قازاق جۋرناليستيكاسىندا سوڭعى جىلدار بەدەرىندە بىرەۋدى جارنامالاپ، ودان بولماسا سىن تەزىنە الىپ تابىس تابۋ ءۇردىسى پايدا بولدى. مۇنى ءۇردىس دەگەننەن گورى ۇدەرىس دەۋگە كەلتىن شىعار. بىلايعى جۇرت جۋرناليست ماماندىعىن ەجەلگى كاسىپتىڭ ەكىنشىسى سانايدى. ال ءبىرىنشىسىن كوپتىڭ ءبارى جاقسى بىلەدى...

ءباسپاسوز كەڭىستىگىندە جوعارىدا ءبىز ايتىپ وتكەن ۇدەرىستەن ۇرىكپەي، ونى جۋرناليستىك تىڭ ءتاسىل دەپ ەسەپتەيتىن «تسەنترالازيامونيتور» دەگەن گازەت بار. وسى سارى باسىلىمنىڭ باس رەداكتورى بيگەلدى عابدۋلليننىڭ گازەتتى بوپسالاۋ قۇرالىنا اينالدىرىپ الىپتى دەگەن الىپ-قاشپا ءسوز ەستىلىپ قالىپ ءجۇر. ۋاقىتىسىندا شەت ەلگە دەيىن اسىپ، اتاعىنان ات ۇركەردەي بولعان رەداكتوردى راسىندا جوعارى قىزمەتتەگى شەنەۋنىكتەر جاقسى تانيدى. تانىماعاندا قايتسىن، ويتكەنى بيەكەڭ تانىماعانداردى «تانىتىپ» الۋعا ماشىقتانعان. وسى سەبەپتى ولاردىڭ كوبى  «اش بالەدەن، قاش بالە»، «كاپىر توق بولسا–مۇسىلمان تىنىش» دەپ سىرت اينالادى. مۇنى جاقسى بىلەتىن رەداكتور كەز-كەلگەن ارنايى تاپسىرىستى ورىندايدى، تەك قارجىسى تولەنسە بولعانى. بىزدە قانداي دا باسشىنىڭ سوڭىنان «ماي شام» الىپ تۇسپەي-اق قازا باستاساڭىز تالاي بىلىعىن تابۋعا بولادى. مىسالعا وبلىس بولماسا، اۋدان ورتالىعىنا ارناۋلى جۋرناليست جىبەرىلىپ قىرىنا ىلىككەن باسشىنىڭ شالىس باسقان ءاربىر قادامى جىپكە تىزىلەدى. بەيشارانىڭ كاسىبي بىلىكسىزدىگى، مورالدىق ازعىنداعانى دەيسىز بە، تاپسىرما العان جۋرناليست تىمىسكىلەپ رەداكتوردىڭ تاپسىرماسىن قالتقىسىز ورىنداپ قايتادى. «تسەنترالازيامونيتور»  باسىلىمىن  قولعا الساڭىز، وسىنداي ءبىر سالقىننىڭ سىزى بايقالادى.  ويتكەنى گازەتتىڭ ءار سانىنىن وقىپ شىعىپ بيەكەڭنىڭ جوعارى قىزمەتتە وتىرعان قاي شەنەۋنىكپەن ء«امپاي-ءجامپاي»، ال قايسىسىمەن قىرعي قاباق ەكەنىن ايىرۋ قيىنعا سوقپايدى. بۇرىندارى گازەتتىڭ قىرىنا ىلىككەن اكىمدەر مەن مينيسترلەر از بولعان جوق. قوساق اراسىندا كەتكەندەر قاتارىندا   ەل الدىنداعى ەڭبەكتەرىمەن ابىرويعا جەتكەن گۇلشارا ابدىقالىقوۆا، بەردىبەك ساپارباەۆ، قايرات كەلىمبەتوۆ سىندى ەسىمدەر دە كەزدەسەدى. بۇل ءتىزىمدى ۇزىنسونار ەتىپ سوزۋعا دا بولادى. ءبىر قاراعاندا ءبىرتالاي اكىم مەن مينيستر بيگەلدى مىرزانىڭ قاس دۇشپانى ەكەن دەپ ويلاپ قالاسىڭ. بۇل ءوزى قاشان باستالعان ۇدەرىس ەدى. دەي تۇرعانمەن، گابدۋللين مىرزانىڭ  كەزىندە ءوزىنىڭ وپپوزيتسياداعى سەرىكتەستەرىنەن دە وسىلاي «كەك» قايتارعانىن قالىڭ جۇرت ءالى ۇمىتا قويعان جوق بولار. سونىمەن بىرگە «نازارباەۆسىز قازاقستان» دەپ ۇرانداتقانى دا جادىمىزدا. ساياسي ەميگرانت بوپ مۇحيت اسقاندا راسىمەن ەلدىڭ جاناشىرى دەگەندەر دە بولعان. سوڭى نە بولدى؟ ەلگە امان-ەسەن ورالىپ كەۋدەسىنە وردەن، مەدال تاعىپ، «كورگەن تەپەرىشىنىڭ» قايتىمىنا بۇگىنگى ءوزى باسقارىپ وتىرعان گازەتتى سىيعا الدى. مۇندايدا قاراپايىم ادامنىڭ وزىڭە «بۇل نە قىلعان باتپان قۇيرىق» دەگەن وي كەلمەي مە؟ گازەت ماتەريالدارىنىڭ «جاپتىم جالا، جاقتىم كۇيە» بولىپ ەشبەر دەرەك، دايەكسىز جازىلۋىنىڭ ءوزى رەداكتور ۇستانىمىنىڭ تۇپكى ماقساتىن ايقىندايتىن سەكىلدى. سوندا بيگەلدى مىرزا قاسيەت-كيە قونعان جۋرناليست ماماندىعىن ەجەلگى ءبىرىنشى كاسىپ قاتارىنا قوسقىسى كەلە مە؟

ءشارىپحان قايسار

Abai.kz