شىعىس قازاقستاندا ۇلى ابايدىڭ 170 جىلدىق مەرەيتويى سالتاناتتى تۇردە باستالدى. قازاقتىڭ باس اقىنىنىڭ تويى سەمەي قالاسى مەن اقىننىڭ تۋعان جەرى اباي اۋدانىندا كەڭىنەن اتالىپ وتبەك. بۇل تۋرالى قازاقپارات جازدى.

ۇلى اقىننىڭ تويى كەشە،  5 تامىزدا سەمەي قالاسىندا ساعات 18.00-دە مۋزىكالىق كەشپەن اشىلدى. شارالارعا بەلگىلى مەملەكەت جانە قوعام قايراتكەرلەرى، اقىندار مەن جازۋشىلار، عالىمدار، تۇركولوگتار، اۋدارماشىلار قاتىسۋدا.

بۇگىن، 6 تامىزدا اقىننىڭ ءومىرى مەن شىعارماشىلىعىنىڭ بەيمالىم قىرلارى باياندالاتىن «ابايدىڭ ۇلى جۇمباعى» اتتى دەرەكتى ءفيلمى ۇسىنىلادى. ۇلى ويشىل تۋرالى رۋحاني-اعارتۋشىلىق باعىتتاعى ينتەرنەت-ەنتسيكلوپەديا پرەزيدەنتتىڭ باستاماسى بويىنشا ەلباسىعا بەرىلگەن «جىبەك جولى» الەمدىك سىيلىعىنىڭ قارجىسىنا ءتۇسىرىلدى. اتالعان ءفيلمدى شىعىس ءوڭىرىنىڭ تۋماسى، مەملەكەتتىك «دارىن» جانە «سەرپەر» سىيلىقتارىنىڭ لاۋرەاتى اقبەرەن ەلگەزەك «Tengri Films» كينوكومپانياسىمەن بىرگە ءتۇسىردى. تاپسىرىس بەرۋشى - مەملەكەتتىك ءتىلدى دامىتۋ قورى.

سونىمەن بىرگە قازاقستان قوعامىن ۇلى ويشىل مۇرالارىمەن تانىستىرۋ ماقساتىندا «اباي جانە الەم وركەنيەتى» اتتى حالىقارالىق عىلىمي-تاجىريبەلىك كونفەرەنتسيا ساعات 10.00-دە شاكارىم اتىنداعى سەمەي مەملەكەتتىك ۋنيۆەرسيتەتىندە وتەدى. بۇل جيىنعا الىس جانە جاقىن شەت ەلدەردەن، قازاقستاننان بەلگىلى ادەبيەتتانۋشىلار، ءتىل ماماندارى، اباي شىعارمالارىن اۋدارۋشىلار، مادەنيەتتانۋشىلار، تاريحشىلار، پەداگوگتار قاتىسپاق.

ساعات 14.30-دا اباي اتىنداعى تەاتردا «ادامزاتتىڭ ابايى» سالتاناتتى شاراسى ءوتىپ، اباي تۋىندىلارى بويىنشا تەاترلاندىرىلعان قويىلىم، كونتسەرت ۇسىنىلادى.

7 تامىزدا اقىن مەرەيتويى اباي اۋدانىندا جالپىحالىقتىق مەرەكەلەۋگە ۇلاسادى. مەيماندار «اباي-شاكارىم» مەموريالدى كەشەنى، اقىننىڭ مۋزەي-ءۇيى، «ەڭلىك-كەبەك» مازارىندا بولىپ، اۋدانداعى ەتنواۋىلدى تاماشالايدى. بۇل كۇنى ساعات 10.30-دا قاراۋىل اۋىلىندا ماماي باتىر ەسكەرتكىشىنىڭ اشىلۋى، 10.45-تە «قازاق كۇرەسىنەن» ەل چەمپيوناتى، 11.00-دە «اباي تويى - حالىق تويى» مەرەكەلىك ءىس-شاراسى، 12.00-دە «جورعا» جارىسى وتپەك. 

ال ساعات 15.00-دە اۋداندىق مادەنيەت ۇيىندە «ادامزاتتىڭ ءبارىن ءسۇي، باۋىرىم دەپ» اتتى اقىندار ايتىسى وتەدى. وعان سارا توقتامىسوۆا، سەرىكزات دۇيسەنعازى، ايبەك قاليەۆ، اينۇر تۇرسىنباەۆا سىندى ەلىمىزدىڭ ءار وڭىرىنەن كەلگەن 12 اقىن قاتىسپاق. ال 16.00-دە قاراۋىلتوبەدە الامان بايگە ۇيىمداستىرىلسا، 17.00-دە «اباي تويىنىڭ باس پالۋانى» اتتى كۇرەس وتپەك.

اباي-اقپارات