شىمكەنت قالاسىنداعى ارداگەرلەر ۇيىندە «ىزگىلىك» سىر-سۇحباتى وتاۋىنىڭ كەزەكتى وتىرىسى ءوتتى. باسقوسۋدا «باق-تاعى تسەنزۋرا جانە ءجۋرناليستىڭ ار-ۇياتى» تاقىرىبىندا قوعامدىق ۇيىم جانە باق وكىلدەرى ءوز وي-پىكىرلەرىن ورتاعا سالدى دەپ حابارلايدى «شىمكەنت كەلبەتى» گازەتى.

جۋرناليستيكا جانە ونىڭ وزەكتى ماسەلەلەرىن بايىپتاۋعا ارنالعان باسقوسۋدى وبلىستىق ارداگەرلەر كەڭەسىنىڭ توراعاسى جەڭىسبەك ماۋلەنقۇلوۆ اشتى. ول جيىننىڭ ءمان-ماڭىزىنا توقتالىپ، ءتۇرلى وقيعالار مەن جاڭالىقتاردى حالىققا جەتكىزۋدە جۋرناليستەردىڭ ورنى ەرەكشە ەكەنىن اتاپ ءوتتى. ال قر جۋرناليستەر وداعى وقو فيليالىنىڭ ءتورايىمى

ايگۇل قاپباروۆا قازىرگى تاڭداعى قوعامداعى اقپاراتتىق كەڭىستىكتەگى وزەكتى ماسەلەلەرگە توقتالدى. ونىڭ ايتۋىنشا، جەرگىلىكتى جۋرناليستيكادا ورىن الىپ جاتقان كەمشىلىكتەر كوپ. ماسەلەن، باسىلىمدار اراسىندا فاكتىلەردى بۇرمالاۋ، ەشبىر دالەلى جوق پىكىرلەردى جاريا ەتۋ سياقتى جاعدايلار ءجيى ورىن الادى. سونداي-اق، بلوگەرلەر مەن جۋرناليستەردىڭ ارا-جىگىن دە قامتىپ ءوتتى.

– ءبىزدىڭ ماماندىقتىڭ بولمىسىن تەرەڭ سەزىنگەن ادامدار عانا جۋرناليست بولا الادى. مامان بويىنداعى دارىنىن كەمەل بىلىمىمەن تۋعان حالقىنىڭ يگىلىگىنە جۇمساي ءبىلۋى ءتيىس دەپ ەسەپتەيمىز. ءبىزدىڭ قارۋىمىز – ءسوز. ال، حالىق دانالىعى ايتقانداي، ء«سوز تاس جارادى، تاس جارماسا، باس جارادى». سوندىقتان، ونى ۇلكەن مادەنيەتپەن پايدالانا ءبىلۋ قاجەت، – دەدى ا. قاپباروۆا.

بەلگىلى جۋرناليست  بايدۋللا قونىسبەكوۆ كوتەرىلگەن تاقىرىپتىڭ وزەكتىلىگىنە توقتالىپ، جۋرناليستەردىڭ ىزدەنىمپازدىعىنىڭ از ەكەنىن، كوكەيكەستى ماسەلەلەردىڭ كوتەرىلمەيتىنىن ايتىپ ءوتتى.

– قاي باسىلىم بولسىن، حالىق ءۇشىن قىزمەت ەتۋى كەرەك قوي. ماسەلەن، باسىلىمدار بولعان وقيعانى، كوتەرىلگەن ماسەلەنى قالاي جەتكىزۋى كەرەك؟ قازىرگى تاڭدا كوپتەگەن اقپارات قۇرالدارى ءتۇرلى كەلەڭسىزدىكتەردى، ادام جانى تۇرشىگەتىن وقيعالاردى ەلدەن ءسۇيىنشى سۇراعانداي جاريالاپ جاتادى.

بۇرىن ءباسپاسوز بەتىندەگى سىن ادامنىڭ ار-نامىسىنا تيمەيتىن. ونىڭ قىزمەتىن سىنايتىن. ماسەلەلەر دە تايعا تاڭبا باسقانداي جازىلاتىن. قازىر باسىلىمداردان مۇنداي ماقالالاردى كورمەيمىز، – دەدى ب. قونىسبەك. ال فيلولوگيا عىلىمدارىنىڭ دوكتورى، پروفەسسور مەكامتاس مىرزاحمەتوۆ قولىنا قالام ۇستاعان ءاربىر جۋرناليست ءوزىن قوعامدىق وي-سانانى قالىپتاستىراتىن، ۇلتتىق قۇندىلىقتارىمىزدى ۇلىقتايتىن اداممىن دەپ ەسەپتەۋى ءتيىس ەكەنىن جەتكىزدى. سىر-سۇحباتقا قاتىسقان ارداگەر جۋرناليستەر تۇشىمدى ويلارى مەن پىكىرلەرىن ءبىلدىردى.سونداي-اق مۇنداي باسقوسۋلار بۇقارالىق اقپارات قۇرالدارىنىڭ ساپاسىن ارتتىرا تۇسۋگە سەپتىگىن تيگىزەتىنى، جۋرناليستەردىڭ دۇنيەتانىمىن كەڭەيتىپ، ىزدەنىسكە جەتەلەيتىنى ايتىلدى.

وبلىستىق ارداگەرلەر كەڭەسىنىڭ توراعاسى  ج. ماۋلەنقۇلوۆ جۋرناليستەردى ەلىمىزدىڭ رۋحىن كوتەرەتىن، ەلگە ورتاق وي سالاتىن، قۇندىلىعى جوعارى ماقالالاردى جاريالاپ، ادىلەتتى، ادال بولۋعا شاقىرىپ، باسقوسۋدى تۇيىندەدى.

Abai.kz