرگەن قازاق ونكولوگيا جانە راديولوگيا عىلىمي-زەرتتەۋ ينستيتۋتىنىڭ ماماندارى كومەككە ءزارۋ جاندارعا قول ۇشىن سوزۋدى ماقسات ەتتى.

«ونكولوگيالىق كومەكتى ارتتىرۋ» باعدارلاماسى اياسىندا مۇنداي تەگىن سكرينينگتىك تەكسەرۋلەر وتكىزىپ تۇرامىز. ال ءدال قارتتار ۇيىندەگى جانداردى الىپ كەلىپ، تولىعىمەن تەكسەرۋ شاراسى ءبىرىنشى رەت بولىپ وتىر. بۇيىرتسا، الداعى ۋاقىتتا دا جالعاسىن تاباتىن بولادى» دەيدى مەديتسينا عىلىمدارىنىڭ دوكتورى، پروفەسسور عالىم ادىلباەۆ.

نەگىزى ەلىمىزدە 58-60 جاسقا دەيىنگىلەر اراسىندا قاتەرلى ىسىكتىڭ الدىن الۋ ماقساتىندا سكرينينگتىك تەكسەرۋ وتكىزىلەدى. بۇرىن تىركەلمەگەندەر اراسىندا  كولورەكتالدىق قاتەرلى ىسىكتى انىقتاۋ ءۇشىن 70 جاسقا دەيىن، ال ەرلەر اراسىندا كەزدەسەتىن قۋىق بەزىنىڭ قاتەرلى ىسىگىنە قارسى 66 جاسقا دەيىن سكرينينگ جاسالادى. الايدا، بۇل جاستان ءوتىپ كەتكەن جاندارعا، وكىنىشكە قاراي، ارنايى تەكسەرۋ جاسالمايدى. ال بۇگىن سوعىس ارداگەرلەرى مەن تىل ەڭبەككەرلەرى بىلىكتى ماماندارعا قارالىپ،  ۋرولوگ، گينەكولوگ، رەنتگەنولوگ، ماممولوگ جانە حيرۋرگتاردىڭ باقىلاۋىنان ءوتتى. دارىگەرلەر قاجەت ەم-شارانى دا جازىپ بەردى.

بۇگىن تەكسەرىلۋگە كەلگەن تىل ەڭبەككەرى قاڭتارباەۆ جايساڭباي: ء«وزىمىزدىڭ ارداگەرلەر ۇيىندە دە دارىگەرلەر كۇندەلىكتى قارايدى. بىراق مۇنداي سكرينينگتىك تەكسەرۋگە ءبىرىنشى رەت اكەلىپ وتىر. ءبىزدىڭ دەنساۋلىعىمىزعا الاڭداپ، اۋرۋدىڭ الدىن الۋ ءۇشىن جاسالىپ جاتقان جاقسىلىق قوي بۇل. قامقورلىقتارىنا راقمەت» دەپ ريزاشىلىعىن ءبىلدىردى.

قر پرەزيدەنتى  نۇرسۇلتان نازارباەۆ 2012 جىلى 27-قاڭتارداعى حالىققا جولداۋىندا 2011-2015 جىلدارعا ارنالعان «سالاماتتى قازاقستان» باعدارلاماسى بويىنشا مەملەكەتتىك دەنساۋلىق ساقتاۋ سالاسىن دامىتۋدى تاپسىرعان ەدى. ال بۇل باعدارلاما وتاندىق ونكولوگيا قىزمەتىن دامىتۋعا باعىتتالعان.

سكرينينگتىك تەكسەرۋلەر ارقىلى قاتەرلى ىسىكتى ءبىرىنشى ساتىسىندا انىقتاۋ جىل ساناپ جاقسى ناتيجە كورسەتىپ كەلەدى. ونكولوگيالىق اۋرۋلاردى العاشقى ساتىسىندا انىقتاۋ – ناۋقاستىڭ جارتىلاي ايىعۋىمەن تەڭ. بۇل كەزدە وعان كومەك كورسەتۋگە بار مۇمكىندىك بار. ال قازاقستان – ءدال وسىنداي سكرينينگتىك تەكسەرۋلەردى بەلسەندى وتكىزەتىن ساناۋلى ەلدەردىڭ ءبىرى.

وزگە دە قوسىمشا اقپارات الۋ ءۇشىن قازاق ونكولوگيا جانە راديولوگيا عزي ءباسپاسوز ورتالىعىنا حابارلاسۋلارىڭىزعا بولادى:

ايگەرىم اعىلتاەۆا، 87013606663

گۇلناز سەمبيەۆا، 87073456491

e-mail:  onco.congressV@gmail.com

اباي-اقپارات