مادەنيەت ءمينيسترىنىڭ «مادەنيەتى»
2008 جىلعى پەكين، 2012 جىلعى لوندون وليمپياداسىنىڭ چەمپيونى، 2007, 2008, 2011 جىلعى الەم چەمپيوناتتارىنىڭ چەمپيونى يليا يلين رەكورد جاڭارتىپ، الەم چەمپيونىنىڭ التىن تۇعىرىنا تاعى دا كوتەرىلدى.
- جاتتىعۋ كەزدەرىندە سەرپە كوتەرۋدە 245 كيلوگرامدى وڭاي الىپ جۇرگەنمىن. سوندىقتان سەرپە كوتەرۋدە سەنىمدى بولدىم. وسى جولى 239 كيلوگرامدى الا بەرگەندە، تەحنيكالىق قاتەلىك جىبەرىپ قويدىم. ال 242 كيلوگرامدى كوتەرۋ — ۇلكەن جەتىستىك. بۇل جەتىستىگىممەن توقتاپ قالمايمىن. ەندى ءبىراز ءۇزىلىس جاساپ تىنىعامىن دا لوندونعا بارىپ ۇيرەنىپ جۇرگەن اعىلشىن ءتىلىن دامىتىپ كەلەمىن. سوسىن ريو-دە-جانەيروداعى وليمپياداعا دايىندىقتى باستايمىن،- دەدى يلين جارىس سوڭىندا جۋرناليستەرگە بەرگەن جەدەل سۇحباتىندا.
الماتىداعى بالاۋان شولاق اتىنداعى سپورت كەشەنىندە ءوتىپ جاتقان الەم چەمپيوناتىندا يلياعا دەيىن قازاقستان سپورتشىلارىنان ءزۇلفيا چينشانلو، جاسۇلان قىدىرباەۆ — التىن، جازيرا جاپپارقۇل، ۆلاديمير سەدوۆ — كۇمىس العان ەدى. الەم چەمپيوناتى بۇگىن، 16 قاراشادا اياقتالادى.
يليا ءيليندى جەڭىسىنەن كەيىن بىردەن تەلەفونمەن پرەزيدەنت نۇرسۇلتان نازارباەۆ قۇتتىقتادى.
- ءسىزدىڭ تاپسىرماڭىز ورىندالدى، پرەزيدەنت مىرزا، - دەدى يلين جۇرەكجاردى قۋانىشىن جاسىرا الماي.
يليانىڭ كەزەكتى جەڭىسىنە ەلىمىزدە قۋانباعان ادام كەمدە كەم شىعار. ءبارىمىز تۇرىپ قول سوقتىق. يليانىڭ جەڭىسىن ايگىلەپ اسقاقتاعان ءانۇرانىمىزدى شىرقاپ، تەبىرەندىك. مىنە، ءدال وسى كەزدە اسا ءبىر ىڭعايسىز جاعداي كورىنىس تاپتى. زىلتەمىرشىمىز 242 كگ-دى باعىندىرىپ، جاتتىقتىرۋشىلار ورتاسىنا مەرەيى تاسىپ ورالعاندا ارسالاڭداپ قاسىنا جەتىپ بارعان مادەنيەت جانە سپورت ءمينيسترى ارىستانبەك مۇحامەديۇلى قازاق ەلىنىڭ ءانۇرانى اسقاقتاپ، كوك بايراعى كوتەرىلگەن كەزدە دە قالتا تەلەفونىنا قايتا-قايتا قاراعىشتاپ، قىبى كەتىپ تۇرعان. شاماسى، ار جاعىندا ءانۇراندى ۇرمايتىن بىرەۋ قوڭىراۋ شالىپ قويماسا كەرەك، كەنەت ول تەلەفونىن ءيليننىڭ قولىنا ۇستاتا قويدى. يليانىڭ انۇرانعا دەگەن قۇرمەتى شەكسىز ەكەن، مادەنيەت ءمينيسترىنىڭ ءمىنىن جاۋىپ، ءانۇراندى ارىقاراي شىرقاي بەردى.
اتاسىنىڭ اتىنان باس تارتقان مينيستر وزىنە تىكەلەي سوققان قوڭىراۋ يەسىنەن قورقاتىندىعى سونداي – ءتىپتى اكەسىنىڭ دە اتىن ۇمىتىپ قالا جازداعان سياقتى. الدە «قورققان مەن قۋانعان بىردەي» دەمەكشى، ءمينيستىرىمىزدىڭ قۋانعان ءتۇرى وسى بولدى ما ەكەن. ايتەۋىر، ساسىپ-سابدىراپ، الابۇرتىپ ۇيالى تەلەفونىنا «ۇرلانىپ» قاراي بەردى. ءمينيستردىڭ قولبالاشا قولدى-اياققا تۇرماي زىرلاعانى، جانۇشىرا جۇگىرىپ يليانىڭ قۇلاعىنا تەلەفونىن توسا بەرگەنى كورەرمەن قاۋىمدى بەي-جاي قالدىرمادى، الەۋمەتتىك جەلىلەردە اجەپتەۋىر اڭگىمەگە جۇك بولىپ ۇلگەردى. ءاج-دەگى جازبالاردىڭ بىرىندە، مىسالى، اقبەرەن ەلگەزەك بىلاي دەپ جازدى:
- گرەتسيانىڭ مادەنيەت ءمينيسترى مۇراجايعا ۇرى تۇسكەنى ءۇشىن ءوز ەركىمەن قىزمەتىنەن كەتتى، يتاليانىڭ مادەنيەت ءمينيسترى ءوز ەلىنىڭ ءان مارافونىندا ۇتىلىپ قالعانى ءۇشىن ءوز ەركىمەن قىزمەتىنەن كەتتى، ۇلىبريتانيانىڭ مادەنيەت ءمينيسترى دەكلاراتسياسىندا 150 مىڭ دوللارعا باعالانعان ءۇيىنىڭ ماڭايىندا كوتەرىلگەن شۋدىڭ ناتيجەسىندە ءوز ەركىمەن قىزمەتىنەن كەتكەن...
ءبىزدىڭ ۇعىمعا بولماشى بوپ كورىنەتىن وسىنداي "قىلمىستاردىڭ" قاسىندا ءوز مەملەكەتىنىڭ ەڭ كيەلى رامىزدەرىنىڭ ءبىرى - ءانۇراندى سىيلاماعان مينيستر نە ىستەۋ كەرەك؟
جو-جوق، ول وتستاۆكاعا ءوز ەركىمەن كەتپەيدى. كۇتپەڭىزدەر. پرەزيدەنت اتا زاڭنىڭ كەپىلى رەتىندە، مەملەكەتتىك نىشانداردىڭ قورعاۋشىسى رەتىندە ەلدىڭ ابىرويىن ايرانداي توككەن ءمينيستردى ءوزى ورنىنان الىپ تاستاۋ كەرەك. انۇرانعا پىسقىرماعان ادام ەلگە تۇكىردى دەگەن ءسوز. بۇل بارىپ تۇرعان كورگەنسىزدىك، ءتىپتى قىلمىس. مادەنيەت ءمينيسترى وسىنداي ەلدى الەم ەندى جابايى، مادەنيەتسىز دەپ قابىلداسا، وبال جوق بىزگە. وكىنىشتى. ۇيات.
Abai.kz
