بۇگىن «ازات» قوزعالىسى قۇرىلعانىنا رەسمي تۇردە 25 جىل تولىپ وتىر. قوزعالىس قۇرىلتايىنىڭ العاشقى ءماجىلىسى  1990 جىلى، 30 ماۋسىمدا الماتىدا وتكەن بولاتىن. اتاۋلى داتاعا وراي قوزعالىس ارداگەرلەرىنىڭ ءبىرى، بەلگىلى جۋرناليست جۇماش كەنەبايدان شاعىن سۇحبات العان ەدىك.

- «ازات» قوزعالىسى ءوز ماقساتىنا قول جەتكىزدى مە؟ قايراتكەرلى بۇگىندە قايدا ءجۇر؟ 

- قازاقستاننىڭ ازاماتتىق «ازات» قوزعالىسىنىڭ نەگىزىن قالاۋشى قايراتكەرلەرىنىڭ دەنى بۇل دۇنيەدە جوق. اتاپ ايتار بولسام، «ازات» قوزعالىسىنىڭ اقساقالى جاعدا بابالىقۇلى، جەتى توراعانىڭ ىشىنەن سابەتقازى اقاتاي جانە نۇرباقىت قويشىبەكوۆ، «ازات» گازەتىنىڭ باس رەداكتوى باتىرحان دارىمبەت.

ەتنوگراف عالىم ماقاش ءتاتىموۆ زەينەتتە، مارات شورمانوۆ كاسىپكەر، گۇلجيحان بيبولدينوۆانىڭ قايدا ەكەنىن بىلمەيمىن.

سول جىلدارى قوزعالىسقا بەلسەنە قاتىسقان جاسارال قۋانىشالى، حاسەن قوجا-احمەت، ايسۇلۋ قادىرباي، سەرىك ەرعالي، ساعات ءجۇسىپ، داۋرەن ساتىبالدى، اسقار سىرعاباەۆ، راحات التاي، سامات ساقالۇلى، گۇلشات ەرۋ، ت.ب. ازاماتتار ءدىن امان، ورتامىزدا ءجۇر.

قازاقستاننىڭ ازاماتتىق «ازات» قوزعالىسى دۇنيەگە كەلگەن جىلدارى ءارتۇرلى قۋدالاۋلاردىڭ بولعانى راس. ءدال قازىر، ياعني، بۇگىندەرى سول قوزعالىسقا مۇشە بولعانداردى قۋدالاۋ تۋرالى ءوز باسىم ەستىمەپپىن.

سۇراعىڭىزعا جاۋاپتى تولىعىراق بەرۋ ءۇشىن، ەرتەرەكتە جازعان ماقالامىنان ءۇزىندى ۇسىنامىن:  «جۇماش كوكبورى.

قازاقستاننىڭ ازاماتتىق “ازات” قوزعالىسى 

ەڭ الدىمەن «ازات» قوزعالىسىنىڭ تاريحي ماڭىزى مەن ونىڭ قۇرىلۋ تاريحىنا قىسقاشا شولۋ جاساپ كورەلىك:

قازقستانداعى تۇڭعىش ساياسي ۇيىم – «قازاقستاننىڭ ازاماتتىق «ازات» قوزعالىسىندا» بولعان نەبارى ەكى جىلعا جەتەر-جەتپەس ۋاقىتىم، تۇتاستاي ءبىر عاسىرعا تاتىرلىق جىلدارىم بولعانىن نەسىنە جاسىرامىن. «ازات» قوزعالىسى ەڭ الدىمەن قازاقستان تاۋەلسىزدىگىنىڭ قارساڭىندا دۇنيەگە كەلىپ، قىسقا مەرزىمدە ەل تاۋەلسىزدىگىن جۇزەگە اسىرۋعا ولشەۋسىز ۇلەس قوسقان ساياسي ۇيىم بولا ءبىلدى. وسى جىلدار ىشىندە «ازات» قوزعالىسى:

