رەسەيدىڭ ليپەتسك وبلىسىندا تەرگەۋشىلەر عالامتوردا حابارلاندىرۋ بەرىپ، ءۇش جاسار ۇلىن ساتىپ جىبەرمەك بولعان ازاماتتىڭ ۇستىنەن قىلمىستىق ءىس قوزعادى. ارام نيەتتى اكە وسىلايشا باسپانا ماسەلەسىن شەشىپ الماق بولىپتى، دەپ حابارلايدى Bnews.kz

ليپەتسكتە تۇراتىن 24 جاستاعى قازاقستان تۋماسى قىلمىستىق ارەكەتى ءۇشىن 3 جىلدان 10 جىلعا دەيىن باس بوستاندىعىنان ايىرىلۋى مۇمكىن، دەپ جازادى رف تك وبلىستىق باسقارماسىنىڭ رەسمي سايتى. 

تەرگەۋ دەرەكتەرىنە سۇيەنسەك، جاس جىگىت ءۇش جاسار ۇلىن ساتىپ جىبەرۋ ءۇشىن ينتەرنەتتە حابارلاندىرۋ بەرگەن. الەۋەتتى ساتىپ الۋشى تابىلعان كەزدە، ەر ادام ونىمەن 10 شىلدە كۇنى ليپەتسكتەگى جەڭىس داڭعىلىندا كەشقۇرىم كەزدەسەتىن بولىپ كەلىسەدى. ءسابيى ءۇشىن 1,5 ملن رۋبلدان دامەلى بولىپ بارعان جىگىت ءتارتىپ ساقشىلاردىڭ قولىنا ءتۇستى. 

جاۋاپ الۋ كەزىندە ەر ادام «ويلاعانى تەك ۇلىنىڭ قامى بولعانىن، سول سەبەپتى دە ونى جاقسى وتباسىنا تاپسىرعىسى كەلگەنىن» ايتىپ، اقتالماق بولدى. 

الايدا ۇستالعان ازامات ۇلىن ساتۋدان تۇسكەن اقشاعا ءۇي الىپ، جاعدايىن جاقسارتۋدى كوزدەگەنىن دە جاسىرمادى. 

بالانىڭ اناسى وتكەن جىلدىڭ جازىندا ءسابيدى اكەسىنە تاستاپ، ءوز وتانىنا قازاقستانعا ورالعان ەكەن. 

اباي-اقپارات