اتىراۋدا بالامالى ەلەكتر ەنەرگياسىنىڭ جاڭا ءتۇرىن وندىرەتىن ستانسا سالىنادى.

تاۋلارى مەن قىراتتارى جوققا ءتان جازىق دالادا ورنالاسقان اتىراۋ وبلىسى جەل مەن كۇننەن قۋات جيناۋعا تاپتىرمايتىن ءوڭىر. قازىردىڭ وزىندە اتىراۋ وبلىسىندا جەلدەن ەنەرگيا وندىرەتىن قوندىرعىلاردى پايدالانىپ وتىرعاندار بار. ەندى جىلىوي اۋدانىنىڭ اۋماعىنان كۇن ساۋلەسىنەن قۋات وندىرەتىن ارنايى ستانسا سالۋ ءىسى قولعا الىنىپ وتىر. قازىردىڭ وزىندە بۇل جوبانى ىسكە اسىرۋ ءۇشىن ارنايى جەر تەلىمى بەرىلدى. ەلىمىزدە العاش رەت ىسكە اسىرىلاتىن جوبا بويىنشا 10 مۆت ەلەكتر ەنەرگياسىن ءوندىرۋ جوسپارلانعان. جوباعا شەتەل ينۆەستيتسياسى سالىنباق. ونى ىسكە اسىراتىن مەردىگەرلىككە «ەكوپروەكت-قۇلسارى» سەرىكتەستىگى تاڭدالىپ وتىر. قۇلسارى قالاسىندا تۇراتىن كاسىپكەر اسقار سەكەرباەۆتىڭ بالامالى ەنەرگيا وندىرەتىن ستانساسىنىڭ يننوۆاتسيالىق جوباسى ءتيىستى مەملەكەت تاراپىنان قولداۋ تاۋىپتى. ونىڭ ايتۋىنشا، كۇن ساۋلەسىنەن جينالاتىن ەلەكتر قۋاتىن وتكىزۋ ماسەلەسى شەشىلىپ تۇر. اتىراۋ دالاسىندا وندىرىلگەن بالامالى ەلەكتر ەنەرگياسىن «KEGOC» اق ساتىپ الىپ، 15 جىل بويى ورتاق جەلىگە قوسادى. ءبىر كۆت ەنەرگيا قۇنى –37 تەڭگە. ستانسادا جيناقتالعان ەنەرگيامەن 1000 تۇرعىن ءۇيدى قامتۋعا بولادى. – كۇن ساۋلەسىنەن ەنەرگيا ءوندىرۋدىڭ ەش قيىندىعى جوق. وتە قاراپايىم تاسىلمەن، ياعني، فوتوەلەكترلىك مودۋلدار ارقىلى كۇن ساۋلەسى ەلەكتر قۋاتىنا اينالدىرىلادى. ەنەر­گيا اككۋمۋلياتورلارعا جينالىپ، كابەلمەن ورتاق جەلىگە قوسىلادى، – دەيدى جوبا يدەياسىنىڭ يەسى اسقار سەكەرباەۆ. دەگەنمەن، ونىڭ پىكىرىنشە، بۇل سالادا ماماندار وتە تاپشى، سونىمەن بىرگە، باسقارۋشىلار دا جەتىسپەيدى ەكەن. بۇل تىعىرىقتان شىعۋ جولى بار ما؟ ۇكىمەت اتالعان سالادا ماماندار دايارلاۋدىڭ جوسپارىن گەرمانيانىڭ ەكو­نوميكا جانە ەنەرگەتيكا فەدەرالدى مينيسترلىگىمەن، سونداي-اق، «تۇران-پروفي» اكادەمياسىمەن بىرىگىپ جاساقتاپتى. وسىنداي مامىلە اياسىندا بالامالى ەنەرگيا ءوندىرۋشى كاسىپورىنداردىڭ جەتەكشىلەرىن گەرمانيادا تاعى­لىمدامادان وتۋگە جىبەرىپتى. ەندى جاقىندا ولار گەرمانياداعى كيل قالاسىندا تاعى ءبىر رەت تاعىلىمدامادان وتەدى. شىندىعىندا، بۇل ەرەكشە جوبا بولعالى تۇر. ونى ۇسىنعان اسقار سەكەرباەۆ قۇرىلىس جۇمىسىن انە-مىنە باستاماق. قۇرىلىس جۇمىستارىنا 150 ادام تارتۋدى كوزدەپتى. كۇن ساۋلەسىن ەلەكتر ەنەرگياسىنا اينالدىراتىن ستانسانى ىسكە قوسۋ الداعى جىلدىڭ مامىر ايىنا جوسپارلانىپ وتىر.

اباي-اقپارات