سەمەيگە بارعان العاشقى ساپارىن وبلىس اكىمى دانيال احمەتوۆ جەتى بىردەي جىلۋ قازاندىعىنىڭ تەحنيكالىق جاعدايى مەن جۇمىسىن قاداعالاپ، جەو-1 جىلۋ كوزىن قايتا قالپىنا كەلتىرۋ بارىسىمەن تانىسۋدان باستادى. سول جاعالاۋ تۇرعىندارىنىڭ 70 پايىزىن جانە بىرنەشە ماڭىزدى الەۋمەتتىك نىسانداردى جىلۋمەن قامتىپ تۇرعان جەو- 1-دە بۇرىنعى ەسكى قازاندىقتار تۇگەلدەي اۋىستىرىلىپ، جاڭالارى قويىلىپتى.

جوندەۋ جۇمىستارىنا مەملەكەت قازىناسىنان 24 ميل- ليارد 365 ميلليون تەڭگە بولىنگەن-ءدى. – الدىمەن بىزگە جەو-1 قۋاتى قانشاعا جەتەتىنىن، بۇل كاسىپورىن 2025 جىلعا دەيىن وسى جۇمىس قۋاتىمەن ەنەرگيا وندىرە الا ما، سونى انىقتاپ الۋ كەرەك. جانە مۇنشا جۇكتەمەنى قالانىڭ جىلۋ جەلىلەرى كوتەرە الا ما؟ وسى جاعىن زەرتتەپ، زەردەلەۋ كەرەك. بۇل ساۋالدارعا جاۋاپ بەرۋ ءۇشىن ءبىر ايدىڭ ىشىندە قالانىڭ ينفراقۇرىلىم جەلىلەرىن دامىتۋدىڭ 2025 جىلعا دەيىنگى جوسپارىن ازىرلەۋ قاجەت. سوندا عانا تۇتىنۋشىلاردى ۇزاق ۋاقىت جىلۋمەن، ىستىق سۋمەن الاڭسىز قامتي الامىز. بولاشاقتا قازاندىقتاردى وزىق شەتەلدىك تەحنولوگيالارمەن جاساقتاۋدى جالعاستىرا بەرگەن دۇرىس. ەلباسى جولداۋىندا 2025 جىلعا دەيىن تۇرعىن ءۇي- كوممۋنالدىق شارۋاشىلىعىنا قوماقتى قاراجات بولەتىندىگىن ايتتى. سوندىقتان قازىر بىزگە ناقتى نە قاجەت، سونى انىقتاپ الۋىمىز كەرەك، – دەدى وبلىس اكىمى. جەو-1 كاسىپورنى باسشىلىعىنىڭ ايتۋىنشا، ينفلياتسيانىڭ اسەرىنەن جىلۋ كوزىن جاڭعىرتۋ ۇدەرىسى 10 پايىزعا قىمباتتاعان ەكەن. الايدا، ايماق باسشىسى قوسىمشا قارجىلاندىرۋ جونىندە وبلىستىق ماسليحاتقا ءوتىنىم بەرمەي تۇرىپ قىمباتتاۋ سەبەپتەرىن انىقتاپ، ناقتى دەرەكتەرمەن نەگىزدەۋگە قالا اكىمىنە تاپسىرما بەردى. سونداي-اق، جوبانى سالا ماماندارى مۇقيات قاراپ شىعىپ، وزدەرىنىڭ باعاسىن بەرۋى كەرەك. وسىدان كەيىن عانا جاڭعىرتۋدى اياقتاۋ ءۇشىن ءتيىستى قاراجات بولىنبەك. ايتا كەتۋ كەرەك، سەمەيدەگى قازاندىقتاردىڭ قولدانىستا بولعانىنا جارتى عاسىرعا تايادى. ارنايى كوميسسيانىڭ تەكسەرۋ قورىتىندىلارىندا بەلگىلى بولعانداي، جىلۋ جۇيەلەرى 80 پايىزعا توزعان. ءدال وسىنداي قايتا قالپىنا كەلتىرۋ جۇمىستارى تسەمەنت زاۋىتى اۋدانىنداعى رك-1 قازاندىعىندا دا جۇرگىزىلۋدە. جوندەۋ جۇمىستارىنىڭ قۇنى 11 ميلليارد تەڭگەنى قۇراپ وتىر. مۇندا قۋاتتىلىقتى ارتتىرۋ ءۇشىن ءۇش بىردەي قوسىمشا قازاندىق اگرەگات سالىنعان. «تەپلوكوممۋنەنەرگو» مەكەمەسىنىڭ قۋات كوزىنە شىعىنىن ازايتۋ ماقساتىندا جەو-1 مەن رك-1 اۋماعىندا ەكى بۋ گەنەراتورى ورناتىلماق. بۇل ەكەۋىنىڭ قۋاتى 24 مۆت ەنەرگيانى قۇرايدى. «تەپلوكوممۋنەنەرگو» وزىنە قاجەتتى 13 مۆت ەنەرگيانى پايدالانىپ، ارتىلعانىن ساتۋعا مۇمكىندىك تۋادى. – سەمەيدىڭ توزعان جىلۋ جۇيەسى 1999 جىلى قانداي جاعدايدا بولعانى مەنىڭ كوز الدىمدا. ارينە، ەۋروپالىق وندىرۋشىلەر شىعارعان قوندىرعىلاردى ورناتۋدىڭ ارتىقشىلىعى كوپ. ونداي قۇرىلعىلار ءسال قىمباتتاۋ بولعانمەن تيىمدىلىگى جوعارى، ساپالى ءارى ۇنەمدى. سوندىقتان از ۋاقىت ىشىندە بۇكىل شىعىندى اقتايدى، – دەپ ناقتىلادى وبلىس اكىمى. ءوڭىر باسشىسى جىلۋ قازاندىقتارىنىڭ ىشكى-سىرتقى كەلبەتىنە ەرەكشە ءمان بەردى. سۇرقاي تارتىپ تۇرعان نىسانداردىڭ كەسكىن- كەلبەتىن قاتتى سىنعا العان دانيال احمەتوۆ: – مەملەكەتتەن سەمەيدىڭ جىلۋ جۇيەلەرىن جاڭعىرتۋعا قىرۋار قاراجات بولىنۋدە. وسى قاراجاتتى يگەرۋدە، نە بولماسا جوبالاردى ازىرلەگەندە تەك جاڭا قازاندىقتار سالۋمەن نەمەسە قوندىرعىلاردى اۋىستىرۋمەن عانا شەكتەلمەي، عيماراتتاردىڭ ىشكى-سىرتقى كەلبەتىن زامان تالابىنا ساي وزگەرتۋدى دە قاپەردە ۇستاعان ءجون. مۇنى مەردىگەرلەردەن تالاپ ەتۋ كەرەك. نەگە سولاي ىستەمەيسىزدەر؟! بالكىم وسىعان جاۋاپتى ادامداردىڭ مەنشىك ۇيلەرى وسىنداي ايانىشتى كۇيدە ەمەس شىعار؟ ەندەشە، قاراماعىنداعى كاسىپورىنداردىڭ جاعدايىنا دا ءدال سونداي قامقورلىقپەن قاراۋلارى كەرەك، – دەدى. ءبىر كوڭىل قۋانتقانى، قايتا جوندەۋدەن وتكىزىلىپ، جاقىندا عانا ىسكە قوسىلعان «ينتەر- نات №5» قازاندىعى قازىرگى زاماننىڭ تالاپتارىنا تولىقتاي سايكەس كەلۋى. اينالدىرعان ءبىر جارىم جىلعا جەتپەيتىن ۋاقىتتا توزىعى جەتكەن قازاندىقتىڭ ورنىنا «ەنەرگەتيك» ىقشام اۋدانىن جىلۋمەن قامتۋعا الەۋەتتى ءتورت اگرەگاتى بار زاماناۋي عيمارات بوي تۇزەگەن. قازاندىق تۇرعىن اۋداننىڭ بولاشاق تۇتىنۋشىلارىن ەسەپكە الا وتىرىپ سالىنعان. ايتالىق، بۇگىندە اتالمىش ىقشاماۋدان ءۇش گكل/ساع قۋات تۇتىنادى. ال كاسىپورىن وندىرەتىن قۋات كولەمى – 17 گكل/ساع.

