جۋرناليستەردى باسپانامەن قامتاماسىز ەتۋ كەزەك كۇتتىرمەس ساياسي-الەۋمەتتىك ماڭىزدى ماسەلە. بۇگىن پارلامەنت سەناتىنىڭ جالپى وتىرىسىندا ۇكىمەت باسشىسىنىڭ اتىنا ساۋال جولداعان سەناتور نۇرلان ورازالين وسى ماسەلەنى كوتەردى دەپ حابارلايدى قازاقپارات.

«قازاقستان جۇرتشىلىعىنا رۋحاني قىزمەت كورسەتىپ، رەسپۋبليكا كولەمىندە بولىپ جاتقان جاڭالىقتار مەن اقپاراتتاردىڭ دەر كەزىندە تاراۋىنا، سونىمەن قاتار، ساعات-ءسات سايىن وزگەرىپ تۇرعان جاھاندانۋ جاعدايىنداعى ءار الۋان دۇنيەلىك قۇبىلىستاردى تانۋ، تالداۋ سيپاتىندا قوماقتى مىندەت اتقارىپ جۇرگەن جۋرناليستەر قاۋىمىنىڭ قوعامداعى ورنى ارتا تۇسۋدە. بۇل دالەلسىز شىندىق»، - دەيدى دەپۋتات ن. ورازالين. ونىڭ ايتۋىنشا، قازىر ەلىمىزدە 252 ەلەكتروندىق باق، 146 تەلەراديو كومپانياسى، 88 تەلەكومپانيا، 58 راديوكومپانيا، 98 كابەلدى وپەراتور، 1364 گازەت، 522 جۇرنال، 64 اقپاراتتىق اگەنتتىك جۇمىس جاسايدى. بۇل رەتتە دەپۋتات وسىنشاما اقپارات قۇرالدارىندا قانشا جۋرناليست جۇمىس ىستەيتىندىگى، ولاردىڭ قانشالىقتى الەۋمەتتىك قامسىزداندىرىلعانى، باسپانامەن قانشاسى قامتىلعانى تۋرالى اقپاراتتىڭ جوق ەكەندىگىن اتاپ ءوتتى.

«تاۋەلسىز قازاقستاننىڭ ىنتىماعى مەن بىرلىگىنە، ەلباسى جۇرگىزىپ وتىرعان رەفورمالاردىڭ جۇزەگە اسۋىنا، ەل ومىرىندەگى ساياسي تۇراقتىلىق پەن رۋحاني تۇلەۋدىڭ باياندى بولۋىنا ءوز ۇلەسىن قوسىپ كەلە جاتقان قالامگەر قاۋىمىن، سول ساناتتاعى باق وكىلدەرىن، اسىرەسە مەملەكەتتىك ارنالاردا قىزمەت جاسايتىن جاس جۋرناليستەردى باسپانامەن قامتاماسىز ەتۋ كەزەك كۇتتىرمەس ساياسي-الەۋمەتتىك ماڭىزدى ماسەلەگە اينالىپ وتىر»، - دەدى سەناتور.

سونىمەن قاتار، ن. ورازالين كوپشىلىك جۋرناليستەردىڭ، سونىڭ ىشىندە جاس وتباسىن قۇرعان قالامگەرلەردىڭ تۇرمىستىق-الەۋمەتتىك جاعدايى كوڭىل كونشىرلىك ەمەس ەكەنىن، ولاردىڭ باسىم بولىگى پاتەر جالداپ تۇراتىنىن العا تارتتى.

«جالعىز جۋرناليستەر عانا ەمەس، بۇگىنگى كۇنى ونەر مەن ادەبيەتتىڭ ءبىراز وكىلدەرى وسىنداي پاتەر تاپشىلىعىنىڭ تاۋقىمەتىن تارتىپ وتىر. سوندىقتان دا، ۇكىمەت ارنايى باعدارلاما ازىرلەپ، مەملەكەتتىك باق قىزمەتكەرلەرى مەن ادەبيەت، ونەر سالاسىنداعى دارىندى جاستار ءۇشىن قىزمەتتىك تۇرعىن ءۇي سالۋ مۇمكىندىگىن قاراستىرعان ءجون بولار ەدى. ۇكىمەتتىڭ «قولجەتىمدى باسپانا-2020» باعدارلاماسىنىڭ باسپاناعا مۇقتاج ازاماتتاردى تولىعىمەن قامتۋ مۇمكىندىگى شەكتەۋلى. وسى ورايدا، تىم بولماسا جۋرناليستەرگە، ونەر مەن ادەبيەت سالاسىنداعى دارىندى جاستارعا استانا قالاسىنان مەملەكەت ەسەبىنەن ارنايى جاتاحقانا قالاشىعىن سالۋ ءىسى قولعا الىنسا، ولاردىڭ باسىنداعى تۇرمىستىق-الەۋمەتتىك قيىندىقتارى ەداۋىر جەڭىلدەر ەدى»، - دەدى سەناتور.

Abai.kz