ماستانۋدىڭ (ماس بولۋدىڭ) كادىمگى الكوگولدىك ىشىمدىكتەرگە ماس بولۋدان بولەك، وزگە تۇرلەرى دە وتە كوپ قوي، ساناپ تاۋىسا المايسىڭ! اتاققا ماستانۋ، بايلىققا ماستانۋ، ءوز كوركىنە ماستانۋ (نارتسيسستىك) ، ت.س.س. نەسىن ايتاسىڭ، تولىپ جاتىر! بىراق، تومەندەگىدەي ماستىقتاردىڭ دا بولاتىنىن مەن كەيىنگى جىلدارى عانا ءوز كوزىممەن بايقاپ-كورىپ، قايران قالدىم!..

بىردە، ءبىر تويحانادا ءبىر توپ تۆورچەستۆو ادامدارى باس قوستى. ىشىندە مەن دە بارمىن. ونداي ورتانىڭ سونداعى "ورتاق قىزۋىن" سۋرەتتەپ ايتىپ بەرۋدىڭ ءوزى وتە قيىن شارۋا!.. جاسىراتىنى جوق، ءبىراز شاماعا دەيىن "كاۋسارلاتىپ" تا باقتىق. اسابامىز جاس، اقىن جىگىت بولاتىن. ايتارى جوق، "كىلەڭ جىن-پەرىلەردى" ءتاپ-ءتاۋىر-اق باسقاردى. اركىمىمىزبەن ازىلدەسىپ تە، قالجاقتاسىپ تا ءجۇردى، ارمانسىز. بىراق، تويدىڭ سوڭىنا تامان، الگى اسابا باۋىرىمىز كادىمگىدەي ماس بولدى دا قالدى! ءتىپتى، سويلەۋگە اۋزىنىڭ يكەمى دە كەلمەي، بىردەمە دەپ "بىلدىر-بىلدىر" ەتەدى. ەگەر، بىزبەن بىرگە "شاراپتانىپ" جۇرسە ءبىر ءسارى عوي; ول - مۇلدە ىشپەيتىن، "تارتپايتىن", "اتپايتىن" ناعىز نامازقور جىگىتتەردىڭ "سىرتتانى" ەدى-اۋ!.. بىزبەن بىرگە شاتتانامىن دەپ ءجۇرىپ، شاراپ ىشپەي-اق، سونداي كۇيگە ۇشىرادى!
"جىن-پەرىلەردىڭ ورتاق قىزۋىندا" الاپات كۇش بارلىعىنا سوندا كوزىم جەتتى!
تاعى بىردە، ءبىزدىڭ ۇيگە ءبىر باۋىرىم كەلدى، ءوزىن كلاسسيك جازۋشى سانايتىن. كەلدى دە، قوناق بولمەدە ادىراڭكوزدەنە ارلى-بەرلى ادىمداي ءجۇرىپ، ءوزىنىڭ جاڭادان جازىپ بىتىرگەن "سۋپەر" شىعارماسى جايىندا ەسىپ ءبىر سويلەدى-اي كەپ-كەپ!.. ۇيگە اراق ىشپەي، ساۋ كەلگەنىن انىق بىلەم. سودان، داستارحان جايىلدى، شاراپ قويىلدى. بايقاساق، الگى "كلاسسيك" باۋىرىم، - بوتەلكە تىعىنى اشىلماي جاتىپ-اق، - قىپ-قىزىل ماس!.. ەلىرگەن كوڭىل مەن ەسىلە سويلەنگەن ءسوزدىڭ اراقتان دا اسقان قۋاتى بارلىعىن مەن سوندا كوردىم. كوردىم دە،.. نەبىر ماستىقتار جايىندا دا "كىسىولتىرەرلىك" سوزدەر ايتىپ كەتكەن ابايدىڭ اسقان دانالىعىنا قايتا قۇلادىم. ءبىر-اق مىسال: "ەسەر كىسى ەر-توقىمىن تاستاپ، بوركى ءتۇسىپ قالىپ، ەتەگى اتىنىڭ كوتىن جاۋىپ كەتىپ، ەكى كوزى - اسپاندا، جىندى كىسىشە شابا بەرۋدى بىلەدى ەكەن; - سونى كوردىم" (اباي. "ون بەسىنشى ءسوزدىڭ" ءتۇيىنى).

Abai.kz