شىلدەنىڭ 22-سىنەن، 23-ىنە قاراعان ءتۇنى، ساعات ءۇش شاماسىندا قارعالى وزەنىنىڭ سۋ دەڭگەيى كوتەرىلىپ، قاراعايلى جانە تاۋسامالى شاعىن اۋداندارىنىڭ كەيبىر جەرلەرىن سۋ باستى.  الماتىداعى سەلدەن قالاداعى ءۇش اۋداننىڭ ۇيلەرى زارداپ شەككەنى تۋرالى Tengrinews.kz  قالا اكىمىنىڭ ورىنباسارى يۋري يلينگە سىلتەمە جاساپ حابارلادى.

"شامامەن ساعات 2.15-تە ءبىز "قازسەلدەنقورعاۋدان" قارعالىنىڭ شاراسىنان شىققانى تۋرالى حابار الدىق. بۇل وزەننىڭ كولەمى 40 مىڭ تەكشە مەتر بولعان. سۋدىڭ كوتەرىلۋى سەل تاسقىنىنا الىپ كەلدى. سەل قارعالى بوگەتىنە دەيىن باردى، تولقىننىڭ 10-12 مەتر بولدى، ياعني سۋدىڭ كوپ كولەمىن بوگەت ۇستاپ قالدى. سەكۋندىنا 10-12 تەكشە مەترمەن اعىپ جاتقان قارعالى وزەنىنىڭ ارناسىن باقىلاپ وتىرمىز. وزەن ءۇشىن بۇل وتە ۇلكەن اعىس. سەلدىڭ ناتيجەسىندە ءۇش اۋدان زارداپ شەكتى. ناۋرىزباي باتىر اۋدانىنداعى چاپاەۆو ەلدى مەكەنى كوبىرەك زارداپ شەكتى. اۋەزوۆ اۋدانىنا دا ءىشىنارا زارداپ كەلدى. الاتاۋ اۋدانىنداعى العاباس اۋىلىنىڭ 97 ءۇيىن سۋ باستى. سەل بۇل اۋداندارعا قايتا قاۋىپ ءتوندىرىپ تۇرعان جوق", - دەدى يلين. 

"دەمالىس كۇندەرى جاۋىن-شاشىننىڭ اسەرىنەن تاۋلى ايماقتاردا وزەندەر ارناسىنان شىعىپ كەتۋى مۇمكىن. قازىر "قازسەلدەنقورعاۋ" باقىلاپ وتىر. قاتەردىڭ الدىن الۋ ماقساتىندا قاجەت بولسا پروفيلاكتيكالىق شارالار جۇرگىزەمىز", - دەدى اكىم ورىنباسارى. ول №6 جانە ۇلكەن الماتى كولىنىڭ باقىلاۋدا ەكەنىن ايتتى.ء يليننىڭ ايۋىنشا، بۇل جەرلەردە جاعداي تۇراقتى. سۋ باسقان اۋماقتارداعى سۋدى شليۋز ارقىلى ارناعا ءتۇسىرۋ جۇمىستارى ءجۇرىپ جاتىر. سۋ بوگەتى جارىلعان جوق. قازىرگى ۋاقىتتا سۋ ەكى شليۋز ارقىلى اعىپ جاتىر. جاقىن ماڭداعى ەلدى مەكەننىڭ تۇرعىندارى ەۆاكۋاتسيالاۋ جۇمىستارى ءجۇرۋ ۇستىندە. وقيعا ورنىندا قۇتقارۋشىلار، پوليتسيا، تجد قىزمەتكەرلەرى جانە اكىمپدىكتىڭ وكىلدەرى جۇمىس ىستەپ جاتىر - شامامەن 440 ادام.

№176 ورتا مەكتەبىندە، سونداي-اق ناۋرىزباي اۋدانىنىڭ اكىمدىگىندە زارداپ شەككەن تۇرعىندارعا مەديتسينالىق كومەك كورسەتۋ، اۋىز سۋمەن جانە ازىق-تۇلىكپەن قامتاماسىز ەتۋ بويىنشا ارنايى پۋنكتەر قۇرىلعان. 
قارعالى وزەنىنىڭ بوگەتى اۋدانىندا 191-دەن استام جەرگىلىكتى تۇرعىن، سونىڭ ىشىندە 3 بالا قاۋىپسىز جەرگە كوشىرىلگەن. دەنساۋلىق ساقتاۋ باسقارماسىنىڭ مالىمەتىنشە، قازا تاپقاندار جوق، 6 ادام مەديتسينالىق كومەككە جۇگىنگەن، 3 ادام اۋرۋحاناعا جاتقىزىلدى. الماتى تجد سەلدىڭ ەكىنشى رەت قايتالانۋى مۇمكىن دەگەن اقپاراتتى جوققا شىعارىپ وتىر. 

