نەگە تاعدىر ءدال سول كۇنى ءبۇلىندى،
اپ كەتكەنىن بىلە مە ەكەن كىمىمدى؟
قارا دالا توسىندەگى قارا جول
سۋىرىپ الىپ جۇرەگىم مەن ءتىلىمدى
قاعىپ ءتۇستى مەنىڭ قايسار ءىنىمدى.

قيماستىقتان تۇرار جاسى مولدىرەپ،
ۇشەۋمىزدى ويلاپتى جۇرت ءولدى دەپ.
سىزگە – قايعى، 
بىزگە – ءولىم سول ساپار،
قاتارىمىز قالدى-اۋ، دۇنيە-اي، سەلدىرەپ.

2004...
جىلنامامدا جوق جىل ول،
بار بولعانمەن جان قارىعان شوق جىل ول.
كۇنتىزبەمدە جوق وتىزى قازاننىڭ،
بالقىپ بىتكەن قازانداعى وق ءبىر ول.

قازىر ايتىس كورە المايمىن،
كورمەيمىن.
كوكىرەگىمدى ورتەپ بولدى كولدەي مۇڭ.
بىرەۋدى ىزدەپ ءوز-وزىمنەن شولدەيمىن،
بىرەۋدى ىزدەپ بوكتەرلەرگە ورلەيمىن...

سول ءبىر جىلدان،
سول ءبىر كۇننەن باستالعان
وسى دەرتتەن قۇتىلمادىم قاشقانمەن.
قابىرىنە بارام جالعىز قارعامنىڭ
قارا بۇلتتار جوڭكىلگەندە اسپاندا.

ءولىمىن بە؟
ءتىرىمىن بە؟
بىلمەيمىن،
سودان بەرى ەكى جاققا بىردەيمىن.
ءتىرى بولسام،
نەگە كوپپەن جۇرمەيمىن؟
ءولى بولسام،
نەگە كورگە كىرمەيمىن؟!.

2004...
جىلنامامنان سىزىلعان،
ول مەن ءۇشىن رەتتىك سان بۇزىلعان.
كۇنتىزبەمدە جوق وتىزى قازاننىڭ –
ۇزىلگەن جان،
سىنعان سۇيەك،
قىزىل قان ...