2013 جىلى 1 ترلن. 65 ملرد. تەڭگە تازا تابىس تاپقان «سامۇرىق-قازىنا» ۇلتتىق ءال-اۋقات قورى  cونىڭ 9 ملرد. تەڭگەسىن عانا ديۆيدەنت رەتىندە بيۋدجەتكە اۋدارىپتى.

ماجىلىستەگى جاس دەپۋتات ايقىن قوڭىروۆتىڭ ۇلتتىق كومپانيالاردىڭ قوياسىن قوپارىپ، ولاردىڭ مەملەكەتتىك بيۋدجەتكە ديۆيدەنت رەتىندە تۇك تە تولەمەيتىندىگى جونىندە جۋىردا Abai.kz سايتىندا جازىلدى. ەندى وسى دەپۋتات پرەمەر-مينيستر كارىم ماسىموۆكە رەسمي تۇردە ساۋال جاساپ، ەلدەگى «بارماق باستى-كوز قىستىلىقتىڭ» ەڭ ۇلكەنىن اشكەرەلەپ وتىر. ءبىزدىڭ سارابىمىزعا قاراعاندا، ەلدەگى مەملەكەتتىك (ۇلتتىق) كومپانيالار مەملەكەتكە ەشقانداي كىرىس كىرگىزىپ وتىرعان جوق. بۇل جايت مەملەكەتتىڭ باقىلاۋ فۋنكتسياسىنىڭ جوقتىعىنا دالەل. سونىڭ ىشىندە ديۆيدەنت تولەۋ بويىنشا ولاردىڭ ءبارى بىردەي تولەۋگە ءتيىستى ورتاق ءتارتىپ قابىلدانباعان. ماسەلەن، «پاراسات» جانە «زەردە» اتتى مەملەكەتتىك حولدينگتەردىڭ ديۆيدەنت تولەۋ ماسەلەسىن اكتسيونەر دەپ تابىلعان مەملەكەتتىك ورگاننىڭ ءوزى شەشەدى. ال «قازاگرو» حولدينگى بيۋدجەتكە تازا تابىستىڭ 10 پايىزىن عانا تولەيدى. «بايتەرەك» حولدينگى بۇل تولەمنەن 2017 جىلعا دەيىن تازا بوساتىلعان، دەي كەلىپ دەپۋتات «سامۇرىق-قازىنا» ۇلتتىق ءال-اۋقات قورىنىڭ ديۆيدەنت تولەۋى وكىمەتتىڭ ارنايى قاۋلىسىمەن پەرسونالدى تۇردە انىقتالاتىنىن ايتادى. ال ەندى وسى جەردە ورىندىعىڭىزدان قۇلاپ كەتپەيتىندەي بولىپ قاتتى ۇستانىڭىز:

دەپۋتاتتىڭ ايتۋىنا قاراعاندا،  2013 جىلى «سامۇرىق-قازىنا» ۇلتتىق ءال-اۋقات قورى  1 ترلن. 65 ملرد. تەڭگە تازا تابىس تاپقان. سونىڭ... 9 ملرد. تەڭگەسىن عانا ديۆيدەنت رەتىندە بيۋدجەتكە اۋدارىپتى. ياعني بيۋدجەتكە تازا تابىستىڭ 1 پايىزىنان از كولەمدە عانا اقشا تولەگەن. قالعان سومانى تۇگەلىمەن ءوزىنىڭ قۇزىرىندا قالدىرىپتى...

            بۇل نەتكەن ەركەلىك؟  كىمدى بايىتىپ جاتىرمىز؟ بۇل جەردە مەملەكەتتى، حالىقتى ەمەس، جەكە ادامداردى بايىتىپ جاتقانىمىز كورىنىپ تۇر. شىركىن، اشىق، دەموكراتيالى ەل بولىپ، وسىنىڭ ديرەكتورلار كەڭەسىنىڭ قۇرامىنا كىمدەر كىرەتىنىن جانە ولاردىڭ ساۋساقتارىن قيمىلداتپاي قانشادان سىياقى الاتىنىن بىلسە عوي... 

            كوممۋنيستەر فراكتسياسىنىڭ بارلىق مۇشەسى قول قويعان بۇل ساۋالدا دەپۋتات ا.قوڭىروۆ ۇكىمەت باسشىسىنا مەملەكەتتىك مۇلىكتى باسقارۋدا شىنشىل مەملەكەتتىك ديۆيدەنتتىك ساياسات بولۋى كەرەكتىگىن ەسكە سالا وتىرىپ، بۇگىنگى كۇنى ونىڭ ءفورمالدى تۇردە عانا جۇرگىزىلەتىنىن اتاپ ءوتتى. دامىعان ەلدەردىڭ تاجىريبەلەرىنە قاراساق، ۇلتتىق كومپانيالار ءتيىمدى ديۆيدەنتتىك ساياسات جۇرگىزەدى، سونىڭ ارقاسىندا سالىقتى دا، ديۆيدەنتتى دە بيۋدجەتكە دۇرىس تولەپ وتىر. ال بىزدەگى ديۆيدەنتتىك ساياسات مەملەكەتتىك كومپانيالاردىڭ مەملەكەتكە ەمەس، تەك وزدەرىنە عانا قىزمەت ەتۋىنە مۇمكىندىك بەرۋدە. سوندىقتان بارلىق ۇلتتىق كومپانيالارعا ورتاق ءتيىمدى ديۆيدەنتتىك ساياسات قولدانۋدى تالاپ ەتەمىز، دەيدى ا. قوڭىروۆ. دۇرىس-اق، ۇكىمەت ونداي باتىلدىققا بارا الار ما ەكەن، كورەلىك.  

مارينا كاكيماكي، جۋرناليست.

Abai.kz