كوپ قىزمەت اتقاراتىن تراكتورلار شىعارۋ كەرەك

سەمەيدەگى جۇمىس ساپارىندا وبلىس باسشىسى «سەماز» جشس-ىندە بولىپ، زاۋىتتىڭ ونىمدەرىمەن تانىستى. كاسىپورىن ەلىمىزدىڭ يندۋستريالىق-يننوۆاتسيالىق دامۋ ستراتەگياسىنا سايكەس، ماشينا جاساۋ سالاسىن دامىتۋ ماقساتىندا قۇرىلعان-دى. قۇرىلعان ساتتەن باستاپ رەسپۋبليكانىڭ بارلىق قالالارىمەن جانە بەلارۋس، رەسەي، قىتاي ەلدەرىمەن تىعىز جۇمىس ىستەپ كەلەدى. كاسىپورىن جۇمىسىمەن تانىسىپ شىققان ايماق باسشىسى وبلىستىڭ اۋىلشارۋاشى- لىق قۇرىلىمدارى ءۇشىن ءتيىمدى، جانارمايعا ۇنەمدى، اتقاراتىن قىزمەتتەرى كوپ، ياعني، كوپفۋنكتسيونالدى تراكتورلاردىڭ جاڭا ءتۇرىن شىعارۋدى قولعا الۋ كەرەكتىگىن ايتتى. وسى ورايدا «سەماز» جشس باسشىلىعىنا تەز ارادا ءارتۇرلى ۇسىنىستار مەن دامۋ باعىتتارى ەسكەرىلگەن بيزنەس-جوسپار دايىنداۋعا تاپسىرما بەردى. كاسىپورىندا ەڭبەك ەتىپ جۇرگەن قاراپايىم جۇمىسشىلار دا وبلىس اكىمىنىڭ نازارىنان تىس قالعان جوق. ولارمەن تىلدەسىپ، ەڭبەكاقىسى، جۇمىس كەستەسى تۋرالى سۇراپ، ءبىلدى. بۇدان كەيىن دانيال احمەتوۆ قالانى تازا سۋمەن قامتىپ وتىرعان سۋ تازالاۋ قوندىرعىسىنا ات باسىن تىرەدى. سۋ تازارتۋ عيماراتىنىڭ قۇرىلىسى 2004 جىلى قولعا الىنعانمەن ءالى كۇنگە قولدانىسقا بەرىلمە- گەن. جاعدايدى بايانداعان وبلىستىق قۇرىلىس، ساۋلەت جانە قالا قۇرىلىسى باسقارماسى- نىڭ باسشىسى سەرىك تولەنبەرگەنوۆتىڭ ەسەبىنشە، جۇمىستى اياعىنا دەيىن جەتكىزۋگە قوسىمشا قاراجات كەرەك. ال بۇرىنعى تازارتۋ قوندىرعىلارى ەسكىرگەن. «جامان ايتپاي جاقسى جوق» دەمەكشى، ەگەر تازالاۋ قوندىرعىسى ىستەن شىعاتىن بولسا، وندا بۇكىل قالانىڭ جينالعان قالدىقتارى ەرتىس وزەنىنە اعادى. مەردىگەردىڭ پىكىرىنشە، ديۋكەردى جوندەۋ پروبلەمانى تولىق شەشپەيدى. جاڭادان كوللەكتور ساتىپ الىپ ورناتۋ كەرەك. ونىڭ قۇنى – 500 ملن. تەڭگە. – بۇنىڭ ءبارى حالىقتىڭ قاراجاتىنا ىستەلەتىنىن ۇمىتپاۋ كەرەك. سوندىقتان ءبارىن كەسىپ-ءپىشىپ العان ءجون. الدىمەن قوسۋ-رەتتەۋ جۇمىستارىن جۇرگىزگەن دۇرىس، ويتكەنى، ون جىل جۇرگىزىلگەن ەڭبەك پەن قازىنا قاراجاتى بوسقا كەتپەۋى ءتيىس. ازىرگە مەحانيكالىق تازارتقىشتىڭ كومەگىمەن ىستەي تۇرادى. وسى ارالىقتا قۇرىلعىلاردى جاڭعىرتۋ تۋرالى جاڭا جوبا ازىرلەنسىن. سودان كەيىن بارىپ بيولوگيالىق تازارتۋ جانە باسقا دا جاڭا تەحنولوگيالاردى ەنگىزۋ بويىنشا مەردىگەر كومپانيا جوبالارىن ىسكە اسىراتىن بولادى، – دەدى دانيال احمەتوۆ.

