كەشە (14 قاراشا) كەشكىلىك (ساعات 16:15-تەنر شاماسىندا) «مەركە» شەكارالىق تەكسەرىپ-وتكىزۋ بەكەتىنىڭ (قازاقستان-قىرعىز شەكاراسى) «سىپاتاي باتىر اۆتو» بولىمشەسىندە شەكاراشىلار ءبىزدىڭ ەلىمىزدەن كورشى ەلگە قاراي جاياۋ ءوتىپ بارا جاتقان 1979 جىلى تۋعان «رايم» ەسىمدى قىرعىز رەسپۋبليكاسىنىڭ ازاماتىن ۇستادى دەپ حابارلايدى قر ۇقك شق ءباسپاسوز قىزمەتى.

ۇستاۋدىڭ باستاپقى سەبەبى ميگراتسيالىق قاعازىنىڭ جوقتىعى بولاتىن. بۇل ازاماتتىڭ قازاقستاندا زاڭسىز جۇرگەنىنە ءتورتجارىم جىل بولعان كورىنەدى. ەلىن اڭساعان بولۋ كەرەك، قايتىپ بارا جاتقان بەتى ەكەن.

ازاماتتىڭ ءومىربايانىنىڭ «تازالىعىن» قر باس پروكۋراتۋراسىنىڭ قۇقىقتىق ستاتيستيكا جانە ارنايى تىركەۋ كوميتەتىنىڭ اقپاراتتىق سەرۆيسى ارقىلى تەكسەرۋ ناتيجەسىندە بۇل ادام كورشى مەملەكەتتىڭ چۋ وبلىسىنىدا قىرعىز رەسپۋبليكاسى قىلمىستىق كودەسىنىڭ 164 بابىنىڭ 3-ءبولىمىنىڭ 4-تارماعى (وزگەنىڭ مۇلكىن تۇرعىن جايىنا نەمەسە باسقا دا عيماراتقا زاڭسىز كىرە وتىرىپ ۇرالۋ) بويىنشا قىلمىس جاساعاندىعى ءۇشىن حالىقارالىق ىزدەستىرۋدە جۇرگەن، كەزدەسكەن جەردە تۇتقىندالۋى ءتيىس قىلمىسكەر ەكەندىگى انىقتالدى. ۇستالعان ازامات جامبىل وبلىسىنىڭ مەركە اۋداندىق ىشكى ىستەر بولىمىنە تاپسىرىلدى.

اباي-اقپارات