قىزىلجار قالاسى قاربالاس ۇستىندە. قىزىلجارلىقتاردىڭ كىمگە بولا، نە ءۇشىن قارابالاسىپ كەتكەنىن وتكەندە جازعان دا ەدىك (http://abai.kz/post/view?id=4379). ءيا، سونىمەن سولاي، 2016 جىلى جازدا اتالعان قالادا قازاقستان-رف باسشىلارىنىڭ ءوزارا كەزدەسۋى، ايماقارالىق فورۋم جانە دىنيكونفەسسيالاردىڭ كەزەكتى قۇرىلتايى وتپەك. وسى جيىندى وتكىزۋ قامىنا سولتۇستىك قازاقستان وبلىسىنداعى قوعامدىق ۇيىمدار بىلەك سىبانا كىرىسكەنگە ۇقسايدى. ولار («لاد»، «وبەدينەنيە روسسيسكيح سووتەچەستۆەننيكوۆ»، «سويۋز كازاكوۆ. گوركي ليني»، ت.ب. ) قازىردەن باستاپ جەرگىلىكتى باق كوزدەرى ارقىلى پىكىر تۋعىزىپ، وبلىس اكىمى ەرىك سۇلتانوۆقا اشىق حات جازىپ جاتىر. سونداي اشىق حاتتىڭ ءبىرى رەداكتسيانىڭ العى سوزىمەن «پەتروپاۆلوۆسك. KZ» گازەتىندە «پامياتنيك پوكروۆيتەليام» دەگەن تاقىرىپپەن جارىق كورىپتى. ماقالا اۆتورى قازاقستاننىڭ ۇلتتار اراسىنداعى تاتۋلىق پەن دوستىقتى تۋ ەتىپ وتىرعانىن، ءدال وسى باعىتتاعى بيلىكتىڭ ساياساتى الەمگە ۇلگى ەكەندىگىن، قازاقستان مەن رەسەي اراسىنداعى قارىم-قاتىناس ەكونوميكالىق قانا ەمەس، مادەني تۇرعىدان دا تىعىز بايلانىسا تۇسكەنىن، ەۋرازيالىق ەكونوميكالىق وداقتىڭ جۇمىس ىستەپ كەتكەنىن، ول وداقتىڭ كىندىك اكەسى قر پرەزيدەنتى ن. نازارباەۆ ەكەندىگىن ايتا كەلىپ، 2016 جىلعا جوسپارلانعان ەكى ەل باسشىسىنىڭ كەزدەسۋىنە دەيىن قالاداعى «دوستىق» الاڭىندا «دوستىق ءۇيىنىڭ» سالىنىپ بىتەتىندىگىن، سوعان وراي پەتر مەن پاۆەلدىڭ دە ەسكەرتكىشى بوي كوتەرسە ابزال بولار ەدى دەگەندى جازادى. ءسويتىپ اشىق حاتقا كەزەك بەرەدى. اشىق حاتتا اۋليە پەتر مەن پاۆەلدىڭ ەرتە حريستيان جانە ريم داۋىرىندە ايگىلەنگەندىگىن ايتقان قوعام بەلسەندىلەرى 2016 جىلى پەتروپاۆل قالاسىندا ەكى ءماسىحتىڭ ەسكەرتكىشى تۇرۋى ءتيىس دەپ ءبىر-اق قايىرادى. ەگەر بۇل ەكەۋىنە ەسكەرتكىش قويۋ ءۇشىن قالا بيۋدجەتىنەن قارجى قاراستىرىلماسا، قوعامدىق ۇيىمدار سول قاراجاتتى ءوزىمىز تابامىز دەپ مىرزالىق تانىتادى.

قالانىڭ اۋەلدە بەكىنىس رەتىندە سالىنىپ، كەيىن وعان ەكى ءشادياردىڭ اتى بەرىلگەنىن ەسكەرتكەن قوعامدىق ۇيىم بەلسەندىلەرى ەندى قالادا سول ەكەۋىنىڭ ەسكەرتكىشى تۇرۋى كەرەك دەپ قادالىپ وتىر. ال، قازاق بيلىگى بولسا، "سقو-نىڭ ورتالىعىن  «قىزىلجار» نەمەسە «ابىلاي حان» اتايىق" دەپ، ارەدىك  تىلەك ءبىلدىرىپ قوياتىن قازاقتىڭ ءۇنىن شىعارار ەمەس.

Abai.kz