بۇگىن الماتىدا قاسيەتتى قۇربان ايت مەرەكەسىنىڭ قۇرمەتىنە قازاقستان مۇسىلماندارى ءدىني باسقارماسى مەن الماتى ورتالىق مەشىتىنىڭ ۇيىمداستىرۋىمەن ناۋرىزباي اۋدانى قاراعايلى اۋىلىنىڭ تۇرعىندارىنا قايىرىمدىلىق كومەك كورسەتىلدى، - دەپ حابارلايدى قمدب-نىڭ ءباسپاسوز قىزمەتى.

قازاقستان مۇسىلماندارى ءدىني باسقارماسىنىڭ ءدىني سالادا باسىمدىق بەرەتىن باعىتتارىنىڭ ءبىرى – قايىرىمدىلىق شارالارىن ۇيىمداستىرۋ. وسى ماقساتتا باس ءمۇفتي ەرجان قاجى مالعاجىۇلى سۋ تاسقىنىنان كوپ زارداپ شەككەن ۇيلەردى ارالاپ، 200 ءۇيدىڭ تۇرعىنىنا ازىق-تۇلىك پەن قارجىلاي كومەك  ۇسىندى.

ءىس-شارا بارىسىندا تۇرعىندارعا ۇن، ماكارون، سۇيىق ماي جانە باسقا دا اسا قاجەتتى تاۋارلار جەتكىزىلدى.

ەرجان قاجى مالعاجىۇلى، قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي:

«بۇگىندە الماتى قالاسىنداعى مەشىتتەر مەن ەلىمىزدەگى مەشىتتەردەن جىلۋ جينالىپ، سەلدەن زارداپ شەككەن ناۋرىزباي اۋدانىنداعى تۇرعىندارعا كومەك كورسەتىلىپ كەلەدى. بۇل ءىس شارا سونىڭ جالعاسى. الداعى ۋاقىتتا دا جالعاسىن تابادى. ادام بالاسى ومىردە قاۋىپ-قاتەر، جوقشىلىق سىندى قيىن جاعدايلارمەن سىنالادى. اللا تاعالا قۇران كارىمدە: ء«سوزسىز سەندەردى قورقىنىشپەن، اشتىقپەن جانە دە مالدى، جاندى ءارى جەمىستەردى ازايتۋ ارقىلى سىنايمىز، الايدا سابىر ەتۋشىلەردى سۇيىنشىلە!», – دەيدى. دەمەك، اللا تاعالا قيىندىقتار الدىندا ۇستامدى بولىپ، سابىر ەتكەن جانداردى زور ساۋاپ كۇتىپ تۇرعاندىعىن ەسكەرتەدى. سابىرلىق – قيىندىق پەن قايعىلى جاعدايلاردا ادام بالاسىنا كۇش-قۋات بەرەتىن ەرەكشە قاسيەت. ولاي بولسا، وتكىنشى قيىندىققا سۇرىنبەي، سابىردىڭ سىيىنا بولەنۋدى جاراتقان اللا بارشامىزعا ءناسىپ ەتسىن!».

اباي-اقپارات