مەن ورىس تىلىندە 19 جىلداي وقىپپىن. ون جىل مەكتەپتە، ءتورت جىل ينستيتۋتتا (بۇرىنعى قازپي قازىرگى قازۇمپۋ), تاعى بەس جىل (ەكى جىل ستاجيروۆكا جانە ء ۇش  جىل اسپيرانتۋرا). كوپ جىل تەك قانا ورىسشا ساباق بەردىم. ورىسشا بىرنەشە كىتاپ شىعاردىم. قازىر الماتى قالاسىندا تۇرامىن.

ءبىرىنشى ەپيزود. وسىدان ەكى جىل بۇرىن جوتەل قىسىپ دارىگەرگە باردىم. دارىگەر ورىس كەلىنشەگى قازاقشا بىلمەيدى ەكەن، ال مەن جوتەلىمدى ورىسشا سيپاتتاي المادىم. قازاقشا بىلەتىن دارىگەردى سۇراپ ەدىم: "سىزدەردىڭ باس باسىڭىزعا قازاق دارىگەر جوق", -  دەپ بىلەتىن دياگنوزىن قويىپ، اشۋىن ازەر باسا وتىرىپ ءوزى بىلەتىن دارىلەردى  رەتسەپكە جازىپ بەردى. مەن دارىگەردىڭ بەرگەن ءدارىسىن ىشۋگە باتا المادىم. ايتەۋىر، كەيىن جوتەلىم ءوزى باسىلدى.

ەكىنشى ەپيزود. ەگيپەتكە باراتىن بولىپ «تەز -تۋر» دەيتىن كومپانياعا حابارلاستىم. بىراق ولار مەنىمەن قازاقشا سويلەسۋدەن باس تارتقاندىقتان، مەن قازاقشا تىلدەسەتىن «حيكمەت تۋردىڭ» قىزمەتىن دۇرىس  كوردىم. ءسويتىپ، قازاقشا سويلەسۋدەن باس تارتقان «تەز-تۋر» بەس كليەنتىنەن ايرىلدى.

ءۇشىنشى ەپيزود. پاتەردى كۇزەتكە قويماق بولىپ، اقىلى قىزمەت كورسەتەتىن فيرماعا تەلەفون سوقتىم. تەلەفون سوققانىم بار بولسىن، الگى فيرمانىڭ قىزمەتكەرلەرىنىڭ ءبىرى:"بىزدە  قازاقشا سويلەيتىن وپەراتور  جوق", -  دەپ اراداعى بايلانىستى قيىپ تاستادى. "سىزگە ءبىزدىڭ ورىس ءتىلدى قىزمەتىمىز كەرەك بولماسا، باسقا فيرمانى تابىڭىز", - دەپ زەكىدى ول. مىنە مەن  وسى كۇندەرى قازاق تىلىندە كۇزەت قىزمەتىن كورسەتەتىن فيرما ىزدەمەكپىن.

قازىرگى زاماندا اقىلى قىزمەت تۇرلەرى، قۇدايعا شۇكىر، كوبەيىپ كەلەدى. ولاي بولسا، قازاقشا بىلمەي دياگنوز قويىپ، ءدارى جازىپ بەرەتىن شيپاگەردەن   قۇتىلاتىن كەز كەلگەن سياقتى. "بۇل تۇككە تۇرمايتىن پروبلەما، ونى ماسەلە قىلىپ، ماقالا جازۋدىڭ قاجەتى جوق" دەيتىن اعايىن از بولماس، بىراق مەنى ءوز ەلىندە ورىسشاسى جەتپەگەندىكتەن تەرىس دياگنوزدان اۋرۋىنا اۋرۋ جاماپ، نەمەسە انا دۇنيەگە "جولداما" الىپ، اياق استى كەتىپ قالاتىن باۋىرلارىمنىڭ ءحالى الاڭداتپاي قويمايدى.   

بۇگىنگى تاڭدا ورىس ءتىلىن پايدالاناتىن ورتانىڭ اياسى تارىلىپ كەلەدى. كەلتىرىلگەن ەپيزودتاردا پالەن جىل ورىسشا وقىعان ءازىمبايدىڭ ءتىلى ورىسشاعا جەتپەگەن جاعدايلار بولدى. ول راس. قازاقشا بىلمەيتىن ارنايى قىزمەتتەگى ورىس پەن قازاقتى اياپ،  كليەنت پەن  پاتسيەنتى  قۇربان ەتەمىز بە سوندا؟

ەلىمىزدىڭ بەيبىت قاتار ءومىر ءسۇرۋى قازاقتىڭ دەنساۋلىعى ەسەبىنەن شەشىلمەۋ كەرەك. كليەنتتىڭ پاتشا كوڭىلى - اقىلى قىزمەت كورسەتۋشى فيرماعا بايلانىستى بولسا، قازاق ءتىلدى كليەنت ءوز مۇددەسىنەن ايرىلماۋ كەرەك. ەڭ ماڭىزدىسى - قازاق ءتىلدى كليەنتتىڭ قۇقىعى ونىڭ جەكە باسىنىڭ وجەتتىگى مەن  تالاپشىلدىعى  ارقىلى شەشىلۋ كەرەك پە دەپ ويلايمىن.

مەن ءتىپتى مەملەكەتتىك ءتىل تۋرالى اۋىز اشپاي وتىرمىن. «قورعاۋ» قىزمەتى فيرماسىنىڭ ءتورتىنشى وپەراتورىنىڭ ايتۋىنشا، كوپ ۇلتتى قازاقستاندا كورەي تىلىندە قىزمەت كورسەتۋ ەشكىمنىڭ مىندەتى ەمەس. سولاي دەلىك. بىراق، مەن  كورەي تىلىندە سويلەپ، وپەراتوردىڭ باسىن اۋىرتىپ، جانىن قيناعان جوقپىن عوي. وپەراتور مەنىڭ تالابىمدى كليەنتتىڭ تالابى ەمەس، ۇلتشىل قازاقتىڭ ورىنسىز لاڭى دەپ وتىر.

ءبىر ۇسىنىس. ءيا، قازاق ءتىلىنىڭ قاجەتتىلىگى ءبىر قازاقتىڭ قىرسىقتىعىنان تۋعان ماسەلە ەمەس. قازاق ءتىلى بولماسا، بىزگە بۇل مەملەكەتتە ءومىر ءسۇرۋ قيىنعا سوعار ەدى... ءتىل ساياساتىنا وكپەلەپ،  مەن قازاقستاننان قاشپاق ەمەسپىن. سولاي ەكەن، ەندەشە وركەنيەتتى كۇرەس جولىن تاڭدايىق. ول - قازاق كليەنتتەرىنىڭ تولىق دارەجەدە قازاق تىلىندە قىزمەت كورسەتۋدى تالاپ ەتۋى بولىپ تابىلادى. باسقا جاعدايدا – قازاقشاسى بار، ساپالى قىزمەت كورسەتەتىن جەرگە تايىپ تۇرۋ كەرەك. ول جاعداي دۇكەندەرگە، شاشتارازدارعا، اسحانالارعا، ءتىپتى،  دارىگەرلەرگە قاتىستى  بولۋى دا مۇمكىن...

Abai.kz