ومبىلىقتار قالانىڭ 299-شى تۋعان كۇنىن 31 شىلدە مەن 4 تامىز كۇندەرى كەڭىنەن تويلادى. بيىل شوقان ءۋاليحانوۆتىڭ 180 جىلدىعىنا وراي عالىمنىڭ اتىنا بەرىلگەن كوشەدە اۋقىمدى ءىس-شارالار ءوتتى. كوشەدە «ەتنو-جاز» شىعارماشىلىق جوباسى، «دوستىق جاعالاۋى» ۇلتتىق مادەني مەرەكەسى مەن ش. ءۋاليحانوۆتىڭ 180 جىلدىعىنا ارناپ «ۇلى دالانىڭ سوڭعى حانزاداسى» ەكسكۋرسياسى ۇيىمداستىرىلدى. بۇل تۋرالى قازاقپاراتقا «ومبى قازاقتارى» قاۋىمداستىعىنىڭ وكىلى تورعىن اشەنوۆا حابارلاعان.  

«دوستىق جاعالاۋى» شاراسىنا 40-قا جۋىق ۇلتتىق-مادەني ۇيىمىنىڭ وكىلدەرى قاتىستى. قاتىسۋشىلار قالا تۇرعىندارى مەن قوناقتارىن ومبىدا ءومىر ءسۇرىپ جاتقان ءتۇرلى ۇلت وكىلدەرىنىڭ سالت- داستۇرىمەن، مادەنيەتىمەن تانىستىردى. مەرەكەگە وراي قازاق كيىز ءۇيى تىگىلىپ، ول  جەردە قازاقتىڭ ۇلتتىق تاعامدارى تانىستىرىلعان.

كيىز ۇيدە ومبى وبلىسىنىڭ ۇلت وكىلدەرىنىڭ ۇلتتىق-مادەني ۇيىمدارى، «شوقان جولى» ايماقتىق قوعامدىق ۇيىمى، «ومبى قازاقتارى» قاۋىمداستىعىنىڭ وكىلدەرى قالا مەرى ۆياچەسلاۆ دۆوراكوۆسكي مەن قازاقستاننان كەلگەن قوناقتاردى قارسى الدى.

قالا مەرى ۆ. دۆوراكوۆسكي قالا كۇنىمەن قۇتتىقتاپ كەلگەن قوناقتارعا العىسىن ءبىلدىردى.

«مەن بۇل جەردە ومبىنىڭ ناعىز دوستارىن كورىپ وتىرمىن. ءبىزدىڭ قالامىزدىڭ ەسىگى قاشاندا سىزدەرگە اشىق. ءبىز سىزدەرمەن ىنتىماقتاستىعىمىزدى ودان ءارى دامىتۋعا نيەتتىمىز»، - دەدى قالا باسشىسى.

مەرەكەلىك شارالار قازاقستان رەسپۋبليكاسىنىڭ كونسۋلدىعىنىڭ قاسىندا «ۇلى دالانىڭ پەرزەنتتەرى» ادەبي-مۋزىكالىق كەشىمەن جالعاسىن تاپقان.

اباي-اقپارات