قايبىر جىلى، قاراعاندىدا ابحازدىق جىگىتپەن از-كەم سۇحباتتاسىپ قالعانىم بار. اڭگىمە الدەبىر باي ازاماتتىڭ ءوزىنىڭ ءبىر توپ اۋىلداسىنا جاساعان قىساستىعى تۋرالى ءوربىدى. سوندا الگى جىگىت ايتتى: "سىزدەردى تۇسىنبەيمىن،باسىندا بايلىعى، قولىندا بيلىگى بار ادامداردان ولەردەي قورقاسىڭدار. ولارعا قارسى شىقساق ءبارىبىر جەڭىلىپ قالامىز دەگەن پسيحولوگيا مەڭدەپ العان. نە ىستەسە دە كونە بەرەسىزدەر. ءبىز جاقتا ونداي ەمەس، ەگەر الدەبىر باي الدەبىر كەدەيگە زورلىق قىلسا، قىزىن زورلاسا، ءوزىن قورلاسا انا كەدەي مىندەتتى تۇردە كەك الادى. بارادى دا ءۇيىن ورتەپ كەتەدى، ماشينەسىن جارىپ جىبەرەدى. ايتەۋىر ەسەبىن تاۋىپ كەك الادى. سوندىقتان باي تۇرماق، باسقا بولسا دا ءجون-جوسىقسىز ەشكىمگە سوقتىقپايدى. ءبىزدى ۇستاپ تۇرعان كەكشىلدىك" دەدى. ويلانىپ قالدىم. ورىسپەن جاناسقاندا جوعالتقان ءبىر مىنەزىمىز كەكشىلدىك ەمەس پە؟ بۇرىن بابالارىمىز "قانعا قان، جانعا جان" قاعيداسىن ۇستانعان. كەك العان ءتىپتى بولماسا قۇن تولەتكەن. "كەيىننەن كەكشىل بولما، تەكشىل بول", "الدىڭا كەلسە اكەڭنىڭ قۇنىن كەش" سەكىلدى سابىرعا شاقىرعىش ماقالدار شىعىپ اساۋ قازاقتى جۋاسىتىپ تاستادى. جىلقى مىنەزدىمىز دەپ جۇرگەن حالىق قوي مىنەزدى مومىنعا اينالدى. كەي كەزدەرى قوعامداعى ادىلەتسىزدىكتى كورگەندە، ەسەسىن جىبەرىپ جاتقان باۋىرلارىمدى كورگەندە الگى جىگىتتىڭ ءسوزى ەسىمە تۇسە بەرەدى.

ەسبولات ايدابوسىن

Facebook-تەگى پاراقشاسىنان