سارىاعاش  اۋدانىنان جاڭا جىلعا دەيىن تاعى 30-دان استام ازامات وتباسىمەن قونىس اۋدارۋعا قام جاساپ جاتىر. ولاردىڭ دەنى - جوعارى ءبىلىمدى ماماندىق يەلەرى.

اسحات جۇمىسپەن قامتۋ مەكەمەسىنە بۇگىن تاعى كەلدى. بۇل جولى جۇمىس ىزدەپ ەمەس، قىزىلجارعا قونىس اۋدارۋعا قاجەتتى قۇجاتتاردى راسىمدەۋ ءۇشىن. جوعارى ءبىلىمدى ازاماتتىڭ ماماندىعى-زاڭگەر. بىلتىر ۇيلەنىپ، وتباسىن قۇرعان بولاتىن. تۋعان جەرى سارىاعاشتان تۇراقتى جۇمىس تابا الماسىنا كوزى جەتكەن سوڭ اسحات سولتۇستىككە بارماققا  ءبىرجولا بەكىندى.

اسحات سمانوۆ، سارىاعاش قالاسىنىڭ تۇرعىنى;

سولتۇستىكتە جۇمىس بار دەيدى. ول جاققا مامان كەرەك ەكەن. ءوز ماماندىعىم بويىنشا جۇمىس ىستەسەم دەيمىن. ءۇي-جايىن بەرەمىز دەيدى. تۇراقتى ايلىعى بار ەكەن. ودان ارتىق نە كەرەك؟

اسحات - ءۇيدىڭ ورتانشىسى. قازىر اكە-شەشەسى جانە وتباسىلى ىنىسىمەن بارلىعى ءبىر ۇيدە تۇرادى. ۇلىنىڭ كەسىمدى شەشىمىنە اتا-اناسى قارسى بولعان جوق. «قازاق دالاسىنىڭ قايسىبىر شەتى بولماسىن، ەشكىمگە دە جات ەمەس. ەرىنبەي ەڭبەك ەتسەڭ، ءوسىپ ونەتىن جەرىڭ دە سول بولماق»، - دەيدى ولار.

ابدىكەرىم سمانوۆ، اكەسى;

ءوزىنىڭ قالاۋىمەن سولتۇستىك وڭىرگە بارىپ قىزمەت جاسايمىن دەيدى. سول جاققا بارىپ وتانىمىزعا ەڭبەك ەتەمىن دەيدى. اق جول بولسىن، بالامىزعا. دەنى ساۋ بولىپ، سول جاقتا ءوسىپ ءونىپ، كوركەيىپ جۇرە بەرسىن.

انا شىركىن، قاشان دا مەيىربان عوي. بالاسىنىڭ تۋعان ۇيدەن جىراق كەتەتىنىن ەستىپ، بالاسىنا بايەك بولدى دا قالدى.

سولتۇستىك سالقىنداۋ عوي بىزگە قاراعاندا جاۋراپ قالماعىڭ. جىلى كيىمدەرىڭدى سالىپ جاتىرمىن. وسى كيىمدەرىڭدى كيىپ ءجۇر.

سارىاعاش اۋدانىنان اسحاتپەن بىرگە تاعى 32 ازامات ەلىمىزدىڭ سولتۇستىك قازاقستان وبلىسىنا قاراي كوش تۇزەگەلى جاتىر. كوبىنىڭ قۇجاتتارى ءازىر. ءبىرازى الدىن الا جاڭا قونىستارىن كورىپ-ءبىلىپ، تانىسىپ تا قايتتى.

احمەنتاي ەسباەۆ، سارىاعاش اۋدانى اكىمىنىڭ ورىنباسارى;

32 ازاماتتى ايتاتىن بولساق، ونىڭ ىشىندە 10 ازامات جوعارى ءبىلىمدى مۇعالىم. ەكەۋى مەديتسينا سالاسىنان. سول سياقتى اۋىلشارۋاشىلىعى سالاسىنان ءۇش ازامات. قالعاندارى اسپاز، فەرمەر سەكىلدى ءارتۇرلى ماماندىق يەلەرى.

سارىاعاش اۋدانىندا بۇگىنگى تاڭدا 320 مىڭنان استام ادام تۇرادى. دەموگرافيالىق ءوسىم جاقسى. ال، ىرگەسى ءبۇتىن، كولىگى تولىق، بايسالدى كوش تەرىسكەيگە ەل بوپ قوسىلسا، ءار قازاقتىڭ ءورىسى ۇزارماق.

ايگەرىم داۋلەتبەكقىزى