«نۇر وتان» پارتياسى ەلدەگى جەتەكشى ساياسي كۇش رەتىندە قاراپايىم حالىقتىڭ ماسەلەلەرىن ناقتى شەشۋدىڭ تەتىكتەرىن قولعا الماق. ول ءۇشىن باستاۋىش پارتيا ۇيىمدارى مەن قوعامدىق قابىلداۋ بولمەلەرىنىڭ جۇمىسىن جانە پارتيا فراكتسيالارىنىڭ ءىس-قيمىلىن كۇشەيتۋگە باسا نازار اۋدارىلادى. سونىمەن قاتار، ساياسي ۇيىم جاستار ساياساتى ماسەلەسىنە دە ەرەكشە كوڭىل ءبولىپ، ولارعا قولداۋدى ارتتىرماق. پارتيانىڭ ءباسپاسوز قىزمەتى حابارلاعانداي، بۇل تۋرالى كەشە، 25 تامىزدا استانادا، پارتيا توراعاسىنىڭ ءبىرىنشى ورىنباسارى اسقار مىرزاحمەتوۆتىڭ قاتىسۋىمەن وتكەن العاشقى سەلەكتورلىق كەڭەستە ايتىلدى. كەڭەيتىلگەن جيىنعا پارتيا حاتشىلارى، پارتيا كۋراتورلارى، ءماجىلىس دەپۋتاتتارى جانە ورتالىق اپپارات جەتەكشىلەرى مەن وبلىستىق فيليال توراعالارىنىڭ ءبىرىنشى ورىنباسارلارى قاتىستى.

ەلباسى، «نۇر وتان» پارتياسىنىڭ توراعاسى نۇرسۇلتان نازارباەۆ پارتيا ساياسي كەڭەسى بيۋروسىنىڭ وتىرىسىندا جەتەكشى ءارى بۇكىل حالىق الدىنداعى جاۋاپتى ساياسي كۇش رەتىندە «نۇر وتاننىڭ» الدىندا قازىرگى كۇنى اسا ماڭىزدى مىندەتتەر تۇرعانىن اتاپ كورسەتتى.

مەملەكەت باسشىسى «نۇر وتانعا» قازاقستاندىقتاردى بەس ينستيتۋتسيونالدىق رەفورمانى جانە «100 ناقتى قادام» ۇلت جوسپارىن جۇزەگە اسىرۋعا جۇمىلدىرۋدى، «نۇرلى جول» باعدارلاماسىنىڭ ورىندالۋىن ءتيىمدى باقىلاۋمەن قامتاماسىز ەتۋدى، سونىمەن قاتار، قوعامداعى بىرلىك پەن كەلىسىمدى ساقتاۋعا ىقپال ەتىپ، بارلىق تۋىندايتىن ماسەلەلەر بويىنشا حالىقپەن بەلسەندى جۇمىس جۇرگىزۋدى تاپسىردى.

ەلباسى جۇكتەگەن وسىناۋ تاپسىرمالاردى ورىنداۋدىڭ جوسپارى پارتيانىڭ سەلەكتورلىق كەڭەسىندە ايقىندالىپ، پارتيا توراعاسىنىڭ ءبىرىنشى ورىنباسارى بۇل باعىتتاعى جۇمىستاردى تياناقتى جۇزەگە اسىرۋ ءۇشىن جاڭا ءارى ناقتى مىندەتتەردى بەلگىلەدى.

جيىندا پارتيانىڭ الداعى ۋاقىتتا ەڭ الدىمەن بيۋدجەتتىڭ تاراپىنان اتقارىلىپ جاتقان باعدارلامالارعا باسا نازار اۋداراتىنى ايتىلدى. ياعني، ءتۇرلى سالالىق باعدارلامالار بويىنشا مەملەكەتتەن بولىنەتىن قاراجاتقا باقىلاۋ كۇشەيتىلىپ، بيۋدجەت قارجىسىنىڭ ءتيىمدى جانە ماقساتتى جۇمسالۋى پارتيا تاراپىنان قاتاڭ قاداعالاۋدا بولادى.

