تالعات ەشەنۇلى. «ءتورتىنشى بيلىكتىڭ» توركىنى تۋرالى
سوڭعى ەكى-ءۇش كۇندە جارىلقاپ قالىباي مەن گيتلەر، قاسىم امانجول مەن ۋكراينا، اقبەرەن ەلگەزەك پەن رۋشىلدىق تۋرالى تاقىرىپتار ويعا قالدىردى.
الدىمەن جارىلقاپ قالىباي مەن گيتلەر تۋرالى...
«جارىلقاپتى سوتتاۋ سانگە اينالدى» دەپ جازدى ءبىر ارىپتەستەر. جاي عانا تاپقىر تاقىرىپ شىعار، تابالاپ وتىرعان جوق. بىراق نامىسىڭا تيەتىن، جانىڭدى اۋىرتاتىن نارسە عوي. ءبىزدى «وسى جاعدايلاردىڭ ارتىندا كىمدەر تۇر، نە ماقساتپەن جاسالىپ جاتىر جانە سالدارى قانداي بولادى؟» دەگەن ساۋالدار ويلانتۋى كەرەك-اق.
جارىلقاپتى سوتتاۋ ارقىلى بيلىك ۇلتتىڭ بولاشاعى ءۇشىن اسا قاۋىپتى، وزدەرى ءۇشىن ۋاقىتشا پايدالى تاعى ءبىر «ساياسي ءتاسىلدى» تاجىريبەدەن وتكىزىپ جاتىر. بۇل – بالاماسىز، وگەي تاريحتى پايدالانىپ، قوستىلدى قازاق قوعامىنداعى تىگىسى ەندى عانا جازىلىپ كەلە جاتقان پروبلەمالاردى ادەيى قايتا قوزدىرىپ، اكە مەن بالا، بۋىن اراسىنداعى بولماشى قۇندىلىقتار قايشىلىعىن جاساندى تۇردە قايتا ۋشىقتىرىپ – قازاقتى باسقا، كوزگە تەپكىلەپ، جانشىپ وتىرۋ، مال كەيپىنەن ايىرماي، قانداي جولمەن بولسا دا بۇعاۋلاپ، تۇزاقتاپ ۇستاۋ ساياساتى.
بۇل – بىلتەسى ەندى عانا تۇتانعان ۇلتتىق-ليبەرالدىق، اعارتۋشىلىق، ازاماتتىق قوزعالىستىڭ وتىن قالايدا ءوشىرۋ، ەستيار كەيىپكە ەنە باستاعان قازاقتىڭ قوعامدىق، ساياسي ويىن اتالا قىلۋ، قازاقتىلدى اقپارات كەڭىستىگىن تەك ارزان، داراقى، ساۋىقشىل «تويحاناعا اينالدىرۋ» ساياساتى.
مىنا ساياسي ءتاسىل مەملەكەتشىل، ۇلتشىل جىگىتتەردىڭ، توپتاردىڭ باسىنا ءالى-اق اڭگىرتاياق ويناتاتىن بولادى. ەرتەڭ ء«ستاليندى مانسۇقتاعانىمىز ءۇشىن» جاۋاپقا تارتىلىپ، ء«پۋتيندى مازاقتاعانىمىز ءۇشىن» اكىمشىلىك ايىپ تولەپ، اقتالىپ جاتساق تاڭ قالمايمىن.
وسىنى ويلاپ تاۋىپ وتىرعانداردىڭ كوزدەگەنى: قازاقتىڭ ءبارىن جارىلقاپقا اينالدىرعىسى كەلەدى، ءسوز ۇستاعان قازاقتىڭ ءبارىن جارىلقاپ سياقتى سوتتاپ، باس كوتەرگەن قازاقتىڭ ءبارىن يتجەككەنگە ايداپ جىبەرگىسى كەلەدى.
قازاق ولاردىڭ الدىندا ۇنەمى بۇگەجەكتەپ، ءلاپپايشىلاپ، جالتاقتاپ، جالپاقتاپ تۇرۋى كەرەك. ءتىپتى ءوزىنىڭ وسى ومىرگە كەلگەنى ءۇشىن، جەر باسىپ جۇرگەنى ءۇشىن اقتالىپ تۇرۋى ءتيىس.
جارىلقاپتىڭ باسىنا تۋعان كۇن ەرتەڭ ارقايسىمىزدىڭ باسىمىزعا تۋادى. وسىنى ەستەن شىعارماعانىمىز ءجون-اۋ.
قالعان ەكى تاقىرىپتىڭ جايىن كەشىرەك بايان ەتەيىك...
Abai.kz
