قوستاناي قالاسى اكىمىنىڭ ورىنباسارى  ماقسۇت قاليەۆ

قوستاناي قالاسى اكىمىنىڭ ورىنباسارى - فرۋنزيك اراكەليان

ايدىڭ-كۇننىڭ امانىندا توبەمىزدەن جاي تۇسكەندەي بولدى. وبلىس ورتالىعى—قوستاناي قالاسى اكىمىنىڭ ەكى بىردەي ورىنباسارى پارا الامىن دەپ توڭقالاڭ استى. سىبايلاس جەمقورلىققا قارسى قىزمەت قىزمەتكەرلەرى وسى ايدىڭ باسىندا الدىمەن ماقسۇت قاليەۆتى تۇزاقتاسا، ارادا ەكى كۇن وتپەي جاتىپ، ياعني تامىز ايىنىڭ ءۇشى كۇنى فرۋنزيك اراكەلياندى قاقپانعا ءتۇسىردى. ءبىر قىزىعى، ەكەۋى دە وسىنداعى اتىنان ات ۇركەتىن «سىل» اتتى سەرىكتەستىكتىڭ قوجايىنى گاگيك وۆنانياننان پارا العاندىعى انىقتالدى. ولارى وسال ەمەس. قاليەۆ ۇساقتالماي، بىردەن 13 ميلليون تەڭگەنى بىردەن قالتاعا باسقان. ەكىنشىسى جايلى ناقتى ەشتەڭە ايتىلمايدى. ءسىرا، ول دا تارشىلىق تانىتپاعان شىعار. الدىن الا مالىمەتتەرگە قاراعاندا بۇلار الگى سەرىكتەستىكتىڭ اۆتوبەكەت جانىنداعى اۆتوموبيلشىلەرگە قىزمەت كورسەتەتىن ورتالىق  قۇرىلىسىنىڭ توقتاۋسىز جۇرۋىنە «قول ۇشىن» بەرگەن كورىنەدى. جاڭاعى اقشا سول «قامقورلىققا» دەگەن كاسىپكەردىڭ «اق العىسى» دەسە بولادى.  جانە دە ول كەلەشەكتە بەرىلەتىن ۇلكەن پارانىڭ ازعانتاي عانا بولىگى كورىنەدى. ەگەر اتالمىش قۇرىلىسقا  بيۋدجەتتەن ءبىر ميلليارد تەڭگە بولىنگەندىگىن ەسكەرسەك، ال بىزدىگى «العىستىڭ» ياعني «وتكاتتىڭ» كەمىندە ول سومانىڭ 20 پايىزىن قۇرايتىندىعىن ايتساق، قورىتىندىسىن وزدەرىڭ باعامداي بەرەرسىزدەر. ەكى ورىنباساردىڭ قالعان اقشادان قاعىلىپ قالعاندىعى عانا جانىنا باتپاسا، ولار مۇنى ءتىپتى قىلمىس دەپ تە ەسەپتەمەيتىن شىعار. وزدەرىن انا ەرماگياەۆتىڭ قاسىندا ءتىپتى پەرىشتە سەكىلدى سەزىنەتىن دە بولار-اۋ.

   شىنىن ايتقاندا، ءبىز بۇعان قازىر تاڭ قالمايتىن دا بولدىق. سەبەبى، جەمقورلىق دەگەن جەگى قۇرتتىڭ قوعامىمىزدىڭ تامىرىن كەمىرىپ جاتقاندىعى، ازىرگە ونىمەن كۇرەستىڭ سونشالىقتى پارمەندى بولماي تۇرعاندىعىن جاسىرساق، شىندىققا قيانات جاسارمىز.  مۇنىڭ باستى سەبەبى--وبلىستىق دەڭگەيدەگى بيلىك جۇيەسىندەگى «كوماندالىق» باسقارۋ ءادىسىنىڭ ابدەن دەندەپ كەتكەندىگى. ياعني بىرەۋ باسشىلىققا كەلسە، ءوزىنىڭ تامىر-تانىستارىن، جاندايشاپتارى مەن جاعىمپازدارىن الا جۇرەدى. ەلباسى مۇنى ۇنەمى سىناپ وتىراتىندىعى، ءتىپتى «كوماندانىڭ بارا-بارا بانداعا» اينالاتىندىعىن قاداپ ايتقانىمەن ودان قورىتىندى شىعارىپ جاتقان ەشكىم جوق. ماسەلەن، وبلىس اكىمى نۇرالى سادۋاقاسوۆ وزىنە بيلىك تيىسىمەن ءبىر كەزدەردە قوستاناي اۋداننىڭ اكىمى بولعان احمەتبەك احمەتجانوۆ دەگەندى وبلىس ورتالىعىنا اكىم ەتىپ قونجيتا سالدى. (انىق-قانىعىن كىم ءبىلسىن، جۇرتتىڭ ايتۋىنا قاراعاندا وسى احمەتبەك دەگەن كىسى سادۋاقاسوۆتىڭ تۋعان بولەسى كورىنەدى). ال ول ءوز كەزەگىندە سول جەردە ءوزىنىڭ ورىنباسارى بولعان وسى اراكەلياندى ەرتە كەلدى. مىنەكەي ەندى ءبىز وسى «كوماندالىق باسقارۋدىڭ» جەمىسىن تاتىپ وتىرمىز. ەگەر وسى ءتۇبى تىعىرىققا تىرەيتىن، تەك فۋتبول ويناعاندا عانا كەرەك وسى ءادىستىڭ تامىرىنا بالتا شاپپاساق، وندا بۇدان دا تالاي قىزىققا باتامىز.

  ۇمىتىپ بارادى ەكەنبىز، ءبىزدىڭ قوستانايدا جالپى ارمىن وكىلى باسقاراتىن بيزنەستىڭ ورگە باسىپ جۇرگەندىگى، ولارعا يۋيلىك تاراپىنان ەرەكشە قامقورلىق تانىتاتىندىعى جايلى اڭگىمە تارالعاندىعىنا ءبىراز ۋاقىت بولدى. مۇنىڭ سەبەبىن كەيبىرەۋلەر سول ارميان اعايىنداردىڭ وبلىس اكىمىنىڭ قۇداندالىعىنان تۇسىندىرەدى. كىمنىڭ اۋزىنا قاقپاق قويارسىڭ؟ ەشتەڭە اشىق ايتىلماعان جەردە وسەك-اياڭنىڭ وربيتىندىگى بەلگىلى ەمەس پە؟

قوستاناي قالاسىنىڭ اكىمى - احمەدبەك احمەتجانوۆ

قوستاناي وبلىسىنىڭ اكىمى - نۇرالى سادۋاقاسوۆ

P.S. ايتپاقشى ەكى بىردەي ورىنباسارى پارا الىپتى، قالامىزدىڭ جامان اتىن شىعارعان احمەتجانوۆتى سادۋاقاسوۆ وتستاۆكاعا جىبەرەر مە ەكەن؟ الدە اتامىز قازاقتىڭ «بولەمىسىڭ، بولەنى كورە تۇرا ولەمىسىڭ» دەگەن ماقالدى باسشىلىققا الا ما؟

جالعاسى بولسا تاعى دا جازا جاتارمىز.

مۇراتبەك داۋرەنۇلى.

قوستاناي. 

Abai.kz