ەڭ ءبىرىنشى, «قازاقستان» تاۋەلسىزدىگىنىڭ دەكلاراتسياسى جوباسىن دۇنيەگە اكەلدى، قازاقستان حالقىن وسىناۋ ۇلى كۇنگە ازىرلەدى،  «وداقتىق شارت» دەگەندى بولدىرماي تاستادى، «گكچپ» (بۇل توتەنشە جاعدايلار جونىندەگى مەملەكەتتىك كوميتەت دەگەندى ۇقتىراتىن)   كەزىندە «ازاتتىقتار» حالىق جاعىندا جاە قر پرەزيدەنتى جاعىندا بولىپ، توڭكەرىسشىلەردى اشىق مويىندامادى. وعان دالەل «ازات» گازەتىنىڭ «بۇلىكشىلەر» دەگەن ورتاق اتپەن توتەنشە سانىنىڭ جارىق كورۋى بولعان. قر جاڭا كونستيتۋتسياسىنىڭ جوباسىن ازىرلەگەن دە وسى «ازات» بولدى.

ەكىنشى، «ازات» - قازاقستانداعى تۇڭعىش دەموكراتيا باستاۋىندا تۇردى جانە دەموكراتيانى ءىس جۇزىندە جۇزەگە اسىرا ءبىلدى، قوزعالىستىڭ العاشقى بولىمشەسى شىمكەنتتە قۇرىلعان «بەتبۇرىس» ۇيىمىنان باستاۋ الادى. بولىمشەنىڭ تەڭ توراعالارى: شاكەن ورىنبەكوۆ، ىلەسبەك بايجانوۆ، دانيار ءىلياسوۆ، ءابىلاسان شادەنوۆتار بولدى،

ءۇشىنشى، رەسپۋبليكا جوعارعى كەڭەسى پارلامەنتىندە قارالىپ جاتقان مەملەكەتتىك ءتىل تارتىسىندا «ازات» ءوزىنىڭ سوندا دەپۋتات بولىپ وتىرعان  تەڭ توراعاسى  نۇرباقىت قويشىبەكوۆ ارقىلى جانە سول كۇندەرى «ازات» قوزعالىسى بەلسەندىلەرى ۇكىمەت ءۇيىنىڭ الدىندا وسى وقيعاعا بايلانىستى بەيبىت ميتينگى وتكىزىپ، قازاق ءتىلىنىڭ مەملەكەتتىك مارتەبەگە يە بولۋىنا زور ىقپال ەتكەنى دە جالعان ەمەس،

ءتورتىنشى، «ازاتتىقتار» «قازاقستان رەسپۋبليكاسىنىڭ ەگەمەندىگى تۋرالى دەكلاراتسيانىڭ» جاڭا نۇسقاسىن ازىرلەپ، ونىڭ قالاي دا دەر كەزىندە قابىلداۋىنا ات سالىستى،

بەسىنشى، «ازات»، 1986 جىلعى الماتىداعى ايگىلى جەلتوقسان كوتەرىلىسىنە ساياسي باعا بەرۋگە ىقپال جاساپ، باقتى جانە تار قاپاستا وتىرعان جەلتوقسان قاھارماندارىن مەرزىمىنەن بۇرىن بوساتىپ الۋعا بار كۇشتەرىن جۇمسادى، سول شارالاردى جۇزەگە اسىرۋ ءۇشىن ۇكىمەت ءۇيى الدىندا «ازاتتىق» ازاماتتار اشتىق تا جاريالادى.

