سونىمەن، جىلداعى ادەتىنە باسىپ، جاڭا جىلدىڭ شىرشالارى استانادا ەرتە بوي كورسەتە باستادى.

ءبىرىنشى بولىپ، بۇل باستامانى بيىل «كەرۋەن» ساۋدا ورتالىعى باستاپتى.

قاراپ تۇرساق، جاڭا جىلعا ءالى ءبىر جارىم ايدان ارتىق ۋاقىت بار. شىرشاسىن ورناتىپ، باستاي بەرسىنشى دەيىن دەسەڭ، ارادا ۇلت كوشباسشىسى نۇرسۇلتان نازارباەۆتىڭ قۇرمەتىنە ارنالعان «تۇڭعىش پرەزيدەنت كۇنى» مەيرامى تۇر. ونىڭ ارعى جاعىندا قاسيەتتى «تاۋەلسىزدىك كۇنى» مەرەكەسى.

ەكى بىردەي ۇلىق مەرەكەنى باسا-كوكتەگەن كورگەنسىزدىككە «قوي دەيتىن قوجا، اي دەيتىن اجا قايدا»؟!

«نۇر وتان» پارتياسى توراعاسىنىڭ ءبىرىنشى ورىنباسارىنىڭ كەڭەسشىسى بەرىك ءۋالي بۇل تۋرالى جاقىندا عانا ەسكەرتۋ جاسادى. سوعان مىنا مىقتىلارىڭنىڭ قۇلاق اسار ءتۇرى جوق!

نە ىستەمەك كەرەك؟!

بەلگىلى سىنشى امانگەلدى كەڭشىلىكۇلى Facebook-تەگى پاراقشاسىندا زيالى ازاماتتارى شىرشا قويعىزباۋ ءۇشىن شاپقىلاپ ءجۇرىپ، «جەڭىسكە جەتە» باستاعانىن سۇيىنشىلەدى. امانگەلدى كەڭشىلىكۇلى بۇل تۋرالى: «كەشە عانا "نۇر وتان" پارتياسى جانىنداعى "ميراس" قوعامدىق كەڭەسى مۇشەلەرى مەن زيالى قاۋىم وكىلدەرى ۇندەۋ جاريالاعان بولاتىن. ەلىمىزدىڭ 24 زيالىسى تاۋەلسىزدىك مەرەكەسى ءوز دەڭگەيىندە اتاپ وتىلگەنشە جاڭا جىل مەرەكەسىنە دايىندىقتى توقتاتا تۇرۋدى سۇراعان ەدى. بۇل حات استانا، الماتى قالالارى مەن وبلىس اكىمدەرىنىڭ يدەولوگيا سالاسىنا جاۋاپتى ورىنباسارلارىنا جانە ىشكى ساياسات باسقارمالارىنىڭ باسشىلارىنا جولدانعان-تۇعىن. بۇگىن اتىراۋ وبلىستىق باسقارماسىنان وسىعان وراي رەسمي جاۋاپ كەلدى. وندا بىلاي دەلىنگەن: "اتىراۋ وبلىستىق اكىمدىگى جاڭا جىل مەرەكەسىنە وراي بەزەندىرۋ جۇمىستارىن تاۋەلسىزدىك مەرەكەسىنەن كەيىن باستاۋ جونىندەگى باستامالارىڭىزدى تولىق قولدايدى. اتالعان باستامانى باسشىلىققا الىپ، ءتيىستى جۇمىستاردى ۋاقىتىندا ۇيىمداستىرۋ جونىندە قالا جانە اۋداندار اكىمدەرىنە تاپسىرمالار بەرىلدى» دەپ جازدى. 

اتىراۋلىقتار ەرلەدى... ەندى سول ەرلىك قازاقستاننىڭ وزگە قالالارى دا قايتالاسا عوي، شىركىن.

ارقا جارقاۇلى, استانا

Abai.kz