كوپتەن بەرى كوپتىڭ كوڭىلىندە قالاتىنداي ءماندى دە جاندى ءسوز ايتپاعان پارلامەنت سەناتىنىڭ توراعاسى قاسىمجومارت توقاەۆ كەشە «اتىنىڭ باسىن» اجەپتاۋىر جىبەرىپ-جىبەرىپ الدى. اسىرەسە كوپتەگەن زاڭ جوبالارىنىڭ مينيسترلىكتەر تاراپىنان وتە-وتە اسىعىس دايىندالاتىنىن اتاپ ايتتى. سانى بار دا... ساپاسى سىن كوتەرمەيتىن زاڭ جوبالارىنىڭ قالاي بولسا سولاي «شاپقىلاپ» كەپ – پارلامەنت «ەسىگىن تىقىلداتىپ» تۇراتىنىن تىلگە تيەك ەتتى. جاپ-جاقسى ايتتى. مادەنيەتتى تۇردە ايتتى. تىڭداعان قۇلاق بولعان بولسا البەتتە.

«مەملەكەت باسشىسىنىڭ «قازاقستان-2050» ستراتەگياسىن جۇزەگە اسىرۋ جونىندەگى ءىس-شارالارعا قاتىستى 113 زاڭ جوباسى قارالدى. قارالدى دا – قابىلداندى، - دەدى قاسىمجومارت مىرزا، - بۇلاردىڭ ىشىندەگى ەلباسىنىڭ مەملەكەتتى باسقارۋدىڭ تيىمدىلىگىن ارتتىرۋ جونىندەگى جارلىعىن جۇزەگە اسىرۋعا باعىتتالعان ەڭ ماڭىزدى دا ماڭىزدى دەگەندەرى جەدەل تۇردە قابىلداندى. ال ەندى الداعى سەسسيالارىمىزدا كاسىپكەرلىكتى دامىتۋ ماسەلەسى الدىڭعى ورىنداردىڭ بىرىنە شىعۋعا ءتيىس، بۇل ءۇشىن البەتتە، كاسىپكەرلىك كودەكسىنىڭ جوباسى قارالاتىن بولادى. ايتسە دە ۇكىمەتىمىزگە قاراتا تاعى ءبىر قايتالاپ ايتارىم – الداعى ۋاقىتتا زاڭ جوبالارىنىڭ ساپاسىنا قاتتى ءمان بەرىلگە ءتيىس، ويتكەنى بۇگىنگى دەيىنگى ساپاسىز ءارى اسىعىس قابىلدانعان زاڭ جوبالارىندا بىرىنە-ءبىرى سايكەس كەلە بەرمەيتىن قاراما-قايشىلىقتار كوپتەپ كەزدەسەدى...»

سەنات توراعاسى، سونداي-اق، وسى سەسسيا بارىسىندا كونستيتۋتسيالىق تالاپتارعا سايكەس پالاتا قۇرامىنىڭ جاڭارتىلعانىن، ولاردىڭ ىشىندە تاجىريبەلى ماماندارمەن بىرگە ىسكەر جەتەكشىلەر مەن بەلگىلى قوعام قايراتكەرلەرىنىڭ دە بار ەكەنىن اتاپ ءوتتى. «وزدەرىڭىز بىلەسىزدەر، الداعى ۋاقىتتا ءبىزدى ۇلكەن-ۇلكەن جۇمىستار كۇتىپ تۇر. پرەزيدەنتىمىز ايتقانداي، نايقالىپ-شايقالۋعا ۋاقىت جوق...» دەدى ول ءسوزىنىڭ سوڭىندا.

نەگىزى، قاسىمجومارت توقاەۆ باسىنان باقايشاعىنا دەيىن تاپ-تازا ديپلومات ادام عوي، سودان با ەكەن – العاشقىدا ارىپتەستەرىنە «وتە-وتە مادەنيەتتى تۇردە» ۇرسىپ-ۇرسىپ العانمەنەن، اڭگىمەسىنىڭ اياعىنا قاراي وزدەرىنىڭ جامان جۇمىس ىستەمەگەنىن دە جىميىپ كۇلىپ تۇرىپ ەسىنە الدى. پارادوكس – قىسقاسىنان قايىرعاندا!

مارات ماداليموۆ.

Abai.kz