التىنشى، ورال ورىس كازاكتارىنىڭ باسسىزدىقتارىن دەر كەزىندە اۋىزدىقتاتقان دا وسى قوزعالىس بولىپ، وعان «ازات» قوزعالىسىنان 113 ادام قاتىسىپ، ولاردىڭ ارالارىندا: ا.زەينۋللين، و.ساۋلەباي، ج.قۋانىشالى، ا.قادىرباەۆا، ن.ورازباەۆ، د.ساتىبالدى، س.ەرعالي سىندى قوزعالىس بەلسەندىلەرى بولدى،

جەتىنشى، بەيبىت ەلگە قىرىق جىل قىرعىن جاساپ كەلگەن سەمەي يادرولىق پوليگونىن جاباۋعا ءبىر كىسىدەي ات سالىستى، ول كەزدە سەمەيدە بولعان «ازات» بەلسەندىلەرى مىنالار ەدى: جامبىل وبلىستىق بولىمشىلەرىنىڭ باسشىلارى: ا.سىرعاباەۆ، ا.ۇسىباليەۆا، ج.ابدۋللاەۆا، ن.ءالىمۇلوۆ، ش.جالجانوۆا، سەمەيلىكتەر: ر.التايۇلى، س.ساقالۇلى، گ.ەرۋوۆا، الماتىدان:م.ەسەناليەۆ، ا.اسىلبەكوۆ، ج.كەنەبايلار بولدى، پاۆلودارداعى ەرماك باسقىنشىنىڭ (ۇيىمداستىرۋشىلار: ا.اسىلبەكوۆ، بيكەش دۇرمەنوۆا، سۆەتلانا قوندىكەروۆا، ب.دارىمبەت، د.ساتىپالدى، ت.ب.، الماتىداعى دزەرجينسكي جاۋىزدىڭ ەسكەرتكىشتەرىن كۇشپەن الدىردى «ۇيىمداستىرۋشى حاسەن قوجا-احمەت، ت.ب.), ت.ب. تولىپ جاتقان ەلىمىز ومىرىندەگى اسا ماڭىزدى وقيعالارعا ات سالىستى، قازاقستان تاۋەلسىزدىگىن باياندى ەتتى. قوزعالىستان تۇڭعىش رەت رەسپۋبليكا پارلامەنتىنە: نۇرباقىت قويشىبەكوۆ، اسقار سىرعاباەۆ، جاسارال قۋانىشالىنىڭ ءار قايسىسى ءوز كۇشىمەن جەڭىسكە جەتىپ،  دەپۋتاتتار بولدى.

بۇل جەتى تارماق - «ازات» قوزعالىسى ۋاقىت-ۋاقىتىمەن ۇلت يگىلىگى ءۇشىن جۇزەگە اسىرا بىلگەن ەڭ ماڭىزدى ساياسي شارالار بولا ءبىلدى. سونىڭ ناتيجەسىندە «ازات» قوزعالىسى شىن مانىندەگى ۇلتتىق ساياسي قوزعالىسقا اينالدى.  بۇل سول تۇس ءۇشىن ۇلكەن جەتىستىك ەدى. حح عاسىردىڭ باسىنداعى قازاق مەملەكەتتىگىنىڭ باستاۋىندا بولعان «الاشورلدا» ۇكىمەتىنىڭ سەركەلەرى: ءاليحان بوكەيحانۇلى، احمەت بايتۇرسىنۇلى، مىرجاقىپ دۋلاتۇلى، مۇحامەتجان تىنىشبايۇلى، حالەل دوسمۇحامەتۇلى، جاحانشا دوسمۇحامەتۇلى، مۇستافا شوقاي، ت.ب. ۇلت كوسەمدەرىنەن كەيىن ساياسات ساحناسىنان «ازاتتىقتار» شىققان ەدى.

قازاقستاننىڭ ازاماتتىق «ازات» قوزعالىسىنىڭ تۇڭعىش قۇرىلتايى الماتى قالاسىندا 1990 جىلدىڭ 30-ماۋسىمىندا سالتاناتتى جاعدايدا اشىلدى. ازاماتتىق «ازات» قوزعالىسىنىڭ جەتى تەڭ توراعاسى سايلانىپ، قوزعالىستىڭ جارعىسى مەن باعدارلاماسى بەكىتىلدى. قۇرىلتايدى ءۇش ادام جۇرگىزىپ وتىردى. ولار: قازاقستان كپ الماتى قالالىق كوميتەتىنىڭ بۇرىنعى ەكىنشى حاتشىسى مارات شورمانوۆ، تاريح عىلىمدارىنىڭ كانديداتى سابەتقازى اقاتاەۆ جانە قازاق سسر جوعارعى كەڭەسىنىڭ دەپۋتاتى، ساۋلەتشى ءارى قۇرىلىسشى نۇرباقىت قويشىبەكوۆ ەدى.

