بولاشاق – ءۇمىتتىڭ بەسىگى. ادام بالاسى ءۇمىت  ەتەتىن جاقسى كۇندەر بولاشاقتان قول بۇلعاپ تۇرعانداي سەزىلەدى. شەتەلدەردە ءبىلىم الىپ، بىلىگىن جەتىلدىرىپ قايتاتىن جاستارعا ارنالعان مەملەكەتتىك باعادارلاما اتىنىڭ «بولاشاق» بولۋىندا دا وسىنداي ءمان بار سياقتى. «بولاشاق» باعادارلاماسى بويىنشا تورتكۇل دۇنيەگە كوزىن اشقان قازاق جاستارى قازىر قوعامنىڭ ءار سالاسىندا قىزمەت اتقارىپ ءجۇر. سونىڭ ءبىرى – الماتى قالاسىنىڭ قازىرگى اكىمى باۋىرجان بايبەك.

باۋىرجان قادىرعاليۇلى مىڭ جىلدان استام تاريحى بار شاھارعا اكىم بولىپ تاعايىندالعان كۇننەن بەرى 100 كۇننىڭ ءجۇزى تولىپتى.  لاۋازىمدى قىزمەت يەلەرىنىڭ ورتاسىندا ەلگە ەسەپ بەرۋ داستۇرىنە ەنگەن 100 كۇننىڭ شەگىندە بايبەك مىرزا نە ىستەي الدى، ءوزىن قاي قىرىنان كورسەتتى؟ كەشەلى بەرى قازاقستاندىق باق-تىڭ وسى ساۋالعا ات باسىن بۇرماعانى كەم. Abai.kz پورتالىنىڭ ۇجىمى دا الىپ مەگاپوليستە ءۇش ايدىڭ كولەمىندە اتقارىلعان جۇمىستاردى سارالاپ، بايبەك مىرزانىڭ كىسىلىك كەلبەتىن تانۋعا تىرىستى.

بىردەن ايتايىق، بۇل – الماتىعا  قانداي دا ءبىر يگىلىكتى ءىس جاساسام دەپ كەلگەن ازامات. ويتكەنى «بولاشاق» كورگەن جىگىتتىڭ بولاشاعى الدا. الماتىداعى اكىمدىك قىزمەتىن ابرويمەن اتقارىپ، ەل ىقىلاسىنا بولەنسە، باۋىرجان بايبەك كوپ الىسقا بارادى. بۇنى قىرىقتىڭ قىرقاسىنا جاڭا ىلىنگەن جىگەرلى جىگىت ىشتەي بەك ءتۇسىنىپ جۇرسە كەرەك-ءتى. دەمەك، ء«ىشىپ-كەتتى»، «جەپ كەتتىدەن» قۇلاعى سارسىلعان الماتىلىقتار الداعى كۇندەرى قالا اكىمى مەن ونىڭ كومانداسىنىڭ سەرپىندى ىستەرىنە كۋا بولادى دەپ بولجام جاساۋعا تاۋەكەل ەتە  الامىز. 