اكىم احمەتجان ەسىموۆتىڭ الماتىداعى سەلدىڭ تىكۇشاقپەن ارالاۋى تۇسىرىلگەن ۆيدەوسى مەن سۋرەتتەرى دە جاريا بولدى. ۆيدەودا بۇزىلماعان سۋ بوگەتى كورىنەدى. ال ەلدىمەكەندى سۋ باسقان. سوڭعى مالىمەت بويىنشا، سەلدەن كەيىن الماتىدا 280-نان استام ادام ەۆاكۋاتسيالاندى. ونىڭ بارلىعى №176 ورتا مەكتەپ پەن ناۋرىزباي اكىمدىگىنىڭ عيماراتىنا جەتكىزىلدى. قر ۇلتتىق ۇلانى "وڭتۇستىك" وڭىرلىك قولباسشىلىعى 5571, 28237 اسكەري بولىمدەرىنىڭ جەكە قۇرامى جۇمىلدىرىلدى. 

ەستەرىڭىزگە سالا كەتەتىن بولساق، اقپارات قۇرالدارى 21 شىلدە دە: «قازگيدرومەتتىڭ» رمك الماتى وبلىسىندا سەل جۇرەتىنى تۋرالى حابارىن جاريالاعان بولاتىن.

«اۋا تەمپەراتۋراسىنىڭ كوتەرىلۋىنە بايلانىستى 21-23 شىلدە ارالىعىندا الماتى وبلىسىنداعى تاۋ سىلەمدەرىندە سەل ءجۇرۋى مۇمكىن»، دەلىنگەن ەدى  حابارلامادا. الايدا، تۇرعىندارعا سەلدەن ەسكەرتىپ ەشقانداي SMS حابارلاما كەلمەگەن.

اكىمنىڭ ورىنباسارى SMS-حابارلامانىڭ تاراتىلماۋىنا دا پىكىر ءبىلدىردى. ونىڭ ايتۋىنشا، ۇيالى بايلانىس وپەراتورلارى الماتىلىقتارعا سەل جونىندە sms حابارلاما جىبەرۋدەن باس تارتقان. بۇل دەرەكتەر الداعى ۋاقىتتا تەكسەرىلمەك.

ايتا كەتەر بولساق، توتەنشە جاعدايلار كەزىندە حالىقتى حاباردار ەتۋ جۇيەسىنە ءوزىنىڭ بارلىق رەسۋرسىن جۇمىلدىرتىندىعى تۋرالى 2012 جىلى قىركۇيەكتە مينيستر ۆلاديمير بوجكو ۇكىمەتتىڭ كەزەكتى وتىرىسىندا مالىمدەگەن ەدى.
«قازىرگى تاڭدا قازاقستاننىڭ ءاربىر ەلدى مەكەنى ءبىرتۇتاس جالپىمەملەكەتتىك جۇيەمەن ىقپالداسقان جانە بەيبىت جانە اسكەري كەزەڭدەگى توتەنشە جاعدايلارعا حالىقتىڭ دەر كەزىندە ءۇن قاتۋىن قامتاماسىز ەتەتىن ءوز جەدەل حابارلاندىرۋ جۇيەسى بولۋى كەرەك. حالىقتى ۇيالى بايلانىس وپەراتورلارىنىڭ كومەگىمەن حاباردار ەتۋدى ۇيىمداستىرۋ ماسەلەلەرىنە دە ۇلكەن نازار اۋدارىلۋدا. قازىرگى تاڭدا استانا، الماتى قالالارى مەن جامبىل وبلىسىندا SMS ارقىل شۇعىل حابار تاراتۋ جونىندەگى تەحنيكالىق شەشىم ىسكە اسىرىلعان» دەگەن ەدى ۆ.بوجكو 3 جىل بۇرىن ء وز سوزىندە. 

اپات تۋرالى الەۋمەتتىك جەلى قولدانۋشىلارى دا وزدەرىنىڭ پاراقشالارىندا جازدى. ولار سونداي-اق، اكىمدىكتىڭ توتەنشە جاعدايلارعا دايىن ەمەس ەكەنىن سىناپ، اپاتتان قاشقان تۇرعىنداردىڭ سۋرەتتەرىن ءبولىستى.

Abai.kz