قۇرىلتاي بارىسىندا جەتى ادام تەڭ توراعا بولىپ سايلاندى: ميحايل ەسەناليەۆ، سابەتقازى اقاتاەۆ، مارات شورمانوۆ، نۇرباقىت قويشىبەكوۆ، سايىن شاپاعاتوۆ، گۇلجيحان بيبولدينوۆا جانە گەننادي گولوۆاستيكوۆ. ال، ماردان بايدىلداەۆ پەن ماقاش ءتاتىموۆ قۇرمەتتى توراعالار بولدى. ساكەن ءجۇنىسوۆ پەن دۋلات يسابەكوۆتەرگە «ازات» گازەتىن شىعارۋ تاپسىرىلدى (بۇل ەكى جازۋشى ول مىندەتتى اتقارا الماعان سياقتى. كەيىن، گازەتتىڭ باس رەداكتورى بولىپ - باتىرحان دارىمبەت، ورىنباسارى بولىپ، مەن، جۇماش كەنەباەۆ سايلانعان ەدىك...). 40-قا جۋىق ازامات ۇيلەستىرۋ كەڭەسىنىڭ مۇشەسى بولىپ سايلاندى.

«ازاتتىڭ» مىنا وبلىستاردا بولىمشەلەرى بولدى: وڭتۇستىك قازاقستان، اقتوبە (06.04.1991), قىزىلوردا (24.11.1990), باتىس قازاقستان (08.12.1990), جامبىل (12.01.1991), سەمەي (29.06.1991), ماڭعىستاۋ (09.12.1990), الماتى قالالىق، الماتى وبلىستىق جانە مىنا قالالاردا: كوكشەتاۋ (19.01.1991), پاۆلودار (30.03.1991), سولتۇستىك قازاقستان، جەزقازعان، قاراعاندى، قوستاناي، ت.ب.

«ازاتتىڭ» اقساقالدار القاسىنا: ماقاش ءتاتىموۆ، ماردان بايدىلداەۆ، كامال ورمانتاەۆ، ءامينا نۇعىمانوۆا، جاعدا بابالىقوۆ سايلاندى.

«ازات» قوزعالىسىنىڭ ءۇنى ءارى جاردەمشىسى «ازات» گازەتى بولدى. ونى نەگىزىنەن باس رەداكتور باتىرحان دارىمبەت جانە مەن جۇماش كەنەباي  شىعارىپ تۇردىق. بۇدان باسقا «ازات» قوزعالىسىن كەڭىنەن ناسيحاتتاپ تۇرعان «ازاتتىق» راديوسىنىڭ قازاقستانداعى بيۋروسىنىڭ باستىعى قيال سابدالين بولدى. كەيىن ونىڭ قاسىنا ساياسات بەيىسباي كەلىپ، اتسالىستى. بۇادان كەيىن باتىرحان دارىمبەت پەن مەن  ول راديونىڭ شتاتتان تىس ءتىلشىسى بولىپ، حابارلار بەرىپ تۇردىق. ال، المانيانىڭ ءمۇنح قالاسىنداعى «ازاتتىق» راديوسى قازاق ءبولىمىنىڭ ديرەكتورى حاسەن ورالتاي، تىلشىلەر: سۋات شەرۋشى، نۇركامال پىنار، ابدۋلاقاپ قارا، ت.ب. ازاماتتار قازاقستانداعى ساياسي جاعدايلاردى ءجىتى باقىلاپ وتىردى. ونىڭ ىشىندە ءبىزدىڭ «ازات» قوزعالىسىنا باستى نازار اۋدارىپ تۇردى.

