وڭتۇستىك قازاقستاندا كامەلەتكە تولماعان 350-دەن اسا جۇكتى قىز ەسەپتە تۇر. مۇنداي ساندى وكق-دا وتكەن بريفينگ بارىسىندا قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا مۇشەسى بەكسۇلتان تۇتقىشەۆ اتاعان. بۇل تۋرالى tengrinews.kz حابارلادى.

"دەنساۋلىق ساقتاۋ باسقارماسىنىڭ مالىمەتىنە سايكەس، جاسى 12-گە ەندى تولعان، بىراق 17-گە تولماعان 350-دەن اسا جۇكتى قىزدىڭ ەسەپتە تۇرعانى انىقتالدى. دارىگەرلەردىڭ ايتۋىنشا، ونىڭ سوڭى جاعىمسىز ارەكەتتەرگە اكەپ سوعادى جانە ول قىزدار مەن جاڭا تۋىلعان سابيلەردىڭ دەنساۋلىعىنا اسەر ەتەدى", - دەگەن تۇتقىشەۆ.

«ولاردىڭ اتا-انالارى، اعالارى بار. ەندەشە مۇنداي جاعدايعا قالايشا تاپ بولدى؟ بۇل جەردە پروبلەمانىڭ بارلىعىن مەملەكەتكە ارتا سالۋعا بولمايدى، پروبلەما ۇيدەگى تاربيەدەن، وتباسىدان شىققان دەر ەدىم", - دەيدى تۇتقىشەۆ جەرگىلىكتى باسقارۋ ورگاندارىنان العان دەرەگىنە سۇيەنىپ.

بۇعان دەيىن جىنىستىق جانە رەپرودۋكتيۆتىك ساۋلىق جونىندەگى قازاقستاندىق قاۋىمداستىقتىڭ باسشىسى گالينا گرەبەننيكوۆا جاسوسپىرىمدەر اراسىنداعى جۇكتىلىك دەڭگەيىنىڭ جوعارى قالىپتا ساقتالىپ وتىرعانىن ايتقان بولاتىن.

اباي-اقپارات