پارتيا الدىندا تۇرعان تاعى ءبىر ماڭىزدى مىندەت قوعامدىق قابىلداۋ بولمەلەرىنىڭ بەلسەندىلىگىن ارتتىرۋ بولماق.

«جىل وتكەن سايىن قوعامدىق قابىلداۋلارعا مۇڭ-مۇقتاجىن ايتا كەلۋشىلەردىڭ ارتا ءتۇسۋى «نۇر وتانعا» دەگەن حالىق سەنىمىنىڭ ءبىر كورسەتكىشى. الايدا، ەندىگى جەردە ءبىز ءىستىڭ ناتيجەلىلىگىن تەك كەلىپ تۇسكەن وتىنىشتەر كولەمىمەن عانا ەمەس، قاراپايىم تۇرعىندار ماسەلەلەرىنىڭ قانشالىقتى تۇبەگەيلى شەشىمىن تاپقانىمەن ولشەۋگە ءتيىسپىز.

ول ءۇشىن ەڭ الدىمەن ارىز-شاعىمداردىڭ ءتۇپ-توركىنىنە ۇڭىلگەن ءجون. ياعني، بەلگىلى ءبىر ءوتىنىش قانداي سەبەپپەن ءتۇستى، بۇل قانداي ورگان جۇمىسىنىڭ كەمشىلىگى دەگەندى انىقتاپ، سوعان ساي حالىقتىڭ ماسەلەسىن ناقتى شەشۋدىڭ تەتىكتەرىن ىسكە اسىرۋ قاجەت»، - دەدى پارتيا توراعاسىنىڭ ءبىرىنشى ورىنباسارى. ياعني ءوز دەڭگەيىندە بەرىلگەن قۇزىرەتىنە سايكەس اتقارۋشى ورگانداردىڭ جۇمىسى دا باعالاناتىن بولادى.

وسىلايشا «نۇر وتان» بيلەۋشى ساياسي كۇش رەتىندە ازاماتتاردى تولعاندىرعان ماسەلەلەردىڭ شەشىلۋىنە ىقپال ەتىپ، سونداي-اق، حالىقپەن تۇراقتى بايلانىس ورناتىپ، جۇرتشىلىقتىڭ سەنىمىن ارتتىرۋ ارقىلى پارتيالاستار قاتارىن ودان ءارى ۇلعايتۋدى جالعاستىرا بەرمەك. بۇل جەردە سانعا عانا ەمەس، نەگىزىنەن ساپانى ارتتىرۋعا دا ۇلكەن كوڭىل بولىنەدى.

بۇگىنگى كۇنى پارتيا الدىندا تۇرعان وزەكتى ماسەلەنىڭ ءبىرى - باستاۋىش پارتيا ۇيىمدارىنىڭ جۇمىسىن ساپالى جاڭا دەڭگەيگە كوتەرۋ.

ول ءۇشىن ورتالىق اپپارات پەن باستاۋىش ۇيىمدار جۇمىسىن ۇيلەستىرۋ اسا ماڭىزدى. ويتكەنى، جوعارىدان بەرىلگەن تاپسىرما جەرگىلىكتى جەرلەردە تولىققاندى جۇزەگە اسپاي جاتادى. وسىعان وراي الداعى ۋاقىتتا پارتيانىڭ بارلىق دەڭگەيدەگى ۇيىمدارى اراسىنداعى بايلانىس كۇشەيتىلىپ، بىرىزدىلىكپەن جۇمىس ىستەۋ جۇيەسى قالىپتاسپاق. پارتيا توراعاسى جۇكتەگەن مىندەتتەردى حالىققا ءتۇسىندىرۋدىڭ، ونىڭ ورىندالىسىن قاداعالاۋدىڭ ماڭىزدى تەتىگى - جالپى سانى 5700 باستاۋىش ۇيىممەن بىرلەسكەن ءىس-قيمىلدى ودان ءارى جانداندىرۋ شارالارى ناقتىلاندى. ۇيىمنىڭ حالىقتىق پارتيا رەتىندەگى ۇستانىمىن قامتاماسىز ەتۋ ءۇشىن جەرگىلىكتى جەرلەردەگى قۇرىلىمدارىنا ءتيىستى جاعداي جاساۋ، سونىڭ ىشىندە باستاۋىش ۇيىمدار باسشىلارىنىڭ بىلىكتىلىگىن قايتا قاراۋ، ولاردى ارنايى سەمينار ترەنينگتەردەن وتكىزۋ تۋرالى تاپسىرما بەرىلدى. وسى تاپسىرمالاردىڭ نەگىزىندە باستاۋىش پارتيا ۇيىمدارى جەتەكشىلەرىنىڭ قاتىسۋىمەن، وڭىرلەردە ارنايى جيىندار وتەتىندىگى ايتىلدى.