«ازات» قوزعالىسىنىڭ ومىرىندەگى تاعى ءبىر ايتۋلى وقيعا، 1991 جىلدىڭ ماۋسىمىندا الماتىعا تۇركيادان ءجۇز ەلۋدەي كىلەڭ ءبىر «سەن تۇر، مەن اتايىن» دەيتىندەي، قانى سورعالاپ تۇرعان ۇلتشىل، تۇرىكشىل ازاماتتار شىعىپ، جولاي باكۋ، قازاندى باسىپ، بىزگە تابان تىرەۋلەرى بولدى. ول توپتى «ازاتتىق» راديوسى قازاق ءبولىمىنىڭ ديرەكتورى حاسەن ورالتاي، ۇلكەن تۇرىكشىل عالىم تۇران يازعان، شابان قاراتاش، شەريزات دوعرى، ەردوعان اسىلۇيجە، سىدىحان ۇلىشاي، ت.ب. ەسىمدەرى تۇرىك الەمىنە جاقسى تانىس تۇلعالار بار بولاتىن. ءۇش كۇن ولارمەن بىرگە بولىپ، ەستەن كەتپەس عاجايىپ كۇندەردى باسىمىزدان كەشكەنىمىز، حاسەن ورالتاي مەن ءامينا نۇعىمانوۆا تۇڭعىش رەت مەدەۋ شاتقالىن كۇڭىرەنتىپ، «الاش» مارشىن ورىنداعانى، ول ارادا «ازاتتىق» راديوسىنىڭ ءتىلشىسى قيال ءسابداليننىڭ بولعانى، سابەتقازى ازقاتاي، مارات شورمانوۆ، جاعدا بابالىقۇلى، حاسەن قوجا احمەت، اقىن مۇحتار شاحانوۆتىڭ قوناقتاردى ارنايى كۇتىپ العانى، كومپارتيا وكىلدەرى تولەن ابدىك پەن عادىلبەك شالاحمەتوۆتاردىڭ ءبىزدىڭ «الاش» مارشىن ورىنداعانىمىزدان شوشىپ كەتىپ، قاشا جونەلگەندىرى، تۇرىك ميللەتشىلەرىمەن جاقسى دوستىق قارىم-قاتىناس ورناتقانىمىز، بىرنەشە رەت تۇركيادا، المانيادا بولعانىمىز، سوعان كۋا...»

مىنە، قازاقستاننىڭ ازاماتتىق «ازات» قوزعالىسىنىڭ قۇرىلۋ تاريحى قىسقاشا وسىنداي بولعان.

 - «ازات» قوزعالىسىن كەيىنگى بۋىن بىلە بەرمەيدى، بۇل وسى قوزعالىستىڭ اتقارعان قىزمەتى ءوز ۋاقىتىنداعى ناۋقان عانا بولىپ قالدى دەگەن ءسوز ەمەس پە؟

- بۇل سۇراققا جوعارىدا تولىق جاۋاپ بەردىم عوي دەپ ويلايمىن.

- كەزىندە تەلە حابارلار جاساپ، تۇرىك الەمىنىڭ بىرلىگىن ناسيحاتتادىڭىز. قازىر بۇل تاقىرىپ قوعامدا قوزعالا بەرمەيدى. ءسىز نەگە توقتادىڭىز؟

- ءيا، «تۇرىك دانالارى» اتتى اۆتورلىق تەلەباعدارلامامنىڭ 1992-2000 جىلدار ارالىعىندا «قازاقستان» تەلەارناسىنىڭ تاڭعى «تاڭشولپان» باعدارلاماسىنان نەبارى جەتى مينۋت كولەمىندە العاش كورسەتىلە باستاعانى بەلگىلى. سول كەزدەگى «تاڭشولپان» رەداكتسياسىنىڭ باس رەداكتورى  يمانباي جۇباەۆتىڭ مەنىڭ بۇل اۆتورلىق تەلەباعدارلامامنىڭ كوپشىلىك اۋديتورياسىنىا كەڭىنەن تاراۋىنا قوسقان ۇلەسى ايرىقشا ەدى.

