رەسەيلىك LifeNews تەلەارناسى پەتر پوروشەنكونىڭ ءانۇران ايتىپ تۇرعانى تۇسىرىلگەن ۆيدەوعا اتىشۋلى «بورات» فيلمىندەگى قازاقستاننىڭ ء«انۇرانىن» سالىپ، جازىلعان ۆيدەوروليك جاريالادى.

ۇلىبريتانيالىق سايقىمازاق ساشا بارون كوەن جازىپ، باستى ءرولىن سومداعان «بورات» جاۋاپسىز قالدىرعان ءفيلىمىن بيلىك ۇمىتسا دا، قورلانعان قازاق ءالى ۇمىتپاعان شىعار. سول قازاقتى كەشە رەسەيدىڭ اۋقىمدى ايماققا حابار تاراتىپ جۇرگەن ارناسى تاعى قورلادى.

بۇعان نارازى قوعامدىق تۇلعالار قازىردىڭ وزىندە ءوز پايىمدارىن جازىپ، قازاقستان اۋماعىندا LifeNews سايتىنىڭ تارالىمىنا تىيىم سالۋدى تالاپ ەتىپ جاتىر.

نارازىلىق بىلدىرگەن ەكس-مينيستر، «ورلەۋ ۇلتتىق ورتالىعى» اق ديرەكتورلار كەڭەسىنىڭ توراعاسى ابەنوۆ Facebook الەۋمەتتىك جەلىسىندە مەملەكەتتىك ورگاندارعا قاراتا:

«قازاقستاندى قورلاعان ۆيدەونى ءوشىرتىپ، كەشىرىم سۇراۋدى تالاپ ەتۋ كەرەك. بىزدە ونداي قۇقىق بار عوي. باس پروكۋراتۋرانىڭ ەلىمىزدى اشىق تۇردە ينتەرنەت ارقىلى وسىلاي قورلاپ جاتقاندارعا نەگە جاۋاپ بەرمەيتىنىن تۇسىنبەيمىن. ەلەكتروندى باق-تى باقىلاۋى ءتيىس ءبىزدىڭ شەنەۋنىكتەردى جاۋاپكەرشىلىككە تارتىپ، شارانىڭ قولدانىلۋىنا باستاماشىلىق ەتۋ كەرەك. ءبىزدىڭ زاڭدى قالاي بۇزىپ وتىرعاندارىن كورىپ رەسمي تۇردە ارەكەتسىزدىك دەپ تانۋ قاجەت. ءبىز بۇل ەرەجەلەردى وزىمىزدىكىلەردى جازالاۋ ءۇشىن عانا جەتىلدىرمەيمىز عوي. نەمەسە دوستاستىق ەلىنە قارسى كەزەكتى رەت ۇندەمەي قالامىز با. ىشتەن تىنامىز... مەن، مىسالى، قر ازاماتى رەتىندە مەنىڭ ەلىمنىڭ ابىرويىن ساقتاۋدى تالاپ ەتەمىن! قاجەت بولسا رەسمي ۇندەۋ جازۋعا دايىنمىن»، - دەپ ءزىلدى جازبا جازدى.

ال، بەلگىلى ەكونوميست مۇحتار تايجان ءوزىنىڭ جازباسىندا:

«كەشە، رەسەيلىك تەلەكومپانيا ۋكراينا پرەزيدەنتى پەتر پوروشەنكونى «بورات» فيلىمىندەگى قازاقستان گيمنىن ايتىپ تۇرعانداي كورسەتەتىن، قازاقستاندى قورلاعان تەكستپەن مونتاج كورسەتتى. مۇنداعى اڭگىمە كەشەگى كيەۆتە ءساتتى وتكەن قازاقستان مەن ۋكراينانىڭ ۇكىمەت ارالىق كوميسسيانىڭ وتىرىسىنا بايلانىستى. مىناۋ نادان ارازدىق ۋكراينا مەن ءبىزدىڭ ەلىمىزدىڭ اراسىنداعى باۋىرلاستىققا سىزات تۇسىرۋگە باعىتتالعان. جالعىز سۇراق: ء بىزدىڭ ارناۋلى ورگاندار تاعى دا مىڭقيىپ قالا ما؟ ءبىزدىڭ ەلدە Lifenews-قا تيىم سالۋ كەرەك»، - دەدى.

بۇل كۇندە مازاققا قازاقتىڭ ەتى ۇيرەنگەن. قۇزىرلى ورگانداردىڭ ۇندەمەستىگى مەن قازاقتاردىڭ كونبىستىگى قوسىلىپ، وزگەلەردىڭ ەگەمەندىگىمىز بەن مەملەكەتتىك قۇندىلىقتارىمىزعا قول سۇعۋىنا جول بەرىپ كەلەدى. بىلتىر كوكتەمدە جيرينوۆسكي قازاققا قاراتا قانداي شىرىك ءسوز ايتىپ ەدى، ال جاز اۋعاندا پۋتين قازاققا تاريحى جوق، مەملەكەتى بولماعان ەل دەدى.  جىل وتپەي رەسەي تاراپىنان تاعى قورلاۋ ءجۇردى. قۇزىرلى ورگاندار مەن ازاماتتىق قوعام بىرىگىپ، بۇنداي سوراقىلىققا دەر كەزىندە توقتاۋ سالماسا كۇز كەلگەنگە دەيىن تاعى قانداي جەلكەلەۋگە تۇسەتىنىمىزدى كىم ءبىلسىن؟!

Abai.kz