ى.التىنسارين اتىنداعى وبلىستىق بالالار كىتاپحاناسىندا «كىتاپ وقۋ – جەتىستىككە اپاراتىن جول» اتتى باعدارلاما اياسىندا شىمكەنت قالاسىنىڭ قۇرمەتتى ازاماتى، «نۇر وتان» پارتياسى شىمكەنت قالالىق فيليالىنىڭ توراعاسى، وبلىستىق ءماسليحاتتىڭ دەپۋتاتى ومىرزاق مەلدەحانوۆپەن كەزدەسۋ كەشى ءوتتى.

وقو-نىڭ ايگىلى ادامدارىنىڭ بالالىق شاقتاعى وقىعان قىزىقتى كىتاپتارى، بالالىق شاعى، كىتاپ ارقىلى جەتىستىككە جەتۋ جولدارى تۋرالى تالقىلاناتىن بۇل باعدارلامانىڭ ماقساتى كىتاپحانانىڭ قوعامداعى مارتەبەسىن دەمەپ، وقىرماننىڭ وقۋ مادەنيەتىن كوتەرۋ. ۇلكەندەردەن ۇلگى الىپ، وزدىگىنەن ىزدەنىپ وقۋعا ۇيرەتۋ. بالالاردىڭ كىتاپ وقۋعا دەگەن قىزىعۋشىلىعىن ارتتىرىپ، رۋحاني كىتاپ ارقىلى وقىرمانداردىڭ بويىندا جوعارى ادامگەرشىلىك مادەنيەت قالىپتاستىرۋ بولاتىن.

وسى ورايدا كىتاپ وقۋدىڭ پايداسى تۋرالى از كەم ءسوز:

وكسفورد ۋنيۆەرسيتەتىنىڭ عالىمدارى كىتاپ وقۋ اقىل-ويدى عانا ەمەس، جان مەن ءتاننىڭ ساۋلىعىن دا ارتتىرادى دەگەن قورىتىندىعا كەلىپ وتىر. اسىرەسە كىتاپ وقۋدىڭ كۇيزەلىستەن ارىلتۋعا ىقپالى زور ەكەن.

«مەدۆەستي» پورتالىنىڭ مالىمەتىنشە، عالىمدار كىتاپتى كوپ وقيتىن ءبىر توپ ادامنىڭ ميىن ماگنيتتى-سەرپىندى باقىلاۋدان وتكىزگەن. سونىڭ ناتيجەسىندە الدەقانداي ءيىس، لاندشافت نەمەسە ءدام تۋرالى وقىعاندا ادام ميىنىڭ قابىلداۋعا جاۋاپتى بولىكتەرىنىڭ بەلسەندى ارەكەت ەتەتىنى انىقتالدى. مۇنداي ەففەكت تەلەديدار قاراعاندا نەمەسە كومپيۋتەرلىك ويىن ويناعاندا دا بايقالمايتىن كورىنەدى. «كىتاپ وقۋ – ادام ميى ءۇشىن ايرىقشا جاتتىعۋ. ءتۇرلى شىعارمالاردىڭ ىشىنە ويشا ەنۋ ادامنىڭ ەلەستەتۋ، قيالداۋ مۇمكىندىگىن ارتتىرادى. بۇدان ادامنىڭ فيزيكالىق جانە پسيحيكالىق جاي-كۇيى جاقسارادى»، – دەيدى پروفەسسور دجون ستەين. عالىم كىتاپ وقۋعا ەرتە جاستان ماشىقتانۋدىڭ پايداسى زور ەكەنىن ايتادى. كىتاپ وقۋعا جۇمسالعان التى مينۋت ۋاقىتتىڭ ىشىندە ادامنىڭ كۇيزەلىس دەڭگەيى تورتتەن ەكىگە تومەندەيدى ەكەن جانە بۇل جاعىنان ول مۋزىكا تىڭداعاننان نەمەسە جاياۋ سەرۋەندەگەننەن الدەقايدا پايدالىراق.

سونىمەن، باستاپقى اڭگىمەمىزگە ورالايىق. اتالعان كەشتى كىتاپحانا ديرەكتورى ز.ورالبايقىزى اشىپ، كەش قوناعى ومىرزاق پەردەبەكۇلى وقىرماندارمەن ءوزىنىڭ بالالىق شاعى، كىتاپتىڭ ادام ومىرىندە الار ورنى تۋرالى وي ءبولىسىپ، وقىرمانداردى كىتاپ وقۋعا شاقىردى. سونداي-اق، ءىس-شاراعا بەلسەنە قاتىسقان №29, 75, 64, 47 مەكتەپ وقۋشىلارىنا رازى بولىپ، ەلىمىزدە وسىنداي ءبىلىمدى جاستاردىڭ ءوسىپ كەلە جاتقانىنا ءوز ريزاشىلىعىن ءبىلدىردى. جينالعان كوپشىلىك بۇدان كەيىن ءار مەكتەپتەن كەلگەن تالانتتى جاستاردىڭ تامىلجىتا سالعان ءانىن تىنداپ، مىڭ بۇرالعان بيلەرىن تاماشالادى. وسىنداي جاستارعا ۇلگى بولارلىق ەل اعالارىمەن كەزدەسۋدەن كەيىن كىتاپ وقيتىن وقىرماندارىمىزدىڭ كوبەيەتىنىنە سەنىمىمىز مول.

Abai.kz