ال، 1994- 2000 جىلدار ارالىعىندا «تۇرىك دانالارى» اتتى اۆتورلىق تەلەباعدارلامام اپتا سايىن «قازاقستان» جانە «الاتاۋ» تەلەارنالارىنان تۇراقتى تۇردە كورسەتىلىپ تۇردى. وسى جىلدار ارالىعىندا بارشا تۇرىك حالىقتارىنىڭ ورتاق ۇلى تۇلعالارى: يشپاقاي، توميريس، مودە قاعان، اتيللا، بىلگە قاعان، كۇلتەگىننەن باستاۋ الاتىن ءبىزدىڭ ۇلى بابالارىمىز سانالاتىن ايرىقشا تۇلعالار تۋرالى ءار قايسىسى وتىز مينۋتتان قىرىققا جۋىق تەلە حابار ءتۇسىرىپپىن.

بۇل تەلەباعدارلامانىڭ كوپتەگەن حابارلارىنىڭ دۇنيەگە كەلۋىنە تۇركيا رەسپۋبليكاسىنىڭ قازاقستانداعى توتەنشە  جانە وكىلەتتى ەلشىسى قۇرتىلىش تاشكەنت، ەلشىنىڭ كەڭەسشىسى اللادين قورىقماز، سول كەزدەگى «ازاتتىق» راديوسى قازاق ءبولىمىنىڭ ديرەكتورى حاسەن ورلاتايدىڭ، قازاق عالىمدارى:  مامبەت قويگەلدى، الما قىراۋبايقىزى، مارات بارمانقۇلوۆ، ءامىر مولدابەك جانە ت.ب. ازاماتتاردىڭ قوسقان ۇلەسى ولشەۋسىز دەر ەدىم.

1999 جىلى «الاتاۋ» تەلەارناسىنىڭ كەنەتتەن جابىلۋىنا بايلانىستى مەنىڭ بۇل تەلەباعدارلامام ءوزىنىڭ ءومىر ءسۇرۋىن توقتاتقان ەدى. كەيىن مارقۇم ابدوللا التىي «تاڭشولپانعا» باس رەداكتور بولىپ كەلگەن كۇننەن باستاپ، «تۇرىك دانالارى» ىقشامدالعان تۇردە ەفيردەن كورسەتىلە باستادى. شامامەن ءبىر جىلدان كەيىن «تۇرىك دانالارى» ەفيردەن الىنىپ تاستالدى.

ونىڭ ۇستىنە بۇل تەلەباعدارلامانىڭ اۆتورى ءارى جۇرگىزۋشىسى ماعان «پانتۇركيست»، «تۇرىكشىل»، «الاشورداشىل»، «ۇلتشىل» دەگەن ايىپتار تاعىلىپ، مەنى دە، مەنىڭ تەلەباعدارلامالارىمدى دا ەفيردەن كورسەتپەيتىن بولدى.

شامالاۋىمشا قازىر مەنىڭ «تۇرىك دانالارى»، «تۇلپاردىڭ تۇياعى»، «دارا تۇلعالار»، ت.ب. تەلەحابارلارىمنىڭ دەنى تەلەۆيزيانىڭ نەگىزگى قورىندا ساقتاۋلى تۇرعان سياقتى. مەنىڭ «تۇرىك دانالارى» اۆتورلىق تەلەباعدارلامام تۇركيانىڭ ەلەكتروندى اقپارات قۇرالدارىندا، ءازىربايجان تەلەستۋدياسىندا كۇنى بۇگىنگە دەيىن كورسەتىلىپ كەلە جاتقانىن جاقسى بىلەمىن.

