ءوزىن-ءوزى تاۋەلسىز دەپ جاريالاپ العان، ستاتۋسى داۋلى شاعىن ەلدەر مەن ايماقتاردى تۇگەل قوسقاندا الەمدە 195 مەملەكەت بار دەپ سانالادى ەكەن. دسۇ-عا 162-مۇشە بولىپ كىرەتىن كەزدە جەلكەمدى قاسىپ ويلانىپ قالدىم - وركەنيەتتى الەمدە بىزدەن باسقانىڭ ءبارى قاي كەزدە كىرىپ ۇلگەرگەن بۇل ۇيىمعا دەپ;) بىراق، "ەشتەن كەش جاقسى", ونىڭ ۇستىنە ەۋرازيا وداعى سياقتى گەوساياسي جوبا ءبىر بۇيىردەن قىسىپ، بار سالماعىمەن جانىشتاپ تۇرعاندا دسۇ-عا مۇشە بولۋ ەرلىكپەن پارا-پار. ۇزاق كەلىسسوزدەردەن ناتيجە شىعارا بىلگەن قازاقستاندىق ديپلوماتتار مەن ەكونوميستەردى شىن جۇرەكتەن قۇتتىقتايمىن!

بۇل تاريحي وقيعانىڭ ءمانىن ءبىر عانا قاراپايىم مىسالمەن تۇسىندىرۋگە تىرىسايىن. بارشاڭىز سۋپەرماركەتكە كىرگەندە ماي الاسىزدار. كادىمگى سارى ماي. "يرتىش" پەن "جايلاۋ" مارگارين بولىپ كەتتى، پەتروپاۆلدىڭ مايىن كيلوگرامداپ العان جاقسى" دەپ ءجۇرىپ ودان دا كوڭىلدەرىڭىز قالادى، ارزانداۋ سۋ تاتىعان رەسەيلىك، يا قىرعىزستاندىق مايعا كوشەسىزدەر. قولدىڭ مايىن الۋعا كوپشىلىگىڭىز باتپايسىزدار، ويتكەنى پاستەرلەنبەگەن، قانداي جاعدايدا وندىرىلگەنى بەلگىسىز ءونىمدى الۋعا جۇرەكتەرىڭىز داۋالامايدى. سوسىن ەرىكسىز قىمبات بولسا دا، فرانتسيانىڭ "پرەزيدەنت" مايىنا قول سوزاسىزدار. ەگەر رەسەيدە جاسالعان "پوددەلكاسى" بولىپ شىقپاسا، تۇپنۇسقا "پرەزيدەنت" - كادىمگى تابيعي ءسۇت پەن كىلەگەيدىڭ ءدامى بار ساپالى سارى ماي. بىراق، باعاسى ۋداي. ەندى دسۇ-عا كىرگەسىن "پرەزيدەنتتىڭ" باعاسى كۇرت ارزاندايدى، ول از بولسا "پرەزيدەنت" قۇساعان ءدامى ءتىل ۇيىرەتىن تابيعي سارى مايدىڭ نەبىر ءتۇرى گوللانديا مەن پولشادان ارزان باعامەن اعىلىپ كەلەدى دە، جەرگىلىكتى ءھام رەسەيلىك جاساندى مايلاردى دۇكەن سورەلەرىنەن سىپىرىپ تۇسىرەدى. البەتتە، مۇنىڭ قايىرىن قاراپايىم تۇتىنۋشىلار كورىپ، ءبىر جەتىسىپ قالادى. بىراق جەرگىلىكتى ءھام رەسەيلىك كاسىپكەرلەر وڭباي تاياق جەيدى، شىعىنعا ۇشىرايدى. باسىندا ەۋروپالىق تاۋارلاردىڭ "پوددەلكاسىن" جاساپ كورەدى، ودان تۇك شىقپايدى، جارتىسى بانكروت بولادى، كەيىن جارتىسى ساپالى ءونىم جاساۋعا شىنداپ كىرىسەدى. بۇرىنعىداي ەمەس جارنامالاۋدى ءھام قىزمەت كورسەتۋدى ۇيرەنەدى، باعانى ارزانداتۋعا، مايدىڭ ساپاسىن جاقسارتۋعا تىرىسادى. "پرەزيدەنتپەن" باسەكەلەسە الاتىن، ساپالى ءارى ورگانيكالىق تازا جولمەن وندىرىلگەن "ەلباسى" دەگەن مايلار پايدا بولۋى مۇمكىن wink emoticonجارناماسى شامامەن بىلاي بولىپ شىعا ما دەپ ويلايمىن: "100 پايىز تابيعي، جايىلىمنىڭ ءشوبىن جەگەن، قولمەن ساۋىلعان اسىل تۇقىمدى قىزىل قاسقا سيىر سۇتىنەن جاسالعان وتاندىق "ەلباسى" مايىن الىڭىزدار" 

قازىر كۇلكىلى ەستىلۋى مۇمكىن، بىراق دسۇ-عا مۇشە بولۋ بىردەن بولماسا دا، بىرتە-بىرتە قازاقستانداعى تۇتىنۋشىنىڭ دا، كاسىپكەردىڭ دە مەنتاليتەتىن وزگەرتەتىن فاكتورعا اينالادى.

عالىم بوقاش

الەۋمەتتىك جەلىدەن.