يزرايلدىك دارىگەرلەر 4 ايىندا جاسالعان ەكپەنىڭ سالدارىنان پايدا بولعان سەمەيلىك 3 جاسار تەمۇرلان ەرلانۇلىنىڭ تۇسىنىكسىز سىرقاتىنا دياگنوز قويۋعا ۋادە بەرىپتى. ارينە، تەگىن ەمەس. قىزمەت قۇنى - 50 مىڭ اقش دوللارىن قۇرايدى. تىنىسى ۇزدىكسىز تارىلعاننان ونە بويى كوگەرىپ، تالما اۋرۋعا شالدىققان ءبۇلدىرشىننىڭ اتا-اناسى كۇنىنە 4-5 رەت جەدەل جاردەم كومەگىن شاقىرۋعا ءماجبۇر. 
قالامىزداعى №1 پەرزەنتحانادا 2013 جىلدىڭ 22 اقپانىندا دۇنيەگە كەلگەن تەمۇرلاننىڭ دەنساۋلىعىندا ەشقانداي كىنارات بولماعان. سالماعى 2650 گرامم، بويى 52 سم شەكەسى تورسىقتاي ۇل بالا كەسىر تىلىگى جولىمەن بوساندىرىلادى. ۇيقىسى دا، تابەتى دە قالىپتى جاعدايدا وربىگەن ەكەن. ۆوستوچنىي كەنتىندەگى وتباسىلىق دارىگەرلىك ەمحانادا ءتورت ايىندا اكدس پريۆينار ەكپەسىن سالدىرتقاننان كەيىن اياقاستى جانساقتاۋ بولىمىنە تالما اۋرۋىمەن تۇسەدى. كىشكەنتايدىڭ ءومىرىن ساقتاپ قالۋدا دارىگەرلەر ءۇش كۇن كۇرەسەدى. «سول كۇننەن باستاپ بۇگىنگى كۇنگە دەيىن ۇلىمىزدىڭ تالما اۋرۋى مەن دەنە قىزۋى توقتاماي تۇر. 2013 جىلى ساۋىردە استانا قالاسىنداعى «انا مەن بالا» ۇلتتىق عىلىمي ورتالىعىنىڭ جۇيكە جۇيەسى بولىمىندە 10 كۇندىك ەم قابىلداعاندا دا ء«فيبريلدى تالۋ» دەگەن دياگنوز قويىلدى»، - دەيدى تەمۇرلاننىڭ اناسى ءاسيا ورازالينا. دەنەسى قىزعاندىقتان تالما سىرقاتىمەن اۋىرا بەرەدى دەپ ەسەپكە الىپ، مۇگەدەكتىككە شىعارادى اق حالاتتىلار. ارتىنشا مرت ارقىلى باسىنا تەكسەرۋ جاساعاندا باس ميىنىڭ انومالياسى جانە گيدروتسەفاليا، ياعني باس ىشىندە سۋ جينالۋدا دەگەن قوس بىردەي دياگنوز قوسىلادى. اناسى ۇلىنىڭ، ءتىپتى، سىرتتاعى توعايدىڭ جاپىراعى جىبىرلاعاندا اۋا جەتپەي كوگەرىپ سالا بەرەتىنىن، قاتتى دىبىستاردان دا شوشىناتىنىن اڭعارادى. بالانىڭ ىستىعى ءتورت اي بويى تۇسپەيتىن حالگە جەتكەن سوڭ، جولداسى ەرلان بەكپوسىنوۆپەن الماتىداعى ەپيلەپسيا جانە تالما جاعدايىن زەرتتەيتىن س.ۆ.ساۆينوۆتىڭ كلينيكالىق ورتالىعىنا سوڭعى اقشالارىنا بارىپ، ەمدەتۋمەن بولادى. دارىگەر بۇرىن قابىلداپ جۇرگەن دارىلەردىڭ تالمانى قوزدىراتىنىن ايتىپ، دوزاسىن ازايتۋعا كەڭەس بەرگەنىمەن، ناتيجەسى شامالى بولعان. قالامىزداعى جۇقپالى اۋرۋلار اۋرۋحاناسىنا تاعى دا اۋا جەتپەۋ سالدارىنان كوگەرىپ تۇسكەن تەمۋرلان جانساقتاۋ بولىمىندە ءبىر جارىم اي جاتادى. اق حالاتتىلار الماتىدان قۇنى 100 مىڭ تەڭگە تۇراتىن قاندى ۇشاقپەن الدىرتادى. كونسيليۋمدە دارىگەرلەر سىرقات بالانى قايتادان استاناعا جولداۋ تۋرالى شەشىم قابىلدايدى. ەلوردادا «ماكلەود سيندرومى» دەگەن دياگنوز راستالادى. ياعني، قوس