رەسەي استاناسى ماسكەۋدە 160 مىڭعا جۋىق ادام مۇسىلمانداردىڭ قاسيەتتى مەرەكەسى ورازا ايتتى تويلادى. BBC-ءدىڭ جازۋىنشا، بۇل تۋرالى رەسەيدىڭ ءىىد ماسكەۋ بويىنشا ءباسپاسوز قىزمەتى حابارلاعان. ال، رەسەيدىڭ Polit Russia ينتەرنەت جۋرنالى ايت نامازىنا جينالعان قارا ءنوپىر قاۋىمنىڭ اۋەدەن تۇسىرىلگەن ۆيدەوسىن جاريالادى.

ءوز كەزەگىندە، رەسەي پرەزيدەنتى پۋتين مۇسىلمانداردى قاسيەتتى ورازا ايت مەرەكەسىمەن قۇتتىقتادى. ول مۇسىلمانداردىڭ رەسەيدىڭ قوعامدىق ومىرىنە بەلسەنە قاتىسىپ كەلە جاتقانىن، قوعامدىق تەڭدىك پەن بەيبىتشىلىكتى ساقتاۋدا ماڭىزدى رول الاتىنىن ايتقان.

اقپاراتتا كورسەتىلگەندەي، مۇسىلمانداردىڭ مەرەكەسىندە قوعامدىق ءتارتىپتى قاداعالاۋعا 4 مىڭنان استام پوليتسەيلەر، ىشكى اسكەر قىزمەتكەرلەرى مەن قىراعى توپ قاداعالاۋ جاساعان. ازىرگە ەشقانداي زاڭ بۇزۋشىلىق تىركەلمەگەن.

ايت مەرەكەسى بايلانىسىمەن ماسكەۋدىڭ كەيبىر باعىتتارىنداعى قوزعالىس شەكتەلگەن، اتاپ ايتقاندا: ماسكەۋدىڭ كۇمبەزدى مەشىتى اۋدانى جانە ۇلكەن تاتار كوشەسىندەگى مەشىتتەرگە قاتىنايتىن جولداردا ايت نامازىنا جينالعان قاۋىم ساپقا تۇردى.

بيىلعى جىلى مۇسىلماندارعا مەشىت جەتىسپەۋشىلىگىنەن ايت نامازىن وتەۋگە ماسكەۋ بيلىگى بەس ۋاقىتشا ورىن تاعايىنداپتى.

سونداي-اق، ماسكەۋ قالاسىندا شىلدە ايىنىڭ 11-كۇنى باستالعان حالىقارالىق قۇران فەستيۆالى بۇگىنگە دەيىن جالعاستى. قۇران كورمەسىنە الەمنىڭ تۇكپىر-تۇكپىرىنەن قاسيەتتى جازبانىڭ نەبىر نۇسقالارى قويىلدى.

ءبىر كەزدە قىلىشىنان قان تامعان قىزىل يمپەريا سوۆەت وداعى قول استىنداعى ەلدەردە يسلامنىڭ وشاعىن ءسوندىرىپ، قۇرانداردى ورتەگەن، مولدا-قاريلاردى يتجەككەنگە ايداعان ەدى. ەندى مىنە، 12 ميلليون تۇرعىنى بار ماسكەۋدىڭ ايتارلىقتاي بولىگى بيلىكتىڭ ءوزىنىڭ قامقورلىعىمەن ناماز وتكىزدى. قازاق «ەلۋ جىلدا ەل جاڭا، ءجۇز جىلدا قازان جاڭا» دەيدى. قاتال ساياساتىمەن اتى شىققان ماسكەۋدەگى بيلەۋشىلەرگە دە يمان ۇيالاسا ەكەن دەيمىز.

Abai.kz