«الماتى – تاۋەلسىزدىكتىڭ التىن بەسىگى». الماتى – ۇلكەن ساياسي مانساپقا باستاپ اپاراتىن داڭعىلدىڭ باسى.  سول ءۇشىن الماتىنىڭ تاريحىن تەرەڭ تانۋ ءلازىم. الماتىنىڭ رۋحاني ورتاسىمەن بىتە قايناپ، بىرگە ءجۇرۋ كەرەك. جاس اكىم اراعا از ۋاقىت سالىپ الماتىنىڭ زيالى قاۋىم وكىلدەرىمەن بىرنەشە رەت كەزدەسىپ، ولاردىڭ لەبىزىن تىڭداپ، پىكىر الماسىپ ۇلگەردى. قالا تۇرعىندارىمەن بىرگە سەنبىلىكتەرگە شىعىپ، بازار ارالاپ، قاراپايىم جۇرت تۇتىناتىن زاتتتاردىڭ باعاسىن باعامداپ، قالىڭ بۇقاراعا جاقىندىعىن دا كورسەتتى. بۇل ونىڭ الماتىعا ءتان الەۋمەتتىك احۋالدى الداعى كۇندەرى دە ءجىتى باقىلاپ وتىراتىن سەرگەكتىگىن اڭعارتقان ءساتتى قادامدار. الماتى – ەرتەدەن قارا كەشكە دەيىن الدەقايدا اسىعىپ، كوشىپ بارا جاتقانداي الاس-قاپاسى مول قالا. سوندىقتان وعان سارايىندا قالعىپ-مۇلگىپ، قارا تەلەفوندى قۇلاعىنا جاپسىرىپ الىپ، بىلدىرلاپ وتىراتىن اكىم ەمەس، ءابجىل قيمىلدايتىن، الەكەدەي جالانعان اكىم كەرەك. بايبەك مىرزانىڭ شيراق قيمىلدارى الماتىنىڭ  ىشكى قۋاتىمەن ابدەن سايكەسەتىن سياقتى. ەندەشە، كەلەر كۇندەر الماتىلىقتار كۇتىپ جۇرگەن يگىلىكتى ىستەرگە تولا بەرەمەك. سوزىمىزگە دالەل، الماتى قالاسىنىڭ اكىمىدىگى جۋىردا شاھاردى دامىتۋدىڭ 7 باعىتىن ايقىنداعان باعدارلاما جوباسىن قابىلداپ ۇلگەردى.  باعدارلاما بويىنشا،   «الماتى، بىرىنشىدەن، ادامدارعا جايلى قالا بولۋى ءتيىس، ەكىنشىدەن، قاۋىپسىز، ۇشىنشىدەن، الەۋمەتتىك سالاعا بەت بۇرعان قالا بولۋى كەرەك. ءتورتىنشى  – ەكونوميكاسى تۇراقتى، بەسىنشى – بيزنەس پەن جەكە كاپيتالدىڭ قالاسى، التىنشىدان، بارلىق اۋماق بىركەلكى دامىعان، جەتىنشى – تۇرعىندارى بەلسەندى قالا بولۋى قاجەت. بۇل – شاھار باسشىسى باۋىرجان بايبەكتىڭ توراعالىعىمەن الماتى قالاسىنىڭ 2016 – 2020 جىلدارعا ارنالعان دامۋ باعدارلاماسىنىڭ جوباسى بويىنشا وتكەن كەلەلى جيىندا ايتىلعان ءسوز. وسىلايشا قالا باسشىسى شاھاردى ءار قىرىنان دامىتۋدىڭ 7 باعىتىن اتاپ، وسى باعدارلامانىڭ اياسىن كەڭەيتۋ ءۇشىن بارشا حالىقتى بەلسەندى قاتىسۋعا شاقىرعان ەدى. اتالعان باعدارلاما قالا تۇرعىندارى مەن ساراپشىلاردىڭ، ۇكىمەتتىك ەمەس ۇيىمدار مەن كاسىپكەرلەردىڭ تالقىسىنا ءتۇسىپ ۇسىنىلىپ، وسىعان بايلانىستى ارنايى almaty2020@a-a.kz ەلەكتروندى پوشتاسى جۇمىس ىستەي باستادى. بۇل پوشتا الماتىلىقتاردىڭ ۇسىنىسى مەن وي-پىكىرلەرىنە ارنالىپ اشىلىپ وتىر»، - دەپ جازادى «الماتى اقشامى» گازەتى.

ءجون-اق. دامۋ باعدارلاماسىنىڭ التىنشى باعىتى تۋرالى وسى ارادا از-كەم ايتا كەتكەن دۇرىس شىعار. التىنشى باعىت: الماتى بارلىق اۋماعى بىركەلكى دامىعان قالاعا اينالۋى كەرەك دەيدى.

