الماتىدا قازاقستان مۇسىلماندارى ءدىني باسقارماسىنىڭ توراعاسى ەرجان قاجى مالعاجىۇلى الەم چەمپيوندارى – يليا يلين مەن جاسۇلان قىدىرباەۆتى جانە ونىڭ باپكەرلەرىن قابىلدادى.

قازاقستان اتىن ايداي الەمگە پاش ەتكەن سپورتشىلار باس مۇفتيمەن ەلدەگى تۇراقتىلىق، بىرلىك، ەلىمىزدىڭ وركەندەۋى، مەملەكەتىمىزدىڭ مەرەيى، سپورت تۋرالى سۇحباتتاستى. زىلتەمىرشى جىگىتتەردى جەڭىسىمەن قۇتتىقتاعان ەرجان قاجى مالعاجىۇلى: «سىزدەردىڭ كوك تۋىمىزدى كوكتە جەلبىرەتىپ، جەڭىسكە جەتىپ، الەمگە تانىلىپ، مارتەبەلەرىڭىزدىڭ بيىكتەپ جاتقانى – اللانىڭ قولداۋى، ەلباسىنىڭ قامقورلىعى، تاۋەلسىزدىگىمىزدىڭ، بىرلىگىمىزدىڭ ارقاسى. قوعامدا تىنىشتىق بولسا، ءبىز ءالى تالاي اسۋلاردى باعىندىرامىز. سپورت – بارشانى بىرلىككە بىرىكتىرەتىن يگى شارا. ەلىمىزدەگى مۇسىلمان جاماعاتى دا سىزدەردىڭ جەڭىستەرىڭىزگە قۋانىپ، قولداپ-قۋاتتاپ، اللاعا دۇعا ەتۋدە. ءبىزدىڭ باستى جەتىستىگىمىز – بىرلىگىمىزدە. حالقىمىز كەزىندە تالاي تاۋقىمەتتى باستان كەشتى. قازىر، قۇدايعا شۇكىر، جاعدايىمىز جاقسى. ءبىز بۇگىنگى كۇنىمىزدىڭ قادىرىن جاقسى ءتۇسىنۋىمىز كەرەك. اللا تاعالا جار بولىپ، بيىك شىڭداردى باعىندىرا بەرۋلەرىڭىزگە تىلەكتەسپىن»، – دەدى.

وزگە مەملەكەتتەرمەن سالىستىرعاندا تۇرمىسى ءتۇزۋ، بىرلىگى ساقتالعان، ەكونوميكاسى وركەندەپ كەلە جاتقان قازاقستاندا تۇرۋ ۇلكەن باقىت ەكەنىن ايتقان يليا يلين باس ءمۇفتيدىڭ قابىلداۋىن وزىنە مارتەبە سانايتىنىن جەتكىزدى. ء«بارىمىزدىڭ ماقساتىمىز ءبىر: ەلىمىزدىڭ دامۋىنا ۇلەس قوسۋ، قازاقستاندى الەمگە تانىتۋ. ءبىزدىڭ قولداۋشىمىز – حالىق، ەلباسىمىز نۇرسۇلتان ءابىشۇلى. بۇل بىزگە ۇلكەن جاۋاپكەرگشىلىك جۇكتەيدى. ەل سەنىمىنەن شىعۋعا ءاردايىم دايىنبىز. ءبىزدى قابىلداپ، جىلى لەبىزدەرىڭىزدى ءبىلدىرىپ جاتىرسىز. سىزگە تەك العىس ايتامىز. سىزدەردىڭ دە جۇمىستارىڭىز وتە ماڭىزدى. باستامالارىڭىزدى كورىپ، ءبىلىپ جۇرەمىن. سىزگە دە جۇمىسىڭىزعا بەرەكە تىلەيمىن»، – دەدى ي. يلين.

قمدب توراعاسى چەمپيونداردىڭ باپكەرلەرىنە جىلى لەبىزىن ءبىلدىرىپ، العىس ايتتى. باس ءمۇفتي جاستارىمىز تانىمال تۇلعالارعا، سپورتشىلارعا قاراپ، بوي تۇزەيتىنىن، سولاردان ۇلگى الاتىنىن تىلگە تيەك ەتتى.