قازاق ادەبيەتىنىڭ التىن قورىنا ەنگەن  ولمەس تۋىندىلار اۆتورى، جاستاردىڭ سۇيىكتى جازۋشىسى ساتتار ەرۋباەۆ جيناعىنىڭ جاڭا باسىلىمى (ساتتار ەرۋباەۆ. شىعارمالارى. قۇراستىرعاندار ب.حابدينا، ب.قويشىباەۆ. «رۋح بگ» باسپاسى، 2014) جاقىندا الماتىدا جارىق كوردى. كىتاپ ومىردەن قىرشىن كەتكەن اقىن، جازۋشى، پۋبليتسيست س.ەرۋباەۆتىڭ تۋعانىنا 100 جىل تولۋىنا وراي شىعارىلعان.

جيناققا ساتتار ەرۋباەۆتىڭ ايگىلى «مەنىڭ قۇرداستارىم» رومانى، ولەڭ-جىرلارى، اڭگىمەلەرى، سىقاقتارى، سىني جانە پۋبليتسيستيكالىق ماقالالارى ەنگەن. «وتكەن عاسىردىڭ 40-شى جىلدارىنان بەرى جاستاردىڭ الدەنەشە بۋىنىن رۋحاني لاززاتقا بولەپ كەلە جاتقان رومان، باللادا، نوۆەللالاردىڭ ماتىندەرى العاشقى باسىلىمدارمەن سالىستىرىلىپ، كەيبىر وزگەرىسكە ۇشىراعان تۇستارى تۇزەتىلىپ بەرىلدى، – دەيدى «رۋح بگ» باسپاسىنىڭ ديرەكتورى، باسپا جانە پوليگرافيا ءىسىنىڭ قايراتكەرى بالجان حابدينا. – حالقىمىزدىڭ الدەنەشە ۇرپاعىنىڭ سۇيىكتى اقىنى جانە جازۋشىسى ساتتار ەرۋباەۆتى بۇگىنگى تاۋەلسىزدىك جاستارىمەن ەتەنە باۋىرلاستىرۋدى ماقسات ەتكەن ەدىك، سول سەبەپتى جيناقتى جاڭاشا قۇراستىرا وتىرىپ، ساتتار بەينەسىن بۇگىنگى قىز-جىگىتكە جاقىنىراق تانىستىرۋ ءۇشىن، ونىڭ كوپ جىلدارعى قاتارداعى وقىرمانىنىڭ وزىندىك ساتتارتانۋشىلىق جۇمىستارىن وقىرمان نازارىنا قوسا ۇسىنۋدى ءجون كوردىك».

كىتاپ قر مادەنيەت مينيسترلىگىنىڭ «ادەبيەتتىڭ الەۋمەتتىك ماڭىزدى تۇرلەرىن باسىپ شىعارۋ» باعدارلاماسى بويىنشا جارىق كورىپ وتىر.

اباي-اقپارات