بارەكەلدى! ەگەر التىنشى باعىت شىنىمەن ءىس جۇزىنە اسسا، الماتى الەمدەگى ادەمى، مادەنيەتتى، تازا قالالاردىڭ قاتارىنان ورىن تەبەر ەدى. ويتكەنى قازىرگى الماتى – الەۋمەتتىك كەلبەتى ارقيلى; ءبىر تۇسى توزعان، ءبىر تۇسى وزعان الاباجاق تۇرمىس كەشىپ جاتقان، ءارى شيرەك عاسىردان بەرى ۋربانيزاتسيا كوشىن ءۇنسىز كوتەرىپ كەلە جاتقان قالا. ءسويتىپ ءوزىنىڭ ىشكى جىلىلىعىن، مۋزاسىن، كوركەمدىگىن جوعالتىپ بارادى. جوعارى ورلەپ ءال-فارابي داڭعىلىنا شىقساڭىز – الەمنىڭ ارقيلى تۇسىنە بويالعان بايلىقتى، تومەن قۇلديلاساڭىز – شاھار سالتاناتىنا ەش ۇيلەسپەيتىن ۇيلەردى ءوز الىنشە تۇرعىزىپ العان، كۇنكورىستىڭ شەگىندە قالت-قۇلت ەتكەن كەدەيلىكتى، جوقشىلىقتى كورەسىز. ال، بۇل ءتۇبى الەۋمەتتىك جارىلىستار مەن قاقتىعىستارعا سوقتىراتىن قاۋىپتى نىشان. الماتىنىڭ تۇرمىس-تىرشىلىگىن دامىتۋعا ارنالعان التىنشى باعىتتا مىنە، وسىنداي ءمان بار.

الماتى سوڭعى جىلدارى كەرەكتى كەرەكسىز قۇرىلىستاردىڭ الاڭىنا اينالىپ كەتتى. قىمبات ساۋدا ورىندارى كوبەيىپ، ەسەسىنە، تاريحي ءام ۇلتتىق قۇندىلىقتار ەسەبىندەگى  نىساندار جويىلۋدا. سونداي قاتەر الماتى يپپودرومىنا دا تاياپ قالعان ەدى. اكىم تاياۋدا اتاشبار مايدان ەشكىمگە بەرىلمەيدى دەگەن شەشىم قابىلدادى. «كوك جايلاۋ» شاڭعى بازاسىنداعى قۇرىلىستى دا توقتا تۇرۋ كەرەك دەدى.

100 كۇندە،ارينە، بار جۇمىس بىتپەيدى. باستالادى. « ءىستىڭ قانداي بولماعى باستاۋىنان كورىنەدى»، - دەگەن ەكەن حاكىم اباي. باۋىرجان بايبەكتىڭ كۇردەلى جاعدايداعى مەكتەپتەردى جوندەۋگە، كاسىپورىندارمەن كەلىسە وتىرىپ مامانداردى تەز ارادا وقتىپ دايارلاۋعا، تاسقىن سۋ شايىپ كەتە جازداعان ناۋرىزباي، الاتاۋ اۋداندارىنىڭ تۇرعىندارىنا جەدەل تۇردە جاردەم اقى بولۋگە، قالانى تازا ۇستاۋعا، جول-كولىك ينفراقۇرىلىمىن جاقسارتۋعا، الەۋمەتتىك جەلىلەردە حالىقپەن تىكەلەي تىلدەسىپ وتىرۋعا پارمەن ەتۋى – ەل ءۇشىن جاسالار يگىلىكتى ىستەرىنىڭ باستاۋىنداي كورىنەدى.  «بولاشاقتان» كەلگەن اكىمنىڭ ەندىگى جۇمىسى الماتىنىڭ رۋحاني، ۇلتتىق كەلبەتىن كوركەيتۋمەن جالعاسا بەرەدى دەپ سەنەيىك.

Abai.kz