ءبىرىنشى كەزەكتە – بىلىكتىلىك

تۇرعىندارعا ساپالى مەديتسينالىق قىزمەت كورسەتەتىن الەۋمەتتىك مەكەمەنىڭ ءبىرى – وڭىرلىك ونكولوگيالىق ورتالىق. قازىرگى ۋاقىت تالاپتارىنا تولىعىمەن جاۋاپ بەرەتىن، شەتەلدىك وزىق تەحنولوگيالار- مەن جابدىقتالعان ورتالىقتى ارالاپ كورىپ، دارىگەرلەرمەن تىلدەسكەن ايماق باسشىسى ەڭ ءبىرىنشى كوڭىل بولەتىن ماسەلە مامانداردىڭ بىلىكتىلىگىن ارتتىرۋ ەكەنىن ەسكەرتتى. – ورتالىق زاماناۋي مەديتسينالىق قۇرال- جابدىقتارمەن قامتاماسىز ەتىلگەن ەكەن. بۇل وتە دۇرىس. ۋاقىت كوشىنەن قالماۋىمىز كەرەك. الايدا، ءبىز مامانداردىڭ شەتەلدە ءبىلىمىن جەتىلدىرىپ، بىلىكتىلىگىن ارتتىرۋدىڭ وزەكتىلىگىن ۇمىتپاۋىمىز كەرەك. وندا دا ءبىر-ەكى ايعا ەمەس، ەڭ كەمىندە ءبىر، ءبىر جارىم جىلعا وقۋعا جىبەرسەك عانا ناتيجەسى بولا- دى. سونىمەن قاتار، ءبىز قوندىرعىلار ساتىپ اكەلگەندە بازالىق جيىنتىعىمەن عانا الامىز. بۇل ونى تولىق قۋاتتا پايدالانۋعا مۇمكىندىك بەرمەيدى. بىلايشا ايتساق، مۇمكىن بولاتىن 33 زەرتتەۋ امالدارىن جۇرگىزۋدىڭ ورنىنا ستاندارتتى التاۋمەن شەكتەلەمىز. ەۋروپا ەلدەرىندە ءاربىر اۋدان ورتالىعىندا ونكولوگيالىق اۋرۋلاردى انىقتايتىن ماركەرلەر بار، ال بىزدە بۇل جاعى كەمشىن، – دەدى دانيال احمەتوۆ. كورەي ينۆەستورلارىنىڭ قاتىسۋىمەن سالىناتىن سەمەيدەگى وڭالتۋ ورتالىعى تۋرالى اقپاراتتار ۇسىنعان وبلىستىق دەنساۋلىق ساقتاۋ باسقارماسىنىڭ باسشىسى ۆاديم وۆسياننيكوۆ بۇل جوبانىڭ قۇنى 16 ميلليارد تەڭگەنى قۇرايتىنىن ايتتى. وڭىردەگى باس دارىگەردىڭ ايتۋىنشا، ورتالىق 400 ورىنعا ارنالماق. اتالمىش نىسان ىسكە قوسىلعان جاعدايدا قالانىڭ عانا ەمەس، بۇكىل ءوڭىرىمىزدىڭ مەديتسينالىق الەۋەتى ودان ارى كۇشەيە تۇسەتىنى ءسوزسىز. بىراق شەشىلۋى كەزەك كۇتتىرمەيتىن ماسەلەلەر بار. ول – رەابيليتولوگ-ماماندار تاپشىلىعى. تۇيتكىلدىڭ ءتۇيىنىن شەشۋ ءۇشىن جەرگىلىكتى ۋنيۆەرسيتەتتە سالالىق فاكۋلتەت اشۋ جوسپارلانعان.

