10-نشى ماۋسىمدا قازاقستاننىڭ دۇنيەجۇزىلىك ساۋدا ۇيىمىنا كىرۋى تۋرالى كەلىسىمدەر اياقتالدى. بۇگىن، ياعني 22-ءنشى ماۋسىم كۇنى قازاقستاننىڭ دسۇ كىرۋ جوباسى رەسمي تۇردە بەكىتىلىپ ۇيىمنىڭ 161 مۇشەسىنەن تۇراتىن باس كەڭەستىڭ قابىلداۋىنا جىبەرىلەدى.

«مەن قازاقستان رەسپۋبليكاسىنىڭ ۇكىمەتىن وسى تاريحي كەزەڭمەن قۇتتىقتايمىن. مەن قازاقستاندى دسۇ تاعاتسىزدانا كۇتەمىن» دەدى ۇيىمنىڭ باس ديرەكتورى روبەرتۋ ازەۆەدۋ.

قازاقستاننىڭ بۇل دۇنيەجۇزىلىك ۇيىمعا كىرۋىن شىنىمەن تاريحي كەزەڭ دەپ باعالاۋعا بولادى. ەلىمىز دسۇ مۇشە بولۋعا 1996 جىلدىڭ 29-نشى قاڭتارىندا ءوتىنىش بەرىپتى، ارادا از با، كوپ پە 19 جىل ءوتتى.

سونىمەن، دۇنيەجۇزىلىك ساۋدا ۇيىمى قازاقستانعا نە بەرەدى؟ «الپاري» ينۆەستيتسيالىق كومپانياسىنىڭ ساراپتاما دەپارتامەنتىنىڭ ديرەكتورى الەكساندر رازۋۆاەۆ قازاقستاننىڭ بۇل ۇيىمعا كىرۋىن «ەڭ ءساتتى پوستكەڭەستىك جوبا» دەپ باعالايدى. ونىڭ ويىنشا، ۇيىمنان ۇتارىمىز كوپ. اسىرەسە، قايتاوڭدەۋ سەكتورىنا حالىقارالىق كورپوراتسيالار تارتىلىپ، قازاقستاندىق تاۋاردىڭ الەمدىك نارىققا شىعۋىنا لايىقتى ءارى ءتيىمدى جول دەيدى.

ال، ساياساتتانۋشى دەنيس كريۆوشەەۆ قازىرگى قالىپتاسقان ساياسي-ەكونوميكالىق جاعدايدا قازاقستاننىڭ دسۇ كىرۋى قاۋىپتى دەگەن پىكىر بىلدىرەدى.

«دسۇ مۇشەلىككە ءوتۋدى بيلىك ەۋرازيالىق ەكونوميكالىق وداققا قاراما-قايشىلىق دەپ تۇسىنەدى، اسىرەسە ەكسپورت توڭىرەگىندە. ەۋرازيالىق ەكونوميكالىق وداق اياسىندا رەسەي ايماقتىق مۇمكىندىكتەرىن پايدالانىپ قازاقستاندىق رەسۋرستاردى شەتكە شىعارۋدا قوسىمشا قيىندىقتار تۋدىرۋى مۇمكىن» دەيدى ساياساتكەر.

ونىڭ ويىنشا، رەسەيدىڭ جوعارى شەندىلەرى قازاقستاننىڭ دسۇ كىرۋىنە قارسى، «ماسكەۋ ءوزىنىڭ باتىستاعى قارسىلاستارى دسۇ ارقىلى قازاقستان مەن رەسەي اراسىنا جىك تۇسىرەدى دەپ قاۋىپتەنەدى» دەيدى د.كريۆوشەەۆ. سونداي-اق، ساراپشى بىزدىكىندەي ءالسىز ەكونوميكا ءۇشىن ينتەگراتسيا اركەز قاۋىپتى، اشىق باسەكەلەستىك ءوندىرىس پەن قايتا وڭدەۋ سالاسىن سەرگەلدەڭگە سالاتىنىن ايتادى.

ال، «اتامەكەن» ۇلتتىق كاسىپكەرلەر پالاتاسىنىڭ ەكونوميكالىق ينتەگراتسيالار دەپارتامەنتى ديرەكتورىنىڭ ورىنباسارى اسقار قىسىقوۆ، «قازاقستاننىڭ دسۇ كىرۋى قازاق ەكونوميكاسى ءۇشىن ەڭ قاجەتتى قادام» دەگەن پىكىر ايتادى.

«تەڭىزگە تىكەلەي شىعاتىن جولى جوق ەل ءۇشىن حالىقارالىق ساۋدا نارىعى – ۇلكەن قاجەتتىلىك. دسۇ مۇشە بولىپ كىرۋ وتاندىق ءوندىرىستىڭ باسەكەگە قابىلەتتىلىگىن ارتتىرۋ جولىنداعى قاجەتتى قادام. ەكىنشىدەن، بۇل قازاقستانعا ينۆەستيتسيا تارتۋدىڭ ەڭ ءتيىمدى جولى» دەيدى قىسىقوۆ.

ult.kz