-    بۇگىندە «تۇرىكشىلدىك» يدەياسى، دالىرەك ايتقاندا تۇرىك قاندى ۇلتتاردىڭ باۋىرمالدىعى ساياسي ەليتادان تىس قوعامدا بەلسەندى ەمەس. نەلىكتەن ولاي دەپ ويلايسىز؟

- قازاقستان تاۋەلسىزدىگىنىڭ قارساڭىندا بىزدەر: حاسەن ورالتاي، ءفادلي ءالي، باتىرحان دارىمبەت، ت.ب. ءبىر توپ ازامات تۇرىكشىلدىك يدەياسىن تۋ ەتىپ كوتەرىپ شىققانداي بولعان ەدىك. امال قانشا، ءبىزدىڭ ول يدەيامىز ۇزاققا بارمادى. قازىرگى ورىسشىل، ماسكەۋشىل بيلىكتىڭ قىسپاعىنا ۇشىراپ، اقىرى قۇردىمعا كەتكەندەي بولعان. ءبىز زيا گوكالىپ، نيحال اتسىز، ءجۇسىپ اقشورا، گاسپرالى، مىرجاقىپ دۋلات، ماعجان جۇمابايۇلى ارماندارىن جۇزەگە اسىرۋعا قانشا تىرىسقانىمىزبەن ونىمىزدان تۇكتە شىقپادى. مەنىڭ اۆتورلىق تەلەباعدارلامام "تۇرىك دانالارىنىڭ" نەگىزگى ماقساتى وسى تۇرىكشىلدىك يدەياسىن ناسيحاتتاۋ بولعان.

بۇگىندەرى ءبىز تۇرىكشىلدىكتى قويىپ، قازاقشىلدىق يدەياسىننىڭ اشىق ايتا المايتىن قالگە جەتكەندەيمىز. بۇل، اششى دا بولسا، اقيقات! ...

-     «ازات» قوزعالىسى ەلدىڭ بۇگىنگى اياق الىسىن قالاي باعالايدى؟

- «ازات» قوزعالىسىنىڭ نەگىزگى ماقساتى قازاقستان تاۋەلسىزدىگى بولاتىن. قوزعالىس نەگىزىنەن ءوزىنىڭ تۇپكى ماقساتىن ورىندادى دەپ ايتسا دا بولادى.

ال، قازاقستاننىڭ  تاۋەلسىزدىككە قول جەتكىزگەننەن كەيىنگى ءوسۋ جولى نەگىزىنەن سول ماسكەۋشىلدىگىمەن ەرەكشەلەنەدى. ەگەر عايىپتان «ازات» قوزعالىسى قايتادان اتقا مىنسە، بۇگىنگى ورىسقۇل بيلىكتىڭ ۇلتسىزدانۋ ساياساتىمەن اشىق كۇرەسەر ەدى دەپ ويلايمىن.

قازاقستاننىڭ ءوز الدىنا ەل بولعان شيرەك عاسىرعا جۋىق ۋاقىت ىشىندە تەك قانا ءبىر ۇلتتتى، ءبىز قازاقتاردى ءدىنى، ءتىلى جانە بارلىق ۇلتتىق قۇندىلىقتارى جاعىنان تۇقىرتىپ كەلە جاتقانىن ەشكىم جوققا شىعارا الماسا كەرەك.

شەكتەن شىققان ماسكەۋشىلدىك، ورىسشىلدىق، ۇلتسىزدىق قازاق حالقىنىڭ اياعىنا تۇساۋ سالىپ وتىرعانىن مەن جوققا شىعارا المايمىن. اڭگىمەنىڭ اشىعىن ايتسام، تاۋەلسىزدىككە قول جەتكىزگەن قازاق حالقى ەمەس، كەشەگى قىزىل كوممۋنيستەردىڭ وزدەرى نەمەسە ولاردىڭ ۇرپاعى عانا سياقتى اسەر ەتەدى ماعان. قازاق ۇلتىنىڭ شىن تاۋەلسىزدىگى ءالى دە الدا سياقتى...

- اڭگىمەڭىزگە رازمەت! «ازاتتىڭ» رۋحى وسكەلەڭ ۇرپاقتىڭ قانىندا تۋلاسىن!

اقان بەكتاس

Abai.kz