وڭتۇستىك قازاقستان وبلىسى – حالىق سانى ەڭ كوپ ءوڭىر. مۇندا 2 788,5 مىڭ ادام تىركەلسە، ونىڭ 60 پايىزىن اۋىل تۇرعىندارى قۇرايدى. ال جىل سايىن 70 مىڭنان استام بالا دۇنيەگە كەلەدى. بۇل — ەلىمىزدەگى تۋىلاتىن سابيلەردىڭ بەستەن ءبىرى. سول سەبەپتى ءبىزدىڭ وبلىس جۇيە جاساۋشى، ستراتەگيالىق ماڭىزدى ءوڭىر بولىپ سانالادى. جالپى، كۇنگەيدە 110 مەديتسينالىق كومەك كورسەتەتىن ۇيىم، 188 دارىگەرلىك امبۋلاتوريا، 37 ەمحانا جانە 8 اۋدانارالىق تۋبەركۋلەزگە قارسى ديسپانسەر قۇرىلدى. بۇل تۋرالى otyrar.kz سايتى حابارلايدى. مەملەكەت باسشىسىنىڭ سارابدال ساياساتىنىڭ ارقاسىندا وسىناۋ ماڭىزدى سالاعا ەرەكشە كوڭىل بولىنۋدە. ماسەلەن، وبلىستا سوڭعى جىلدارى 310 دەنساۋلىق ساقتاۋ نىسانى سالىنىپ، ەل يگىلىگىنە بەرىلسە، 152 مەديتسينالىق نىسانعا كۇردەلى جوندەۋ جۇرگىزىلدى. ماتەريالدىق-تەحنيكالىق جابدىقتار جاڭارىپ، زاماناۋي قۇرال-جابدىقتار مەن قوندىرعىلار تەك وبلىس ورتالىعىندا عانا ەمەس، اۋداندار مەن قالالاردا دا ورناتىلۋدا. بۇيرەك پەن باۋىر ترانسپلانتاتسياسى جولعا قويىلدى. انا مەن بالا ءولىمى ازايدى. وسىنداي جەتىستىكتەرىمىز وسى سالادا ايانباي ەڭبەك ەتىپ جۇرگەن اق حالاتتى ابزال جانداردىڭ ارقاسى. وڭىردە جالپى 7303 دارىگەر جۇمىس ىستەيدى، ونىڭ ىشىندە اۋىلدىق جەرلەردە 2 مىڭنان استام. ال مەيىربيكەلەر سانى – 22134, اۋىلدىق جەرلەردە – 7848. ءبىر ايتا كەتەرلىگى، كادر تاپشىلىعى 2 ەسەگە تومەندەگەن. سونداي-اق، مامانداردى ۇزدىكسىز وقىتۋ جۇيەسى جولعا قويىلعان. سول سەبەپتى جىل سايىن وقىتىلاتىن مامانداردىڭ سانى 12 مىڭعا ارتتى. ايەلدەر مەن بالالارعا مەديتسينالىق كومەك كورسەتۋدىڭ ساپاسى مەن قولجەتىمدىلىگىن قامتاماسىز ەتۋ ءۇشىن شىمكەنت پەن تۇركىستان قالاسىندا 4 پەريناتالدىق ورتالىق اشىلدى. تاعى ءبىر ايتا كەتەتىن جايت، شىمكەنت — ترانسپلانتولوگيالىق كومەكتى ەندىرۋ بويىنشا رەسپۋبليكادا ءۇشىنشى قالا. قالادا 55 پاتسيەنتكە بۇيرەك الماستىرۋ، 3 پاتسيەنتكە باۋىر الماستىرۋ وپەراتسيالارى جاسالدى. جانە دە نەوناتالدى حيرۋرگيا مەن كارديوحيرۋرگيا دامىپ كەلەدى.

وقو اكىمىنىڭ ءباسپاسوز قىزمەتى