قۇس فابريكاسىنىڭ شارۋاسى شاتقاياقتاپ تۇر

بۇدان كەيىن ايماق باسشىسى سەمەي قالاسىنىڭ شۇعاەۆ كوشەسى، 159 مەكەنجايىندا سالىنىپ جاتقان شاعىن وتباسىلارعا ارنالعان 10 قاباتتى جاتاقحانا قۇرىلىسىنا توقتادى. وبلىستىق قۇرىلىس باسقارماسى- نىڭ باسشىسى سەرىك تولەنبەرگەنوۆتىڭ سوزىنە قاراعاندا، جاڭا باسپانالار قازاقستان يپوتەكالىق كومپانياسى ارقىلى بەرىلمەك. وعان قوسا باسقارما باسشىسى قالاداعى تاعى ەكى يەسىز تۇرعىن ءۇي كۇردەلى جوندەۋدەن وتكىزىلىپ، وسى باعدارلاما (قيك) ارقىلى، ياعني، كەيىنگى ساتىپ الۋ قۇقىعىمەن حالىققا ۇسىنىلاتىنىن جەتكىزدى. سونداي-اق، ول باس جوسپار بويىنشا بولاشاقتا سەمەيدە ءۇش بىردەي ىقشاماۋدان بوي كوتەرەتىنىن ەسكە سالدى. وبلىس باسشىسى دانيال احمەتوۆ شاھارداعى رەتسىز جۇرگىزىلگەن قۇرىلىستاردى سىنعا الا وتىرىپ: – بەيبەرەكەت سالىنعان ۇيلەر، ەشبىر ۇيلەسىمى جوق ىقشاماۋداندار قالانىڭ كوركىن قاشىرىپ قانا قويماي، باسقا ماسەلەلەر تۋعىزادى. سوندىقتان قانداي دا ءبىر تۇرعىن اۋدان سالماس بۇرىن ادامداردىڭ الەۋمەتتىك سالاداعى سۇرانىسىن ناقتى زەرتتەپ بارىپ، الەمدىك قالاقۇرىلىسى تاجىريبەسىنە سايكەس جۇرگىزۋ كەرەك، – دەپ ءتۇسىندىردى. جۇمىس ساپارى بارىسىندا ايماق باسشىسى تەرى-بىلعارى زاۋىتىندا، قۇس فابريكاسىندا جانە تۇيەمويناق ارالىندا بولدى. «ولىمنەن دە كۇشتى» مەموريال كەشەنى ورنالاسقان ارالعا ات باسىن بۇرىپ، قالا تۇرعىندارى مەن قوناقتارى كوپ قاتىنايتىن ورىننىڭ جاعدايىن كوزبەن كورگەن دانيال احمەتوۆ قالا اكىمى ايبەك كارىموۆكە بۇل جەردى ودان ارى قاراي دامىتىپ، اباتتاندىرۋعا تاپسىرما بەردى. كۇرمەۋى شەشىلمەگەن ماسەلەلەرى كوپ كاسىپورىنداردىڭ قاتارىنا ەنگەن قالا شەتىندەگى قۇس فابريكاسىنىڭ قارىزى 420 ميلليون تەڭگەدەن اسىپ جىعىلادى ەكەن. فابريكانىڭ جاڭادان ساتىپ الىپ ورناتقان قوندىرعىلارى جۇمىس ىستەمەي بوس تۇر. توركوزدەردە ءتىرى تاۋىق كورىنبەيدى. «ەرتىس» اكك توراعاسى ماناربەك ساپارعاليەۆتىڭ ەسەبىنە جۇگىنسەك، اتالعان كورپوراتسيا بۇل جوباعا 147 ميلليون تەڭگە قاراجات ءبولىپتى. ونىڭ ۇستىنە كاسىپكەر قالتاسىنان تاعى 150 ميلليون تەڭگە قوسىپتى. بىراق مۇنىڭ ءوزى جەتكىلىكسىز بولعان. – كاسىپورىندى تىعىرىقتان الىپ شىعۋعا بولادى، ارينە. ايتالىق، ىسكە مەملەكەت ارالاسادى دا 400 ميلليون تەڭگە قاراجات بولەدى. بۇل بىراق ءتيىمدى شەشىم ەمەس. سول سەبەپتى وزگە جولداردىڭ ءبارىن قاراستىرىپ، زەردەلەگەن دۇرىس. «ەرتىس» اكك تاراپىنان نە ىستەۋگە بولاتىنىن، جەكە ينۆەستورلار تابىلا قالعان جاعدايدا نە ىستەۋ كەرەكتىگىن تۇگەل ويلاستىرۋ كەرەك. قۇس شارۋاشىلىعى بۇل پايدالى بيزنەس، ونى قولداۋىمىز كەرەك، – دەدى دانيال احمەتوۆ.