وكپەسىنىڭ تەك بىرەۋىمەن عانا تىنىس الاتىن ءبۇلدىرشىننىڭ جاعدايى راسىمەن-اق اۋىر. سول جاق وكپەسى جەتىلمەي قالعان، ۋلترادىبىستىق زەرتتەۋدە ءتۇسسىز بولىپ كورىنگەن. جارامدى وكپەسىنىڭ ءوزى تەك 70 پايىزعا جۇمىس ىستەپ تۇر. ەكى وكپەنىڭ جۇمىس جاساۋىنا تولعان قاقىرىقتار كەدەرگى جاسايدى. وكپە ءۇستى قاتپارلانىپ ەتتەنىپ، قابىرعا مەن وكپە اراسىندا دا دوعا تارىزدەنىپ قيسايىپ كەتكەن. وڭەش جولى كىشىرەيىپ، دەم مەن تاماقتىڭ وتۋىنە قولايسىزدىق تۋدىرىپ، دەمىكپە اۋرۋىنان باستا سۇيىقتىق مولشەرى كوپ پايدا بولىپ، تالما اۋرۋى ميدىڭ دۇرىس جۇمىس جاساماي، ءار جاسۋشانىڭ بۇزىلۋىنا اكەپ سوعۋدا. سول جاقتاعى جارامدى وكپە بولسا جۇرەككە قىسىم بەرۋدە. ونىمەن قوسا، سيندورم دراۆە - ەپيلەپتيكالىق ەنتسەفالوپاتيا، ياعني ىشتەگى دەنە قىزۋى شىقپايتىن اۋرۋ ءتۇرى، سونداي-اق تۋمىسىنان وڭەش ساڭىلاۋىنىڭ كىشكەنتايلىعى دا ءبۇلدىرشىندى اۋىر حالگە ۇشىراتىپ وتىرعانى بەلگىلى بولادى. قازىرگى تاڭدا تەمۇرلاننىڭ وڭەشىنىڭ قىسىلۋىنان اۋا جەتپەي، جۇرەك اۋرۋى پايدا بولىپ، ۇزدىكسىز قان قىسىمى كوتەرىلىپ، ءىى دارەجەلى گيپەرتونزيا مەن كارديوميوپاتيا دا مازالاۋدا. سالماعى ءبىر عانا ايدىڭ ىشىندە 18 كەلىدەن 12-گە ءتۇسىپ كەتكەن ەدى. قازىر گورمونالدى ءدارىنىڭ ارقاسىندا سالماعى رەتتەلگەن. بالا تۇگىلى، ەرەسەك ادامنىڭ ءوزى مۇنداي اۋىر ءحالدى كوتەرە المايدى. 
«بالامنىڭ جاعدايى اعىمداعى جىل باسىنان بەرى كۇرت تومەندەپ كەتتى. رەانيماتسيادان كوز اشپايتىن بولدىق. جەرگىلىكتى دارىگەرلەر استاناعا تەلەكوپىر ۇيىمداستىرىپ، دەنساۋلىعى رەتتەلگەن سوڭ استاناعا كەلۋلەرى ءتيىس دەگەن شەشىمگە كەلەدى. بىراق تەمۇرلانىم ساۋىعا قويمادى... 16 ماۋسىمدا قايتادان تەلەكوپىر بايلانىسى شىققاندا ەلوردالىق اق حالاتتىلار قولدانىپ جۇرگەن دارىلەر مولشەرىن تاعى دا كوبەيتۋدى ۇيعاردى، ولار قازاقستاندا مۇنداي اۋرۋدىڭ الدىن الۋ شارالارى جوق، ەمى دە جوق دەپ وتىر»- دەيدى كوزىنىڭ جاسىن توقتاتا الماعان سىرقات بالانىڭ اناسى. 
«ۇلىمىزدىڭ كوز جۇمار ءساتىن توس دەگەندەي شىراي تانىتادى ءبىزدىڭ دارىگەرلەر. ماكلەود سيندرومىمەن ءبىزدىڭ ەلدە ءالى ەشكىم اۋىرىپ كورمەگەن ەكەن. دياگنوزى ناقتى بولماعان سوڭ ەكسپەريمەنت تۇرىندە ءدارى-دارمەكتىڭ ءتۇر-ءتۇرىن بەرۋدە. دەرتىنە شيپا بولىپ جاتقانى شامالى، كەرىسىنشە، بالامىزدىڭ سىرقاتى كۇننەن-كۇنگە اسقىنا تۇسۋدە. سەمەيدە كەۋدەسىنە جاسالعان فليۋروگرافيادا ءبارى دۇرىس بولىپ شىقتى. ولار ۇلىمدى پنەۆمونيامەن اۋىردى دەپ ەمدەدى. ال، ەلوردالىق دارىگەرلەر ءبىر وكپەسىنىڭ ىستەن شىققانىن انىقتادى»،- دەگەندى العا تارتتى تەمۇرلاننىڭ اكەسى.
