«احمەتوۆ ءىسى» بويىنشا 11 قاراشاداعى سوت وتىرىسىندا «توپار جىلىجايلارى» جىلىجاي كەشەنىنىڭ قۇرىلىسىن سالۋ كەزىندە بيۋدجەت قاراجاتىن ۇرلاۋ ەپيزودىن قاراۋ بارىسىندا سوتتالۋشىلارعا «قازاگروقارجى» اق-نىڭ باسقارۋشى ديرەكتورى باۋىرجان بيشەنوۆتىڭ اتىنان ازاماتتىق شاعىم ءتۇستى. كومپانيا وزىنە زيان كەلتىرگەنى ءۇشىن سوتتالۋشىلاردان 1 ملرد. 104 ملن. 388 مىڭ 755 تەڭگە ءوندىرىپ الۋدى سۇراپتى.

ايتا كەتەلىك، سەرىك احمەتوۆ پەن باسقا لاۋازىمدى شەنەۋنىكتەردىڭ قىلمىستىق ءىسى بويىنشا «توپار جىلىجايلارىنا» قاتىستى جەتىنشى ەپيزودتى قاراۋ كەزىندە قاراعاندىداعى جىلىجاي كەشەنىنىڭ قۇرىلىسىن جۇرگىزۋدە بىرقاتار زاڭ بۇزۋشىلىقتارعا جول بەرىلىپ، جوبانىڭ قۇنى ادەيى كوتەرىلگەنى ءمالىم بولعان. 4 قاراشاداعى سوت وتىرىسىندا تۇسىنىك بەرگەن «توپار جىلىجايلارى» جشس-ءنىڭ ديرەكتورى الەكساندر زابيروۆ ءىس جۇزىندە س. احمەتوۆ تۇپكى يەسى بولىپ تابىلاتىن جىلىجاي كەشەنىن جەتىلدىرۋگە «قازاگروقارجى» اق-ى نەسيە اقشا بولگەنىن حابارلادى.

ا. زابيروۆ جىلىجاي كەشەنىنە قاجەتتى قوندىرعىنى جەتكىزىپ بەرۋگە يسپاندىق «Rupefa Technoagro S.L.» كومپانياسىمەن مامىلە جاسايدى. كوپ ۇزاماي ول س. احمەتوۆتىڭ ادامدارىنان جەتكىزۋشىگە قوندىرعىنىڭ قۇنىن 3 ملن. ەۋروعا اسىرىپ كورسەتۋ جانە ايىرماداعى اقشانى قازاقستانعا قايتارۋ تۋرالى نۇسقاۋ الادى. «Rupefa Technoagro S.L.»-نىڭ باسشىلىعى بۇل ۇسىنىسقا كەلىسكەن سوڭ 3 ملن ەۋرو قازاقستاندىق جالعان كاسىپورىنداردىڭ شوتىنا اۋدارىلىپ، قولما-قول اقشا تۇرىنە اۋىستىرىلادى. ونىڭ ءبىر بولىگى ەكس-پرەمەردىڭ «سەنىمدى وكىلى»، سول كەزدە «قازاگروقارجى» اق-نىڭ باسقارما توراعاسى بولعان عۇمار راقىمجانوۆ ارقىلى س. احمەتوۆكە بەرىلگەن، قالعان بولىگى جىلىجاي كەشەنىنىڭ قۇرىلىسىنا سالىنادى.

باۋىرجان بيشەنوۆ سوت وتىرىسىندا «توپار جىلىجايلارى» جشس-ءنىڭ 8 گەكتار جەرگە جىلىجاي كەشەنىن سالۋ جوباسىن قارجىلاندىرۋ تۋرالى ءوتىنىشى «قازاگروقارجى» اق-نا 2012 جىلى كەلىپ تۇسكەنىن حابارلادى. «نەسيە كوميتەتى وڭ شەشىم شىعاردى. وسى شەشىمدى قوعامدىق كوميسسيا دا ماقۇلدادى. جىلىجايدىڭ ەسكى عيماراتى مەن سيىر قورالار مۇلىك رەتىندە كەپىلگە قويىلدى» دەپ ءتۇسىندىردى جابىرلەنۋشى تاراپتىڭ وكىلى. ونىڭ ايتۋىنشا، قازىرگى كەزدە جوبا كۇردەلى كۇيىندە قالىپ، تولىق قۋاتىمەن ىسكە قوسىلماعان. وسىعان وراي بەرەشەك اقشا كوبەيگەن. مەرزىمى وتكەن مىندەتتەمەلەردىڭ سوماسى 344 ملن. 314 مىڭ 296 تەڭگەگە جەتىپتى. «وسىدان كەلىپ ازاماتتىق شاعىم جازىپ، كىنالى ادامداردى قىلمىستىق جاۋاپكەرشلىككە تارتۋ تۋرالى شەشىم قابىلداندى. شاعىمدا اينالىمدىق اقشالاردى تولتىرۋعا ارنالعان ەكى كەلىسىم-شارت بار. ونىڭ بىرەۋى قۇرىلىس-مونتاج جۇمىستارىنا قاتىستى. قوندىرعىنىڭ قۇنى اسىرا كورسەتىلگەنى جازىلعان. ءبىز باسىندا جوباعا ەنگىزگەن قوندىرعىنىڭ قۇنى قازىرگىمەن سايكەس كەلمەيدى»،- دەدى ب. بيشەنوۆ. ول جىلىجاي كەشەنىنىڭ قۇرىلىسىن اياقتاۋعا ينۆەستورلار ىزدەپ جاتقانىن، ازىرشە ونى ساتىپ الۋعا تىلەك بىلدىرگەندەردىڭ جوقتىعىن ايتتى.  

ءامينا باكىر.

اباي-اقپارات