فۋتبول فورۋمى ەرلان قوجاعاپانوۆتى قولدادى
استانادا 21 قاراشادا رەسپۋبليكالىق فۋتبول فورۋمى ءوتتى.
سوڭعى ۋاقىتتا قازاقستان فۋتبولى فەدەراتسياسىنىڭ جەتەكشىسى ەرلان قوجاعاپانوۆ پەن ونى سىناپ مالىمدەمە جاساعان قازاقستان پرەزيدەنتى نۇرسۇلتان نازارباەۆتىڭ جيەنى ايسۇلتان نازارباەۆ اراسىندا وربىگەن داۋلى ماسەلە قوعامنىڭ نازارىنا ىلىنگەن ەدى.
بىراق، ەرلان قوجاعاپانوۆ «فەدەراتسيا توڭىرەگىندە داۋ جوق، تالقىلاۋ عانا بار» دەپ سانايدى. ونىڭ سوزىنشە، فورۋمعا قاتىسۋدان باس تارتقان ايسۇلتان نازارباەۆتىڭ مالىمدەمەسى «فۋتبولدى دامىتۋ تاقىرىبىنا نازاردى كۇشەيتكەن».
قازاقستان پرەزيدەنتى نۇرسۇلتان نازارباەۆتىڭ ۇلكەن قىزى داريعا نازارباەۆا مەن ونىڭ بۇرىنعى كۇيەۋى مارقۇم راحات اليەۆتىڭ ۇلى - 25 جاستاعى ايسۇلتان نازارباەۆ بۇعان دەيىن Facebook پاراقشاسىندا بۇل فورۋمعا قاتىسپايتىنىن جازعان.
قفف پرەزيدەنتى قىزمەتىن «استانا» فۋتبول كلۋبى كىرەتىن «استانا» پرەزيدەنتتىك كاسىبي سپورت كلۋبىنىڭ باس ديرەكتورى لاۋازىمىمەن قاتار اتقارىپ جۇرگەن ەرلان قوجاعاپانوۆتى «مۇددەلەر قايشىلىعىنا» قاتىستى ايىپتاعان ايسۇلتان نازارباەۆ قىركۇيەك ايىندا فۋتبول سالاسىن باسقاراتىن شەنەۋنىك رەتىندە ءوز كانديداتۋراسىن ۇسىنعان.
اباي-اقپارات