الداعى ۋاقىتتا پارتيا جۇمىسىنىڭ باسىم باعىتتارىنىڭ ءبىرى - جاستار ساياساتى بولماق. بۇل ءۇشىن ەڭ الدىمەن جاستار ومىرىندەگى قازىرگى كۇندەگى ەڭ باستى ماسەلەلەر زەردەلەنىپ، مەملەكەتتىك باعدارلامالار ارقىلى جاستاردى جۇمىسپەن قامتۋ، بىلىكتىلىگىن ارتتىرۋ، كاسىپكە باۋلۋ ت.ب ماسەلەلەر جۇيەلەنۋگە ءتيىس.

وسىعان وراي «جاس وتان» جاستار قاناتىنىڭ جۇمىسىن جەتىلدىرۋ ماقساتىندا وڭىرلەردەگى «جاس وتان» بەلسەندىلەرىنىڭ جاڭا باعىتتاعى جۇمىس جوسپارلارى مەن تىڭ يدەياعا تولى ۇسىنىستارىن جيناۋعا ءبىر اي مەرزىم بەلگىلەندى. بۇل مىندەت وڭىرلىك فيليال باسشىلارىنا جۇكتەلدى.

سونىمەن قاتار، سەلەكتورلىق كەڭەستە سىبايلاس جەمقورلىقپەن كۇرەس باعىتىنداعى جۇمىستاردى جەتىلدىرۋ، پارتيالىق باقىلاۋدى كۇشەيتۋ ماسەلەسى دە جان-جاقتى ايتىلدى. «نۇر وتان» جانىنداعى سىبايلاس جەمقورلىققا قارسى ءىس-قيمىل جونىندەگى رەسپۋبليكالىق قوعامدىق كەڭەستىڭ ءىس-قيمىلىن ارتتىرۋ ماسەلەسى كوتەرىلدى.

بۇعان قوسا الداعى ۋاقىتتا «نۇر وتان» پارتياسىنىڭ ماجىلىستەگى جانە بارلىق دەڭگەيدەگى ماسليحاتتارداعى فراكتسيالارى ارقىلى جەرگىلىكتى جەرلەردە قاراپايىم حالىققا قيىندىق تۋدىرىپ، ءوندىرىستىڭ، اۋىلشارۋاشىلىعىنىڭ، شاعىن جانە ورتا بيزنەستىڭ دامۋىنا كەدەرگى بولىپ جاتقان ماسەلەلەردى انىقتاپ، پارتيانىڭ ماجىلىستەگى فراكتسياسى ارقىلى زاڭنامالىق قۇجاتتارعا وزگەرىستەر مەن تولىقتىرۋلار ەنگىزۋ كوتەرىلدى. ول ءۇشىن وڭىرلەردەگى وزەكتى ماسەلەلەردىڭ تىزبەگىن ايقىنداپ، ورتالىق اپپاراتقا ۇسىنىس بەرۋ وبلىستىق فيلال باسشىلارىنا جۇكتەلدى.

Abai.kz