بۇگىندە شىمكەنتتىڭ تىنىس-تىرشىلىگىن كولىكسىز كوزگە ەلەستەتۋ مۇمكىن ەمەس. قالا تۇرعىندارىنىڭ كوبىسى قوعامدىق كولىكتى پايدالانادى. ال قوعامدىق كولىكتەردىڭ قىزمەتىنە قاتىستى  ماسەلە ءجيى قوزعالاتىن تاقىرىپتىڭ ءبىرى. بۇل رەتتە تاسىمال بارىسىنداعى كەمشىلىكتەر، اۆتوبۋس جۇرگىزۋشىسى جۇمىسىنداعى ءتارتىپ بۇزۋشىلىقتار ءجيى ايتىلادى. بولاشاق مەگاپوليس ءۇشىن كولىك جۇيەسىنىڭ الەۋمەتتىك-ەكونوميكالىق جانە ەكولوگيالىق جاعىنان تيىمدىلىگى مەن ماڭىزى ەرەكشە. وسى ورايدا ولاردىڭ قىزمەتى قانداي؟ جۇمىسىنا جولاۋشىلاردىڭ  كوڭىلى تولا ما؟

قالالىق جولاۋشىلار كولىگى جانە اۆتوموبيل جولدارى مەن قالالىق جول پاترۋلدىك پوليتسيا پولكىنىڭ ينسرەكتورلارى بىرگە قوعامدىق كولىكتەرگە رەيد ۇيىمداستىرۋدا. كەشكى رەيد «اۆتو-نۇر» بازارىنىڭ ايالداماسىندا جۇرگىزىلدى. الدىمەن جول ساقشىلارى جۇرگىزۋشىلەردىڭ قۇجاتتارىن ەگجەي-تەگجەيلى تەكسەردى.

ناتيجەسىندە №135, 52, 3, 103, 91 باعىتتارىنا قاتىنايتىن اۆتوبۋستاردىڭ جۇمىسى تالاپقا ساي كەلمەيتىنى انىقتالدى. ارنايى فورمالارى جوق، جولاۋشىلارعا بيلەت تاراتىلماعان. كەيبىر كولىكتەردە جولاۋشىلار شامادان تىس كوپ بولىپ شىقتى.

– ءسوز جوق، قالا مادەنيەتى اۆتوبۋستاردان باستاۋ الاتىنى بەلگىلى. ال اۆتوبۋستارعا بەلگىلەنگەن ورىننان ارتىق ادام الۋعا بولمايدى. زاڭ دا، ءتارتىپ تە – بارىنە بىردەي. تالاپتاردى ساقتاماعان جۇرگىزۋشىلەر مەن كوندۋكتورلارعا ەسكەرتۋ بەردىك. قوعامدىق كولىك سالاسىندا قىزمەت كورسەتۋ ساپاسىن كوتەرۋ ماقساتىندا رەيدتىك شارالار اپتاسىنا ەكى رەت جۇرگىزىلۋدە، – دەيدى قالالىق جولاۋشىلار كولىگى جانە اۆتوموبيل جولدارى ءبولىمى باسشىسىنىڭ ورىنباساى جارقىن بايدۋللاەۆ.

جالپى العاندا قوعامدىق كولىك ماسەلەسىندە اتقارىلۋى ءتيىس كەلەلى شارالار جەتكىلىكتى. قوعامدىق كولىك جۇرگىزۋشىلەردىڭ مادەنيەتىن ارتتىرۋ مەن ولاردىڭ جول ەرەجەلەرىن ساقتاۋ ماسەلەسىن ءجىتى قاداعالاۋ قاجەت. ازاماتتارىمىزدىڭ قاۋىپسىزدىگىن ساقتاۋ جايى دا نازاردان تىس قالماۋى ءتيى.

رەيد كەزىندە 5 اۆتوبۋس جۇرگىزۋشىسىنە ەسكەرتۋ بەرىلىپ، №38 ميكرواۆتوبۋستىڭ يەسىنە 5 ايلىق ەسەپتىك كورسەتكىش كولەمىندە ايىپپۇل سالىندى. مۇنداي رەيدتەر الداعى ۋاقىتتا دا جالعاسادى.

Abai.kz