ەنەرگەتيكا مينيسترلىگى بەنزين قورىن قۇرماق. ءسويتىپ قات تاۋارعا اينالعان اي 92 ء–نى كوپ كولەمدە جيناپ الماقشى. وسى ارقىلى تاپشىلىقتى تۇبەگەيلى جويماق ويدا. جاڭا جىلعا دەيىن ەلىمىزگە اي-92 ماركالى 272 مىڭ توننا بەنزين جەتكىزىلەدى دەپ جوسپارلانىپ وتىر دەپ حابارلايدى Nur.kz جاڭالىقتارى كتك ارناسىنا سىلتەمە جاساپ.

بۇل وتىن ءتۇرى بۇعان دەيىن ءازىربايجان مەن تۇركىمەنستاننان تاسىمالدانسا، ەندى قىتايدان دا الىنباق. سەبەبى، جوندەۋگە توقتاعان ەلدەگى 3 بىردەي مۇناي وڭدەۋ زاۋىتتارىن جاڭعىرۋ مەرزىمى كوكتەمگە قالعان. ءتىپتى، زاۋىتتار ءجۇز پايىزعا جۇمىس ىستەگەننىڭ وزىندە ەلدەگى جانارماي تاپشىلىعى مۇلدەم جويىلمايدى . دەگەنمەن، قازىر ەلىمىزدىڭ شەكارالارىندا جانارماي ونىمدەرىنىڭ زاڭسىز شىعۋىنا جول بەرمەۋ ءۇشىن باقىلاۋ شارالارى دا كۇشەيتىلگەن.

ال، ەنەرگەتيكا ءمينيسترى ۆلاديمير شكولنيكتىڭ سوزىنە سەنسەك، جانار-جاعارماي نارىعىنداعى احۋال تۇراقتالعان. بەنزيندى ۇنەمدەۋ ءۇشىن جۇرتتى اۆتوبۋسقا مىنۋگە شاقىرعان مينيستر، باستاماسىنىڭ اياقسىز قالعانىنا رەنجىمەيتىنىن ايتقان.

"كوشەدە ماشينا ازايعانىن كورگەن جوقپىز. ەلدىڭ ءبارى ءالى ۇلكەن كولىكتەرىمەن زۋىلداپ ءجۇر. اي-92 بۇكىل جەردە بار. ءبىز مۇنى قاداعالاپ وتىرمىز. كوپ وبلىستا ماي قۇيۋ بەكەتتەرىندەگى شەكتەۋلەر الىنىپ تاستالدى", - دەدى مينيستر ءوز سوزىندە.

اباي-اقپارات