اتاقتى ميللياردەر ميتتالدىڭ «باسىنا بۇلت» ۇيىرىلە باستاعانعا ۇقسايدى. وسىنداي اقپارات پايدا بولدى – بۇگىن عانا. قازتاگ-قا لوندونداعى دەرەك كوزى مالىمدەگەندەي، لاكشمي ميتتال ءوزىنىڭ قازاق ەلىندەگى، ۋكرايناداعى جانە وڭتۇستىك افريكاداعى اكتيۆتەرىن ساتۋى مۇمكىن. قازىرگى قالىپتاسقان جاعداي وسىعان كەلە جاتىر. «جاھاندىق رىنوكتەگى ونىمدەر باعالارىنىڭ كۇرت ءتۇسىپ كەتۋى لاكشمي ميتتال مەن ونىڭ يمپەرياسىنىڭ اسا قيىن جاعدايدا قالۋىنا سەبەپ بولىپ وتىر، - دەيدى اتالمىش دەرەك كوزى، - ويتكەنى وتكەن جىلدىڭ قازانىنان بيىلعى جىلدىڭ ماۋسىمىنا دەيىنگى ارالىقتا ميتتال كومپانياسى اكتسيالارىنىڭ باعاسى 60 پايىزعا دەيىن ءتۇسىپ كەتتى. سونىمەن بىرگە اينالىمداعى اقشانى تولىقتىرۋ ءۇشىن الىنۋعا ءتيىستى نەسيە پروتسەدۋرالارى دا كۇرت كۇردەلەنىپ كەتكەن. مىسالى، مۇنداي نەسيە ماسەلەسى قازاق ەلىنىڭ تەمىرتاۋىنداعى، ۋكراينانىڭ كريۆوي روگىندەگى جانە وڭتۇستىك افريكانىڭ شىعىسىنداعى بىرقاتار كاسىپورىندارىمىز ءۇشىن اسا قاجەت. بىراق وسىلاردىڭ ىشىندەگى ەڭ-ەڭ پروبلەمالى كاسىپورىن – تەمىرتاۋداعى «ارسەلورميتتال» بولىپ تۇر...»

دەرەك كوزىنىڭ قوسىمشا مالىمدەۋىنە قاراعاندا، ميتتالدان كومپانياسىنىڭ اتالمىش كاسىپورىندارىنداعى اكتيۆتەرىن جەدەل ساتۋدى ونىڭ كەلىنشەگى ۋشا مەن ۇلى اديتيا تالاپ ەتىپ وتىرعان كورىنەدى. قىسقاسى، ونشاقتى جىلدان بەرى قازاق ەلىنىڭ تەمىرى مەن كومىرىن دە، تەمىرشىلەرى مەن كومىرشىلەرىن دە ابدەن اۋرە-سارساڭعا سالىپ كەلە جاتقان ميللياردەر ميتتالدان قازاقستاندىقتاردىڭ قۇتىلاتىن كۇنى دە جاقىنداپ قالعان سياقتى. قۇعان ءبىز قۋانۋعا ءتيىسپىز بە؟ البەتتە قۋانۋعا ءتيىسپىز. سوسىن... سوسىن الدا-جالدا ميتتال مىرزا جاقىن ارادا شىنىمەن دە تەمىرتاۋىنداعى «ارسەلورىن» ساتا قالاتىنداي بولسا، ونى شەت ەلدىڭ تاعى ءبىر «ميتتالى» ساتىپ الماسىن دەيىك. وتكەن عاسىردىڭ توقسانىنشى جىلدارىنداعى توقىراۋ كەزەڭى ەمەس، اللاعا شۇكىر، ميتتالدىڭ «ارسەلورىن» «اۋاسىمەن قوسىپ» ساتىپ الۋعا شاماسى جەتەتىن قازاق بايلارى وزىمىزدە دە جىرتىلىپ-ايىرىلادى – قالتاسىنداعى قارجىسىن قايدا جۇمسارىن بىلمەي جۇرگەن. ءتىپتى بولماسا مەملەكەتىمىز ءوز مەنشىگىنە ساتىپ السىن. قالاي بولعاندا دا، «قاڭعىرتىپ جىبەرمەۋگە» تىرىسايىق تا!

مارات ماداليموۆ.

 Abai.kz