كەشە (01.12.2014 ج) استانا ۋاقىتىمەن 18.10-دار شاماسىندا الماتى قالاسىنىڭ اكىمى احمەتجان ەسىموۆ ادەتتەگىدەي الماتىداعى مەكتەپ وقۋشىلارىن جيناپ الىپ جاڭا جىلدىق ەلكانىڭ (شىرشانىڭ) شامىن جاقتى.

ءبىزدىڭ مەملەكەتتىك قىزمەتتەگى لاۋازىم يەلەرى ارناۋلى ورتا ءبىلىم بەرەتىن مەكەمەلەردىڭ (مەكتەپتەردىڭ) كومەگىنسىز نە ىستەي قويسىن، ءتايىرى. الدەقانداي ءبىر شارا ۇيىمداستىرا قالسا ءبىتتى، مەكتەپ مۇعالىمدەرى مەن وقۋشىلارىن ۇلارداي شۋلاتىپ اكەلىپ ورتاسىندا وداراڭداپ جۇرگەندى، وسقىرىنىپ سويلەگەندى عانا بىلەدى. وزگە قالالاردا دا سولاي شىعار، ال، الماتىدا مەكتەپ وقۋشىلارىن وقىتپاۋدىڭ ءتۇرلى امالدارى اسقىنىپ بارادى. ءيا، وسىلاي انىعىن ايتۋىمىز كەرەك، الماتىدا وقۋشىنى وقىتپاۋدىڭ، پارتاعا وتىرعىزباۋدىڭ تۇرلەرى كۇن ساناپ كوبەيە تۇسۋدە. نەگە دەيسىز عوي، نەگە دەسەڭىز، قالا اكىمى ەسىموۆ مىرزا شوۋدى اسا جاقسى كورەتىن ادام. ول بىردە الماتىعا دەگەن استا-توك ماحابباتىن پاش ەتىپ كۇيساندىقپەن ءان ايتسا،، بىردە ۆەلوسيپەد تەۋىپ سەرۋەندەۋگە شىعادى. كەيدە ءال-فارابي داڭعىلىنىڭ بويىنداعى پرەزيدەنت ساياباعىنا بارىپ بوي جازىپ، ەسكەرتكىشتەرگە تاعزىم ەتىپ، گۇل قوياتىنى بار. سونىڭ بارىنە الىپ مەگاپوليستىڭ ءنومىرى ءبىرىنشى ادامى وزگەلەردەن بۇرىن وقۋشىلاردى شاقىرادى.

مىنە، كەشە قازاقستان حالقى تۇڭعىش پرەزيدەنت كۇنىن اتاپ ءوتىپ، تويلاپ جاتقاندا ەسىموۆ ەسكى ءام كانىگى ادەتىنە باسىپ مەكتەپ ۇجىمدارىن ابىگەرگە سالدى. پرەزيدەنت نازارباەۆتىڭ «بالالىق شاعىنىڭ اسپانىن» تاماشالاپ ۇيدە وتىرۋعا ءتيىس بالاقانداردى بۇرسەڭدەتىپ رەسپۋبليكا سارايىنىڭ الدىنا اكەلدىرگەن اكىم ىرعالىپ-جىرعالىپ جىلى كەڭسەسىنەن كەشكى التىدا ارەڭ شىقتى. ءسويتتى  دە، ءبىر-ەكى اۋىز قازاقشاسىنا بىلدىرلاعان ورىسشاسىن قوسىپ، الدەنەلەردى ايتقان بولىپ، ەلكانىڭ شامىن جاقتى دا تايىپ تۇردى.

الماتىدا، ارينە، ارقاداعىداي اقىرعان اياز جوق شىعار، الايدا، اۋاسى ىلعالدى. ىلعالدى اۋانىڭ سۋىعى اناۋ-مىناۋ اتپال ازاماتتىڭ ءوزىن الىپ تۇسەدى. كەشە ساعات 15.00-دەن رەسپۋبليكا الاڭىندا ءجۇرىپ سۋىققا ۇرىنعان بالانىڭ بۇگىن قانشاسى اۋرىپ، مەكتەبىنە جەتە الماي، ۇيىندە جاتىر ەكەن، ونى ازىرگە انىقتاي الماي وتىرمىز. الايدا، ەسىموۆ مىرزانىڭ ەسەبى تۇگەل: ەلكاسىنا باردى، ەلباسىنا مالىمەتىن بەردى. ەندى ەپتەپ-سەپتەپ 16-جەلتوقسان دەيتىن «پالەسى كوپ كۇندى» وتكىزىپ السا بولدى، ارجاعى ميداي جازىق...

P.S. 1940 جىلدارى جاڭا جىلدى اتاپ ءوتىپ، تويلاتۋدى قازاققا ستالين ۇيرەتكەن ەكەن. قىرىپ- جويىپ، اتىپ-شاۋىپ وتىرىپ. سول زاماننىڭ كاۋگەرلەرىنىڭ ايتۋىنا قاراعاندا، قازاق ەلى ءبىرىنشى قاڭتاردى قالىپتى كۇندەردىڭ بىرىندەي قابىلداپ جۇرە بەرگەن كورىنەدى. سونى ەستىگەن ستالين قاھارىنا ءمىنىپ، قازاقتاردى كەزەكتى رەت قىرىپ سالىپ، شىرشانىڭ تۇبىندە شىراق جاعىپ، شىرق اينالىپ بيلەۋگە كوندىرىپتى.  سودان بەرى ءبىزدىڭ بيلىكتەگى شەنەۋنىكتەر ستالين ۇيرەتكەن مەرەكەگە ۇيرەنىپ قالعان با، الدە، الدەكىمدەردەن ۇرەيلەنە قورقا ما، ايتەۋىر دايىندىقتى ەرتە باستاپ كەتەتىندى شىعاردى. بۇرىن، سوۆەت وكىمەتىنىڭ كەزىندە جاڭا جىلدىڭ اڭگىمەسى جەلتوقساننىڭ جيرمالارىنان بىلاي باستالاتىن ەدى، قازىر تاۋەلسىزدىك كۇنىن ۇرىپ قويىپ، دەد موروزدىڭ الدىنان ارسالاڭداپ شىعۋدى  ادەتكە اينالدىردىق.

ءسويتىپ، كەشە ەلىمىزدەگى بارلىق قالالار مەن ەلدى-مەكەندەردە جاڭا جىلدىق شىرشانىڭ شامدارى جارقىرادى. شىرشا جارىسى باستالدى. الماتىنىڭ ەلى دە ەسىموۆتىڭ ەلكاسىن كورىپ «شاتتانۋدا». توعىشارلار تويعانىنا ءماز...

Abai.kz