ء«داستۇر» جۋرنالى اشىلعاندا سەيىتحان قاريا ارنايى اق باتاسىن بەرىپ، باسىلىمنىڭ بولاشاعى زور بولۋىنا تىلەگىن بىلدىرگەن ەدى.  جاسىنىڭ ۇلعايعاندىعىنا قاراماستان جۋرنالدى ۇزبەي وقىپ، پىكىرىن ءبىلدىرىپ، اقىل-كەڭەسىن بەرىپ وتىرۋدى دا داستۇرگە اينالدىرعان بولاتىن. توقسانعا قاراعان شاعىندا اۋىل ايماعىنا ەڭبەگىمەن، ونەگەلى ىسىمەن، اقىل-كەڭەسىمەن قادىرمەندى بولعان اقساقال دۇنيەدەن وزدى دەگەن قايعىلى حابار كەلدى. قاريانىڭ الدى پەيىش، ارتى كەنىش بولسىن دەگەن يماني تىلەگىمىزدى بىلدىرە وتىرىپ اقىن-جازۋشى قاسىمحان بەگمانوۆتىڭ اكەسى تۋرالى جازعان ەستەلىگىنەن ءۇزىندى بەرىپ وتىرمىز.

   «...«اكەم، ومىردەن ەرتەرەك كەتكەن ءىنىسى مەن اكەسىنىڭ ورتاسىنداعى بوس جەردى كورسەتىپ تۇرىپ، «مەن كەتسەم مىنا جەرگە قوياسىڭ، بالام»، –  دەدى. كوڭىلىمنەن  الاي-تۇلەي اق بوران كوتەرىلدى. ء«الى ەرتەرەك قوي، قايدا اسىعاسىڭ؟»– دەدىم تاماعىما اششى وكسىك تىعىلىپ. جوق الدە بۇل سوزدەردى ىشىمنەن ايتتىم با ەكەن. انىق ەسىمدە جوق. مەن قازىر ءوزىمدى جوق ىزدەگەن جالعىز جولاۋشىداي سەزىنەمىن. جالعىزدىڭ جارى اللا دەيتىن ەدى مىنا مولادا جاتقاندار. مەن قازىر ءوزىمدى جوق ىزدەگەن جالعىز جولاۋشىداي سەزىنىپ كەلەمىن.  

اكەم باتاسىن بەرىپ ءۇيدىڭ جانىنان ءتۇسىپ قالدى. ءالى دە اڭگىمەلەسكىم، سويلەسكىم، سىرلاسقىم كەلدى. بىراق وعان ۋاقىت تاپشى،  دۇيسەنبىدە قىزمەتتە بولۋىم كەرەك. قالاداعى باستىعىممەن كەلىسىمىم سولاي ەدى. تىرشىلىك،  بالا-شاعانىڭ قامى. الدىمدا تاعى دا مىڭ شاقىرىم جول جاتىر. سول جولدى ءوزىم رۋلدە ءبىر تاۋلىكتە ءجۇرىپ ءوتۋىم كەرەك.

    قازىر اكەمنىڭ جاسى  90-عا كەلىپ قالدى. تۇركىستان قالاسىندا وزىمنەن كەيىنگى ءىنىم سادىرحاننىڭ قولىندا تۇرادى، ارتىق ءسوزى جوق، زيالى ادام. اكەمنىڭ اكەسى، ياعني اتام ستالينگرادتى قورعاۋعا قاتىسقان مايدانگەر، كەيىن ەلگە امان-ەسەن ورالىپ ەل باسقارعان ساۋاتتى ادام بولاتىن. سوعىستان كەيىن ناعاشى اتام ءبىر كولحوزدى، ءوز اتام ەكىنشى ءبىر كولحوزدى باسقارىپ اۋدان ورتالىعىنا جينالىستا كەزدەسىپ ءجۇرىپ ارنايى قۇدا ءتۇسىپ، مەنىڭ شەشەم ۇزاتىلىپ كەپ كەلىن بوپ تۇسكەن ەكەن. بۇل مەنىڭ بالا كەزىمدە كوپ ەستىپ وسكەن سوزدەرىم دەسەم دە بولادى. ەسكى، كوز كورگەندەر ەل جاقتا  ءالى كۇنگە دەيىن ايتادى.

    اكەمىزدىڭ بىزگە ۇنەمى ايتىپ وتىراتىن ءبىر ءسوزى: كىسىنىڭ اماناتىنا قيانات جاساۋشى بولما، بىرەۋگە قيانات جاساپ سايدا جۇرگەنشە، بىرەۋدەن تاياق جەسەڭدە قىردا ءجۇر بالام، ءجۇزىڭ جارقىن، اشىق بولادى دەپ وتىرادى. ول كىسى ەشقاشاندا لەبىزىن جۇتپايتىن ادام. ۋادەگە بەرىك، ارتىق سوزگە جوق، تازا ەڭبەكتىڭ ادامى. ءبىزدى ادال ەڭبەك ەتۋگە تاربيەلەدى. ودان جامان بولماعان سياقتىمىز...»

رەداكتسيادان: اقىن-جازۋشى، باسپاگەر قاسىمحان بەگمانوۆقا اكەسى سەيىتحان اقساقالدىڭ دۇنيە سالعانىنا بايلانىستى قايعىسىنا ورتاقتاسىپ، كوڭىل ايتامىز.

Abai.kz اقپاراتتىق پورتالىنىڭ ۇجىمى