بۇرىنىراقتا «بالەنشە دەگەن جوعارى لاۋازىمدىنى جۇمىسىنان الىپ تاستادى، تۇتقىندادى، سوتتادى» دەگەن حاباردى ەستىگەندە «تەك مايدا- شۇيدەلەرگە عانا ەمەس دە ۇلكەن شەن يەلەرىنە دە ءتارتىپ بەرىپ جاتىر ەكەن» دەپ قۋانباعانىممەن، كوڭىلىمە تولىپ وتىراتىن ەدى. ال قازىر وسىندايدى ەستىگەندە كوڭىلىمە الاڭ كىرە باستايدى. ارينە، ءار ادام سونىڭ ىشىندە ۇلكەن لاۋازىم يەسى قاتە-كىناراتتارى ءۇشىن جاۋاپ بەرۋى ءتيىس. بىراق بىرىنەن سوڭ-ءبىرى شاتىلىپ جاتقان باسشىلار قاتارىن كورىپ ء«اي، وسىلاردى قاتەلەرى ءۇشىن جاۋاپقا تارتىپ جاتقان جوق-اۋ. باسقا ءبىر گاپ جوق پا؟ ەلدىڭ سىرتقى-ىشكى جاۋلارىنىڭ تاپسىرىسى ەمەس پە؟» دەگەن ءبىر-ەكى اۋىز سوزبەن تۇسىندىرە المايتىن كۇمان كوڭىلىمدە كولبەڭدەيدى دە تۇرادى. ونىڭ ۇستىنە، باق بەتىندەگى اقپاراتتارعا سۇيەنە وتىرىپ (تومەندەگى دەرەكتەردى، نەگىزىنەن، اباي.كز پورتالىنان ءسوزىن وزگەرتپەي دەرلىك الدىم) وسى «جازىپ-جاڭىلدى» دەگەندەردىڭ بويىنان ءبىر ورتاق قاسيەت تاپقاندايمىن، ول - بۇل لاۋازىم يەلەرىنىڭ وزگە ارىپتەستەرىنە قاراعاندا ۇلتجاندىلىعى. ءسوزىم قۇرعاق بولماس ءۇشىن ەكى-ءۇش دالەل-دايەك كەلتىرىپ كورەيىن. مىسالى، پرەمەر ءمينيستردىڭ ورنىتاعىنان تايعان، قازىر بولاشاعى بۇلىڭعىرلاۋ بولىپ تۇرعان سەرىك احمەتوۆ پرەمەر-مينيستر بولىپ تۇرعان كەزدە ءۇش ەلدىڭ اراسىنداعى كەدەندىك وداقتىڭ كەيبىر قارىم-قاتىناسى مەن الىس-بەرىسىنە قارسى شىعىپ وتىرعان-مىس، ەۋرازيالىق ەكونوميكالىق وداقتىڭ كەلىسسوزدەرىنە دە سالعىرتتاۋ قاراعان. بۇل راس بولسا ەلىنىڭ بولاشاعى ءۇشىن الاڭدايتىن بۇنداي ازاماتقا «اينالايىن»-نان باسقا نە ايتۋعا بولادى.
تاۋەلسىزدىڭ كۇنىن كۇنى بۇرىن كولەگەيلەپ تۇراتىن جاڭا جىلدى شىرشانى تىم ەرتە تويلاۋدان تىيعان، ەسەسىنە ناۋرىزدى دۇرىلدەتىپ تويلاتقان، كەيبىر اكىمدەردەي ءورىستىلدى بلوگەرلەردى ەمەس قازاقتىلدى بلوگگەرلەردى جيناپ، ەكى كۇن بويى مەيمان قىلعان باۋىرجان ابدىشەۆكە ءسۇيسىنىپ ءجۇر ەدىك. قازىر بۇل اعامىزدىڭ باسى ءىستى بولىپ جاتىر. 
اسكەري شەرۋدى باسقارعان گەنەرالداردىڭ ىشىندە بۇيرىقتاردى قازاقشا بەرۋمەن ەرەكشەلەنگەن نۇرلان ايتمانۇلى جولامانوۆقا دا اۋىر ايىپ تاعىلۋدا. 
بالكي، ءبارى مەن ويلاعانداي ەمەس، بۇل جازا باسقان-جاڭىلىسقان ازاماتتاردىڭ باسىنان ءوتىپ جاتقان جايت تا شىعار. ولاي بولسا زاڭنىڭ اتى زاڭ، ارينە. بىراق، قالاي بولعاندا دا، ىشتەگى كۇماندى سىرتقا شىعارىپ، ساياساتتان حابارى بار زامانداستارىمنىڭ تالقىسىنا سالعاندى ءجون كوردىم. سەبەبى، ۇلتجاندى شەنەۋنىكتەرگە تاعىلىپ جاتقان ايىپ زاڭسىز بولسا، ولارعا قوعام بولىپ اراشا ءتۇسۋ ازاماتتىق مىندەتىمىز ەمەس پە؟ ءتىپتى، ازدى-كوپتى كىناراتتارى بولعاننىڭ وزىندە، ولاردىڭ ەل الدىنداعى ەڭبەگى ەسكەرىلسە ەكەن دەپ تە ويلايمىن. مەن ءۇشىن بۇل اتى اتالعان ازاماتتاردىڭ ۇلت، رۋ بەلگىلەرى ماڭىزدى ەمەس. ەگەر مەملەكەتشىل وزگە ۇلت وكىلى باسى داۋعا ءىلىنىپ جاتسا دا (ىلىنبەي-اق تا قويسىن!) وسىلاي سوزبەن بولسا دا دەمەۋ بىلدىرۋگە تىرىسار ەدىم. سالىستىرمالى تۇردە بولسا دا ۇلتجاندى، مەملەكەتشىل باۋىرلارىمىزدىڭ باسىنا قارا بۇل ءۇيىرىلىپ جاتقاندا، ۇندەمەي وتىرا المادىم، ايىپ ەتپەڭىزدەر...

(نۇرلان ءسادىردىڭ فەيسبۋكتەگى پاراقشاسىنان)