قاشاندا يگى ىستەردىڭ ۇيىتقىسى بولىپ جۇرەتىن №16 كوللەدجدە تۇڭعىش پرەزيدەنت كۇنىنە وراي «ەلىن سۇيگەن، ەلى سۇيگەن ەلباسى» تاقىرىبىندا ايتۋلى ءىس-شارا ءوتتى.

كوللەدج ۇستازدارى اۋدانداعى زيالى قاۋىم وكىلدەرى مەن كاسىپتىك ءبىلىم الىپ جۇرگەن جاس ۇرپاقتى كەزدەستىرە وتىرىپ، ەگەمەن ەلىمىزدىڭ تاۋەلسىزدىگى مەن قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ ءومىرى جايلى سىر-سۇحبات ۇيىمداستىردى. كەزدەسۋ باستالاردان الدىن دەرەكتى فيلم كورسەتىلدى. فيلمدەگى ەلىمىز ءوز الدىنا شاڭىراق كوتەرىپ، بۇرىنعى كەڭەس وداعىنان ءبولىنىپ شىققان كەزدەگى حالىقتىڭ قۋانىشى، اسىرەسە، شەتەلدە تۇراتىن قانداستارىمىزدىڭ ءبىر-بىرلەرىنەن الاقايلاپ ءسۇيىنشى سۇراعان ساتتەرى كورەرمەندەردى تولقىتىپ جىبەردى.

جيىنعا قاتىسقان اۋداندىق ءماسليحاتتىڭ حاتشىسى توقسانباي بەردىبەكوۆ:

-جەلتوقسان ايى تاريحي داتالارعا تولا اي بولىپ سانالادى. 1991 جىلدىڭ 1 جەلتوقسانىندا ەلىمىزدە جالپىحالىقتىق سايلاۋ ءوتىپ، بۇگىنگى ەلباسىمىزعا 98,7 پايىز داۋىس بەرگەنى ءالى ەسىمىزدە. 10 جەلتوقسان كۇنى ۇلىقتاۋ ءراسىمى وتكەنى دە جادىمىزدا جاڭعىرىپ تۇر. مەن «نۇر وتان» پارتياسىنىڭ اۋداندىق فيليالىنىڭ توراعاسى رەتىندە 13 مارتە پارتيانىڭ سەزىنە قاتىستىم. سول كەزدەردە نۇرسۇلتان ابىشۇلىمەن قول الىسىپ امانداستىق. ءۇزىلىس كەزىندە دەلەگاتتارمەن ەمەن-جارقىن سۇحباتتاسىپ، بىزدەرمەن اڭگىمە-دۇكەن قۇراتىن. ول كىسىنىڭ قاراپايىمدىلىعىنا ءتانتى بولاتىنبىز. ال، ەندى مەملەكەت باسقارۋ ىسىندەگى قىرۋار ەڭبەگىن ەل بىلەدى. بىزدەر ەلباسى ساياساتىنا ءاردايىم قولداۋ كورسەتىپ، ءبىر كىسىدەي جۇمىلا جۇمىس جاساۋىمىز قاجەت، - دەدى.

كەزدەسۋگە كەلگەن ارداگەر جۋرناليست مەيىرحان اڭلاماسوۆ، «وسكەن ءوڭىر» گازەتىنىڭ باس رەداكتورى ەسەنباي بەيسەنبيەۆ، اۋداندىق مەشىتتىڭ باس يمامى اسىلحان قاجى دانياروۆ، اقىندار نۇرعالي ىبىرايىم مەن ابدىعاپپار ايداروۆتار تاۋەلسىزدىك تاقىرىبىندا تولعانا ءسوز سويلەپ، جالىندى جىرلار وقىدى. اۋدان اكىمىنىڭ ورىنباسارى باقتىباي ءالىپوۆ تۇڭعىش پرەزيدەنت كۇنىنىڭ ۇلكەن ماڭىزعا يە ەكەنىن، بۇگىنگى كەزدەسۋ جاستار ءۇشىن تاربيەلىك ءمانى زور شارا بولعانىن ايتىپ ءوتتى. جيىندى قورىتىندىلاعان كوللەدج ديرەكتورى زاكىر تالبيدين :

-اۋدانداعى زيالى قاۋىممەن جاستاردى كەزدەستىرۋدەگى ماقساتىمىز – وقۋشىلارىمىز ۇلكەن كىسىلەردىڭ ەلباسى جايلى اڭگىمەلەرىن ءوز قۇلاقتارىمەن ەستىپ، كوكەيلەرىنە توقىتۋ ەدى. نۇرسۇلتان ءابىشۇلىنىڭ بۇگىنگى تاڭدا قويىپ وتىرعان تالاپتارىنىڭ ءبىرى – كاسىپتىك ءبىلىم بەرۋدى دامىتۋ. بۇل جاعىنان ءبىزدىڭ كوللەدج وزگەلەردەن الدا كەلەدى. مەملەكەتىمىز بىزگە بارلىق جاعدايدى جاساپ جاتىر. مەن ءوزىم بىرنەشە دامىعان ەلدەردە ءىسساپاردا بولدىم. ولاردا كاسىپتىك ءبىلىم الۋ ءۇشىن وقۋشىلار اقى تولەيدى. ال، بىزدە جاستارىمىز الاڭسىز وقۋ ءۇشىن مەملەكەت قارجى تولەيدى. مۇنداي قامقورلىق ەش جەردە جوق. پرەزيدەنتىمىزدىڭ جاساپ جاتقان يگىلىگىن كورىپ وتىرعان ءبىزدىڭ كوللەدج وقۋشىلارى مەن ۇستازدارى بارلىق ۋاقىتتا دا قولداي وتىرىپ، ەلباسىمەن ماقتاناتىن بولادى، - دەدى.

كوللەدج وقۋشىلارى ءوز كەزەگىندە زيالى قاۋىم وكىلدەرى الدىندا ءتۇرلى ونەرلەرىن كورسەتتى. كوللەدج وقۋشىسى شەرحان ورالوۆ «ۇشقوڭىر»، «ەلىم مەنىڭ» اندەرىن ناشىنە كەلتىرە ورىنداسا، «جاس تولقىن» ۇيىرمەسىنىڭ مۇشەلەرى ەلباسىعا ارناعان جىر-تاقپاقتارىن وقىدى. كوللەدج ىشىنەن قۇرالعان «قازىنا» بيشىلەر توبى تاريح قويناۋىنان سىر شەرتەتىن «قازاق ەلى» قويىلىمىن ساحنالادى.

ءادىل ءابدىرامانوۆ، شاردارا اۋدانى.

Abai.kz