وتاندىق دارىگەرلەر قولدارىنان كەلگەنىن ىستەدىك دەپ وتىر. تەمپەراتۋراسىن ءتۇسىرىپ، تالما اۋرۋىنا شالدىققان ساتتە ۋاقىتشا عانا تويتارىس بەرۋگە قاۋقارلى. بالانىڭ وسىنداي ءبىر ەمەس، بىرنەشە سىرقاتقا شالدىعۋىنا ەكپەنىڭ سەبەپكەر بولعانىن جوققا شىعارۋدا. تىنىسى تارىلىپ، ۇستاماسى كەز-كەلگەن ۋاقىتتا ۇستاپ قالاتىن تەمۇرلاننىڭ جاعدايى تىم اۋىر. گورمونالدى پرەپارات – «پرەدنيزولوندى» قولدانعاندىقتان عانا تابەتى اشىلعان بالانىڭ. ونسىز ءنار تاتپايدى. ءبىر جاققا قاراي قيسايىپ، كەۋدەسى وڭ جاعىنان سولعا قاراي دوعا تارىزدەس بولىپ قابىرعاعا قاراي قيسايعاندىعى، دەمىكپەسى دە قاتتى بايقالادى. قۇرعاي باستاعان تەرىسى وزدىگىنەن كوگەرەتىندى تاپقان. بالا ءجيى جىلايدى، وزدىگىنەن ءجۇرۋى قاۋىپتى، ءبىر ورىندا وتىرماي، تىنىمسىزدانا شىر اينالىپ جۇرە بەرەتىنى - كۇدەلىكتى ادەتى. ءار تالمادان كەيىن بالانىڭ ەستە ساقتاۋ قابىلەتى تومەندەپ بارادى. باسىن قابىرعاعا سوعىپ، تالما اۋرۋىنىڭ ۇزاقتىعى دا ەسەلەنۋدە. 
باۋىر ەتى بالاسىنىڭ قاسىنان كۇنى-ءتۇنى ءبىر ءسات تە اجىراي الماعان انا «ارۋجان ساين» قايىرىمدىلىق قورىنا دا جۇگىنگەن. ءۇندىستان وكپەسىن اۋىستىرۋعا كەلىسكەنىمەن، ارتىنشا بالانىڭ بويىندا بىرقاتار دياگنوز بولعاندىقتان باس تارتقان. تۇركيا مەملەكەتىنىڭ اق حالاتتىلارى دا كەلىسىمدەرىنەن اينىپ قالعان ەكەن. ەندىگى ءۇمىت تەك يزرايلدىك دارىگەرلەردە عانا. ولار دياگنوزدى ناقتىلاپ بەرۋگە ۋادە بەرۋدە. ۇنەمى بايلانىسقا شىعىپ، تەمۇرلاننىڭ جاعدايىن ءبىلىپ وتىرۋداعى اتالعان ەلدىڭ دارىگەرلەرى «تۇسىنىكسىز» سىرقاتتى زەرتتەۋگە قىزىعۋشىلىق تانىتىپ وتىر، بىراق تەگىن ەمەس. ماماندىعى مەيىربيكە ءاسيا سىرقات بالا كۇتىمىمەن وتىرعاندىقتان، جۇمىسقا شىعا الماۋدا. جولداسى ەرلاننىڭ جالاقىسى كۇندەلىكتى تىرشىلىكتەرىنەن اسپايدى. «كوپ تۇكىرسە – كول» دەمەكشى، قيىن ساتتە قالعان اتا-انا ەمگە قاراجات جيناۋعا حالقىمىزدان قاسيەتتى رامازان ايىندا كومەك سۇراۋدا. 
كىشكەنتاي تەمۇرلاننىڭ ءومىرىن ساقتاپ قالۋعا ۇلەسىن تيگىزەمىن دەۋشى جومارت جاندارعا ارنايى اشىلعان بىرقاتار ەسەپشوتتاردى ۇسىنامىز:
كاسپي بانك 04722R000068112444
كازكوممەرتسبانك KZ 60926030014تF55500
بايلانىس تەلەفوندارى: 53-91-24
87755511747
87758984259

ايگەرىم ەرمىرزا