جۇرت كوكەيىندەگى ماسەلەلەر قوزعالدى

جۇمىس ساپارىنىڭ سوڭىندا وبلىس اكىمى Cەمەي قالالىق ءماسليحاتىنىڭ دەپۋتاتتارىمەن كەزدەستى. كەزدەسۋدە قالا باسشىسى ايبەك كارىموۆ وتكەن توعىز ايداعى سەمەيدىڭ الەۋمەتتىك-ەكونوميكالىق دامۋ احۋالىنان اقپارات بەردى. ال حالىق قالاۋلىلارى جۇرتتىڭ كوكەيىندە جۇرگەن ساۋالداردى وبلىس جانە قالا باسشىلارىنا جەتكىزدى. – بۇگىنگى ساپار بارىسىندا سەمەيدەگى جىلۋ ەنەرگەتيكالىق نىسانداردا بولدىم، ءبىرسىپىرا كاسىپورىنداردىڭ جاعدايىمەن تانىستىم. ولاردىڭ ىشىندە بولاشاعى زور كاسىپورىندارمەن قاتار شەشىمىن كۇتكەن پروبلەمالارى بار نىساندار دا جوق ەمەس. وبلىس باسشىلىعى تاراپىنان ولارعا كوڭىل بولىنەدى، قولداۋ كورسەتىلەدى. ماسەلەلەردى ءبارىمىز بىرلەسە وتىرىپ شەشۋىمىز كەرەك. بۇعان دەپۋتاتتار دا اتسالىسقانى ابزال، – دەگەن ايماق باسشىسى دانيال احمەتوۆ دەپۋتاتتارمەن بىرگە قالا اكىمىنىڭ بايانداماسىن تىڭدادى. سەمەي قالاسى اكىمىنىڭ كەلتىرگەن مالىمەتتەرىنە سۇيەنسەك، نەگىزگى ماسەلەلەردىڭ دەنى شەشىمىن تاپقان. ماسەلەن، قالادا قازىر جىلۋمەن قامتۋدا ەشقانداي پروبلەما جوق. قازاندىقتاردىڭ بارلىعى قالىپتى جۇمىس ىستەۋدە، وتىن قورى جەتكىلىكتى. تۇرعىندار تۇتىناتىن ءبىرىنشى كەزەكتەگى ازىق-تۇلىك باعاسىن تۇراقتاندىرۋ، حالىقتى ارزان تاۋارلارمەن كەلەسى جازعا دەيىن قامتاماسىز ەتۋ ماقساتىندا اۋىلشارۋاشىلىق ونىمدەرىنىڭ قورى قۇرىلعان. قوردا التى اي قىسقا جەتەتىن ءونىم بار قازىر. سونىمەن قاتار، ايبەك كارىموۆ وز بايانداماسىندا باستى فۋنكتسيونالدىق ايماقتار كورسەتىلگەن قالانىڭ باس جوسپارىنا ءمان بەرىپ، بولاشاقتا اشىلاتىن ءۇش كولىك-لوگيستيكالىق كاسىپورىن مەن تۋريستىك ورتالىق تۋرالى ايتتى. دەپۋتاتتار تاراپىنان قويىلعان ساۋالداردىڭ ىشىندە جەكە تۇرعىن ءۇي قۇرىلىسىن جۇرگىزۋ ءۇشىن جەر تەلىمدەرىن ءبولۋ، بالاباقشا كەزەگىن ازايتۋ، بيۋدجەتتى قىسقارتۋ جانە باسقا ماسەلەلەر بولدى. قالا اكىمىنىڭ اتقارعان جۇمىسىنا كوڭىلى تولمايتىندار دا بولدى. الايدا، ايماق باسشىسى دەپۋتاتتارعا سىننىڭ نەگىزدى جانە سىندارلى بولۋ كەرەكتىگىن ەسكەرتتى. – ارينە، اتقارۋشى بيلىكتىڭ جۇمىسىندا تەك جاقسى كورسەتكىشتەرمەن قوسا كەمشىلىكتەر دە كەزدەسەدى. دەي تۇرعانمەن، كەمشىلىكتەردى سىناعان كەزدە ورىندى نەگىزدەرگە سۇيەنگەن دۇرىس. سوندا عانا ونىڭ ناتيجەسى بولماق. بۇگىن مەن قالا اكىمىنە بىرقاتار تاپسىرمالار جۇكتەدىم. اتاپ ايتقاندا، قالانىڭ بۇكىل ينفراقۇرىلىمىن ساراپتامادان وتكىزىپ، وزگەرتۋلەر ەنگىزۋ تۋرالى. ماسەلەن، بۇگىنگى كۇنى توزىعى جەتكەن جىلۋمەن، سۋمەن، ەلەكتر ەنەرگياسىمەن قامتاماسىز ەتۋ جۇيەلەرى قۋات كوزىن نەمەسە جىلۋدى تولىق پايدالانۋعا مۇمكىندىك بەرمەي وتىر. ودان بولەك تۇرعىن ءۇي قۇرىلىسى مەن اباتتاندىرۋ بويىنشا كەشەندى جوسپار ازىرلەۋ جونىندە مىندەت قويىلدى، – دەپ ناقتىلاعان وبلىس اكىمى دانيال احمەتوۆ اتالعان تاپسىرمالاردى تاس ءتۇيىن ورىنداۋ ءۇشىن ايبەك كارىموۆكە بەلگىلى ءبىر ۋاقىت بەرىلگەنىن ەسكە سالدى. كەزدەسۋ سوڭىندا ەلباسىنىڭ «نۇرلى جول – بولاشاققا باستار جول» اتتى جولداۋىندا كورسەتىلگەن باسىم باعىتتارعا توقتالعان ءوڭىر باسشىسى ماڭىزدى باعدارلامانى ىسكە اسىرۋدا ءاربىر قازاقستاندىق ءوز ۇلەسىن قوسۋى كەرەكتىگىن قاپەرگە سالدى. پرەزيدەنت جولداۋى ەلىمىزدىڭ الداعى جىلدارداعى دامۋ بولاشاعىن ايقىنداپ بەرگەن قۇندى قۇجات ەكەنىن ايتتى.

راۋشان نۇعمانبەكوۆا،

سەرىك ءابىلحان.

شىعىس قازاقستان وبلىسى.

اباي.kz